Barcelona është një ndër skuadrat që shet më shumë bluza anekënd botës. Dhjetëra miliona shiten çdo vit.
Por, një vendim i çuditshëm vjen nga Emiratet e Bashkuara Arabe, të cilat do të dënojnë me deri në 15 vite burg dhe me 135 mijë dollarë gjobë çdo person që kapet me bluzën e Barçës.
Arsyeja nuk ka të bëjë me Barcelonën, por me sponsorin kryesor të ekipit spanjoll, “Qatar Airways” në bluza.
Të hënën e kësaj jave, Arabia Saudite, Bahrejni, Emiratet e Bashkuara Arabe dhe Egjipti kanë vendosur embargo totale kundër Katarit, përfshirë edhe ndaj kompanisë ajrore “Qatar Airways”.
Por armiqësia e Emirateve të Bashkuara arabe duket se ka kaluar në ekstrem, duke bllokuar në vend çdo produkt që mund të reklamojë katarianët.
Kontrata e Barcelonës me “Qatar Airways” skadon më 30 qershor këtë vit, ndërsa pas kësaj date katalanasit do të mbajnë në gjoks emrin e kompanisë së shitjeve online nga Japonia, “Rakuten”.
/tvklan.al
