Menjëherë pas letrës së tretë të Kryeministrit Rama, Lulzim Basha i është drejtuar me një apel shqiptarëve që jetojnë në vendet e Bashkimit Europian duke i ftuar që t’u drejtohen kutive të votimit për të zgjedhur kandidatët e Partisë Popullore Europiane në zgjedhjet që mbahen për Parlamentin Europian.

Përmes një video-selfi nga selia blu, kreu i opozitës i cilësoi protestat e nisura me qytetarët në Shqipëri betejë për vlerat europiane.

“Në Shqipëri po zhvillohet një betejë për jetë a vdekje për standardet dhe vlerat evropiane të zgjedhjeve të lira dhe të ndershme, të lirisë dhe demokracisë, të votës së lirë dhe ndarjes dhe balancimit të pushteteve, të drejtësisë me një standard dhe barazisë para ligjit, të lirisë ekonomike dhe dinjitetit për gjithë qytetarët shqiptarë. Këto janë vlerat evropiane për të cilat po lufton PD dhe opozita e bashkuar”.

Në një takim në qytetin e Burrelit kreu i PD, tha se opozita është e vendosur, të mos bëjë asnjë hap pas në misionin që ka nisur. Ai u shpreh i hapur se mirëpret ndërhyrjen e ndërkombëtarëve.

Basha ju bëri thirrje qytetarëve të Burrelit ti bashkohen protestës që do të organizohet të shtunën në Tiranë

Tv Klan