Lajme Arkiva – TV Klan 2004
Si të bashkëjetojnë letrat shqipe me kulturën europiane. Ky është shqetësimi dhe një nga debatet që kanë përfshirë personalitetet e librit në Shqipëri. Shtëpia e Librit dhe Komunikimit dhe Ambasada Franceze kanë ndërmarrë që vitin e kaluar, organizimin e takimeve të quajtura Jusuf Vrioni.
Takime të tilla përpiqen të vënë në qendër të debateve, tema të ndryshme nga letërsia dhe përkthimet. E veçanta e takimit të sotëm ishte gjetja e bashkëjetesës së letrave shqipe me kulturën europiane. I pranishëm në këtë takim ka qenë edhe ministri Klosi, i cili e ka vlerësuar takimin, si një moment reflektimi serioz.
Blendi Klosi: “I konceptuar si i tillë, diversiteti është një urë komunikimi jetëgjatë. Njohja dhe respekti ndaj diversitetit të kulturave të tjera është rruga më e mirë për të pasur dhe emancipuar vetveten, është mënyra më e mirë për të oksigjenuar identitetin tonë dhe respektin e të tjerëve ndaj nesh”.
Personalitete të fushës së librit, si Aurel Plasari, Besnik Mustafaj, Edmond Tupja, Mirela Kumbaro, Ardinan Klosi etj, kanë dhënë sot opinionet e tyre rreth kësaj teme.
Aurel Plasari: “Në sferën e letrave pranohet se flitet për një globalizëm të keqkuptuar nga rastet kur bëhet fjalë për heqjen dorë prej vlerave shpirtërore kombëtare. Kush do të kërkonte të hiqte dorë nga vlerat e veta, ai do të dëshironte diçka që nuk ka të bëjë aspak me frymën europiane. Ky ballafaqim, mund të nxjerrë në përfundimin se midis propagandistëve të dikurshëm të prolektkultit dhe kundërshtarëve të sotëm të vlerave kombëtare, ka një ngjashmëri të madhe”.
Takimi është organizuar nga Shtëpia e Librit dhe Komunikimit në bashkëpunim me Ambasadën Franceze./tvklan.al
Gazetare: Mira Kazhani
