MM: Temperaturat do vijojnë të ulen
Reshjet e dëborës rinisën mbrëmjen e së shtunës në qafën e Llogarasë në Vlorë, por për momentin rruga mbetet e kalueshme. Prej 24 orësh moti i acartë ka përfshiu vendin dhe që pritet të na shoqërojë edhe në ditët në vijim. Ministria e Mbrojtjes tha se meteorologët parashikojnë që temperaturat do të vijojnë të zbresin nën zero.
Për shkak të reshjeve të dëborës gjatë të premtes u bllokuan disa akse rrugore, ndërkohë mëngjesin e të shtunës, ulja e temperaturave shkaktoi ngrica në Dibër.
Qarkullimi është normalizuar në rrugën e Arbrit, pas bllokimit të përkohshëm të premten. Ndërkohë Ministria njoftoi se është e bllokuar rruga Peshkopi-Lurë, por lëvizet në aksin Lurë-Rrëshen dhe Xibër-Klos me zinxhirë.
Moti i keq shkaktoi ndërprerje të energjisë elektrike në disa njësi të Bashkisë së Dibrës dhe Librazhd, si dhe probleme me furnizimin me ujë në një pjesë të qytetit të Peshkopisë
Reshjet e dëborës vështirësuan qarkullimin edhe në Qafë Thorë të Shkodrës, ku vijoi puna gjatë ditës për normalizimin e mëtejshme. Aksi aktualisht është i hapur.
Në Korçë, të gjitha akset janë të kalueshme, por rekomandohet lëvizja me goma dimri dhe zinxhirë aty ku ka ende dëborë në rrugë.
Tv Klan
