#Opinion | Emision politik live nga #BlendiFevziu në #TvKlan

Të ftuar: Baton Haxhiu, Artan Hoxha

Një prej temave që trajtoi mbrëmjen e kësaj të hëne në Opinion, ishte një reportazh i RAI 3, i cili pati nota, ndoshta më kritike ndaj qeverisë shqiptare, në këto 10 vite. Ishte një emision i cili kishte një shikim pothuajse të shtrirë në kohë të qeverisjes Rama, me tone kritike, akuza të mëdha, të cilat nuk janë të reja në Shqipëri, janë bërë shpesh nëpër studio televizive. Pikëpyetja e parë që u ngrit në këtë drejtim është çfarë po ndodh? Përse një media italiane nisi sulmin ndaj Ramës? Është një çështje e brendshme e politikës italiane apo ka ndryshuar diçka në raportet qeveritare mes Italisë dhe Shqipërisë?

“Free Berisha” në bluzën e Hoxhës, Haxhiu ia thotë troç: Ju e doni në burg!

“Free Berisha” e stampuar në bluzën e analistit Artan Hoxha. Sonte në studion e “Opinion” ai ritheksoi qëndrimin e tij ndaj masës së sigurisë për ish-kryeministrin, duke e cilësuar vendimmarrje skandaloze të gjykatës. Por për Baton Haxhiun, ajo thirrje e Hoxhës nuk ka vërtetësi brenda pasi siç thotë ai, Berisha po përdoret për qëllime politike nga shumë të djathtë.

-Hoxha ça është kjo bluzë që ke veshur?

Artan Hoxha: Është “Free Berisha”. (Lironi Berishën!)

Baton Haxhiu: Të vetmit që nuk e duan “free” Berishën. E mbajnë kot.

-E ke bërë vetë bluzën apo i kanë shpërndarë?

Artan Hoxha: I ka stampuar dikush dhe e kam marrë një. Dhe do ta mbaj në çdo emision tëndin.

Baton Haxhiu: Të vetmit njerëz që nuk e duan Berishën janë Tani dhe ata, grupi që projektojnë politikë. I vetmi njeri që e do “free” Berishën jam unë, për arsye se unë e projektoj Berishën me një betejë. Këta e duan suksesin e politikës duke viktimizuar Berishën, duke u munduar ta bëjnë hero. Nuk e duan as në arrest shtëpiak, e duan në burg. Sa më i burgosur, aq më mirë për ta dhe për politikën. Free Berisha, ajo bluzë më takon mua.

-Ta heqë Hoxha dhe vishe. Po e veshe sot bëhesh kryelajm. Mos ke ndonjë tjetër me vete?

Artan Hoxha: Me vete nuk kam, por Batoni është bërë dhe psikolog që kupton dëshirat e njerëzve. E vërteta është shumë e thjeshtë, Sali Berisha ndodhet në arrest shtëpie me vendime skandaloze gjykatash.

Më tej debati vijoi, teksa Hoxha i thoshte: Bërtit Baton, bërtit lironi Sali Berishën!

Me ironi, analisti tjetër iu përgjigj: Lironi Sali Berishën! Lironi Sali Berishën nesër, nesër! Sonte, nëse ka mundësi. E kam thënë që ditën që është arrestuar.

“Janë burrë e grua e kanë 3 fëmijë”, Haxhiu tregon çfarë i ka thënë në tavolinë Metës

Baton Haxhiu mori në analizë këtë të hënë çiftin Ilir Meta – Monika Kryemadhi. Gjatë emisionit “Opinion”, Haxhiu u shpreh se është kundër trajtimit që Meta po i bën Kryemadhit publikisht.

“I kam pasur dy momente me miqësinë e familjes Meta dhe nuk e mohoj që i kam pasur shumë miq. Kam qenë shumë kundër që Monika të hynte në politikë atëherë kur Ilir Meta ia imponoi. Ia imponoi si pjesë të saj, si njeri të dytë etj. Jam shumë kundër me atë që po bën Ilir Meta sot. Jam shumë kundër për arsye se trajtimi i Monikës në këtë mënyrë çfarë po i bën Ilir Meta, ia kam thënë edhe në tavolinë, po ia them edhe publikisht, është krejtësisht gabim. Në këtë rast jam me Monikën. Nuk besoj se Monika është ndonjë politikane e jashtëzakonshme, por po them atë që duhet. Nuk duhet të vijë deri në këtë pikë Iliri ta trajtojë pjesën e familjes së tij ashtu siç e bën në publik”, tha Haxhiu.

Sipas tij, Meta është në grahmën e fundit të jetës së tij politike. Ai tha se nuk e pranon gjuhën që ish-Presidenti ka me Kryemadhin duke u shprehur se gjërat mund t’i zgjidhin edhe privatisht në shtëpi.  

“Është në grahmën e fundit të jetës së tij politike për shumë arsye. E di më mirë se kushdo tjetër Ilirin. E njoh edhe kur karikohet shumë, edhe kur bërtet shumë, edhe kur bërtet politikisht, edhe kur e ka bërtimën më të madhe që është i pafuqishëm. I njoh të gjitha detajet e Ilirit. Ajo që po më pengon është raporti njerëzor me Monikën dhe këtë nuk ia pranoj. Nuk ia pranoj që dikush publikisht me njeriun që ka jetuar gjatë ta denoncojë publikisht ashtu. Nuk e pranoj këtë gjuhë. Nuk e pranoj këtë mënyrë të të bërit politikë. Nuk e pranoj pjesën njerëzore në raport me Monikën dhe tek e fundit gjërat që kanë private mund t’i zgjidhin në shtëpi. Nuk janë të fundit që i zgjidhin këto gjëra privatisht. Nuk janë njerëzit e fundit që mospajtimet t’i zgjidhin privatisht. Ata tek e fundit janë burrë e grua e kanë 3 fëmijë. Po flasim edhe për një çift”, tha ai.

Sipas Haxhiut, Meta ka marrë anën e SPAK sepse ka deklaruar publikisht për Kryemadhin dhe të tjerët që “ata janë mjaftueshëm të rritur dhe unë nuk jam këtu që të fal ose mbroj gabimet e të tjerëve”.

“Nuk flitet për grua ashtu. Jam konservativ në këtë pikë. Nuk e pëlqej Monikën politikisht, por këtë rast jam me Monikën”, shtoi Haxhiu.