Është çelur këtë të Mërkurë në Tiranë Qendra e re e Inovacionit, Sigurisë dhe Mbrojtjes. I pranishëm ishte kryeministri Edi Rama, ministri i Mbrojtjes Niko Peleshi dhe zv.kryeministrja Belinda Balluku.
Kjo qendër sipas Ramës hap një tjetër faqe në modernizimin e Ushtrisë Shqiptare.
“Hap një tjetër faqe në modernizimin e Ushtrisë Shqiptare, si edhe krijon kushte optimale për zhvillimin e teknologjive të reja, jo vetëm në fushën e sigurisë dhe mbrojtjes, po edhe në funksion të modernizimit të qeverisjes e të mbështetjes së sektorit privat”, shkruan Rama në Facebook.
Ndërkohë, ministri Peleshi theksoi në fjalën e tij se do të nënshkruhen marrëveshjet e para të bashkëpunimit me partnerët ndërkombëtarë, e në fokus janë planet për zgjerim
“Jam krenar që i bashkohem kësaj lëvizjeje, do të japim produktet e para që do jenë tejet frymëzuese. Inovacioni dhe krijmtaria, mundësi për zhvillim.”
Siç shihet në pamjet e mëposhtme, qendra e re është e pajisur me mjetet më të sofistikuara.
Kjo Qendër do të ketë si përgjegjësi zhvillimin e iniciativave dhe projekteve inovative me rëndësi strategjike për zhvillimin e kapaciteteve në fushën e mbrojtjes dhe të sigurisë, sipas projekteve të përbashkëta dhe marrëveshjeve të bashkëpunimit me persona fizikë e juridikë, publikë ose privatë, si dhe partnerë të ndryshëm për zhvillim, vendës dhe ndërkombëtarë të kësaj fushe.
/tvklan.al
