Një zyrtar nga Garda Nacionale në Iowa të SHBA-së ka thënë se Kryeministri i Kosovës Ramush Haradinaj ka anuluar vizitën në këtë shtet me arsyen se “ai nuk ka mundur ta marrë vizën”.

Haradinaj pritej të merrte pjesë më 11 Janar në një ngjarje të organizuar nga Komandanti i Gardës Nacionale në Iowa, Timothy E. Orr.

“Kryeministri Haradinaj ka qenë i ftuar nga gjenerali Orr në atë ngjarje, mirëpo është për të ardhur keq që ai nuk ka mundur ta marrë vizën dhe të jetë së bashku me ne”, ka thënë kolonel Greg Hapgood, zëdhënës i gardës së Iowas për Radion Evropa e Lirë.

“Shpjegimi ka qenë se vizita nuk do të ndodhë në këtë kohë dhe nuk kemi marrë më shumë informata shtesë”, ka shtuar ai.

Sipas Hapgood, në vend të Haradinajt pritet të marrë pjesë zëvendëskryeministri i Kosovës dhe ministri i Punëve të Jashtme, Behgjet Pacolli.

Mediat kanë raportuar të dielën se Ambasada Amerikane ia ka refuzuar kryeministrit Ramush Haradinaj vizën për të udhëtuar në SHBA.

Vetë Haradinaj ka thënë se ende është duke pritur të marrë vizën.

Ky zhvillim pason kritikat e komunitetit ndërkombëtar pas përpjekjeve të ligjëvnësve të Kosovës për të ndryshuar ligjin për Gjykatën e Posaçme për Krime Lufte. /klankosova