Ministrja gjermane e mbrojtjes: Pa paqe në Ballkan nuk ka stabilitet në Evropë

Christine Lambrecht ka përshëndetur marrëveshjen për letërnjoftimet mes Prishtinës dhe Beogradit

Pa paqe në Ballkan, nuk ka stabilitet në Evropë. Kështu deklaroi  ministrja gjermane e mbrojtjes Christine   Lambrecht pas takimit me homologun e saj nga Kosova, Armend Mehaj.

Siç bëjnë të ditur burime të DW pranë Ministrisë gjermane të Mbrojtjes, në takim është biseduar për gjendjen në Kosovë dhe përpjekjet për normalizimin e marrëdhënieve mes Beogradit  dhe Prishtinës.

Lambrecht  përshëndeti marrëveshjen e arritur kohëve të fundit mes  dy vendeve për letërnjoftimet. Lambrecht ka siguruar gjithashtu mbështetjen e  Berlinit në procesin e transformimit të Ushtrisë së Kosovës. Së fundmi, kryeminsitri  Albin Kurti, ishte shprehur për një  prani më të madhe të ushtarëve gjermanë të KFOR-it në Kosovë.

Sakaq, Gjermania së bashku me Francën po angazhohen fort për normalizimin e marrëdhënieve mes Kosovës dhe Serbisë. Të premten, më 9 shtator, dy këshillltarët për çështje të jashtme të kancelarit gjerman, Olaf Scholz, dhe presidentit francez, Emmanuel Macron, do të shkojnë në Kosovë dhe Serbi për të parë se cilat janë opsionet e normalizimit të plotë të marrëdhënieve mes dy vendeve.

Klan News