Kreu i Kuvendit të Shqipërisë, Ilir Meta i ka dërguar sot një mesazh urimi Kryeparlamentarit të Kosovës, Kadri Veseli, me rastin e 9-vjetorit të Pavarësisë së Kosovës.
Në mesazhin e tij, Meta thotë se i gjithë kombi shqiptar kujton me mirënjohje ata që sakrifikuan për Pavarësinë e Kosovës, ndaj dhe sot të dy këto popuj nderojnë me krenari, mençurinë vizionare të Presidentit Ibrahim Rrugova dhe heronjve të UÇK-së, me Komandantin Adem Jashari në krye.
“Me rastin e 9 vjetorit të pavarësisë së Republikës së Kosovës më lejoni t’Ju përcjell urimet më të përzemërta dhe më të ngrohta në emër të Kuvendit të Shqipërisë.
Sot i gjithë kombi shqiptar kujton me mirënjohje të thellë të gjithë ata që sakrifikuan për pavarësinë e Kosovës, ndaj sot nderojmë me krenari, së bashku me të gjithë qytetarët e Kosovës, mençurinë vizionare të Presidentit Ibrahim Rrugova dhe përulemi me respekt të thellë ndaj heronjve të UÇK-së me Komandantin Adem Jashari në krye.
Sakrifica e pamasë e tyre na detyron të gjithëve të shumëfishojmë përpjekjet tona me qëllim që Shteti i Kosovës të ecë përpara në misionin kombëtar të shtimit të njohjeve ndërkombëtare, forcimit demokratik institucional dhe të avancimit në axhendën e sigurt euro-atlantike.
Në këtë drejtim, Ju siguroj për mbështetjen e plotë të Kuvendit të Shqipërisë, dhe duke mirëpritur vizitën Tuaj zyrtare ditën e hënë në Tiranë, unë besoj fort se ajo do të rikonfirmojë bashkëpunimin gjithnjë e më cilësor mes Tiranës dhe Prishtinës.
Duke Ju shprehur edhe një herë urimet e mia më të sinqerta, si dhe dëshirën për paqe, zhvillim e prosperitet për të gjithë qytetarët e Kosovës, Ju lutem pranoni, i nderuar z. Veseli, ndjenjat e konsideratës time më të lartë”
, e përfundon mesazhin e tij, Kryeparlamentari Meta. /tvklan.al
