Në një konferencë për shtyp, kandidati i Frontit Europian, Bujar Osmani tha se është shënuar fitore e thellë me mbi 40 mijë vota karshi kandidatit të VLEN, Arben Taravari.
“Shpall fitoren e thellë me mbi 40 mijë vota. Kemi shënuar fitore pothuajse në çdo komunë shqiptare. Gjithandej në republikë, fitore e thellë e Frontit Europian. Urime të gjithëve. Ju faleminderit nga thellësia e zemrës për besimin dhe kjo fitore është e përbashkët”, deklaroi Osmani, raporton Klan Macedonia.
Teksa procesi i numërimit të votave për garën presidenciale në Maqedoninë e Veriut vijon, rezultatet paraprake tregojnë se kandidati shqiptar Bujar Osmani i Frontit Europian renditet i treti në rang vendi.
Festa ka shpërthyer në selinë e BDI në Tetovë, por edhe në Shkup. Pikërisht nga kryeqyteti maqedonas, në sheshin “Skënderbeu”, zëvendëskryeministri Artan Grubi tha se sot fitoi Maqedonia europiane.
“Fitoi Maqedonia europiane. Dështuan ato koalicione për të dështuar Ali Ahmetin dhe luftën e UÇK-së. Falenderoj të gjithë ata që votuan për Frontin Europian sepse në jemi garantuesi e ecurisë europiane të vendit”, deklaroi Grubi.
Në rang vendi, kryeson kandidatja e VMRO DPMNE Gordana Siljanovska Davkova me 36.99% të votave, e pasuar nga Stevo Pendarovski me 18.18 përqind të votave.
Kujtojmë se në garë janë 7 kandidatë./tvklan.al
