Kryeministri Edi Rama ka mbërritur në Paris nën shoqërinë e bashkëshortes së tij, në kuadër të vizitës 2-ditore në Francë me ftesë të Presidentit Emmanuel Macron.
Gjatë kësaj vizite pritet të zhvillohen takime të përqëndruara kryesisht në promovimin e potencialeve dhe klimës pozitive që Shqipëria ofron për zhvillimin e investimeve të huaja, si dhe në perspektivën e bashkëpunimit mes dy vendeve në fushën e teknologjisë dhe inovacionit.
Kreu i qeverisë përmes një postimi në Facebook e ka quajtur një moment historik në politikën tonë të jashtme, vizitën dypalëshe mes Shqipërisë dhe Francës ku u shpreh se do të hidhen hapa konkretë për forcimin e miqësisë dhe rritjen e bashkëpunimit strategjik me Francën.
“Për një tjetër moment historik në politikën tonë të jashtme, vizitën dypalëshe nesër me Ceremonial Shtetëror, e para e këtij niveli në historinë e marrëdhënieve diplomatike mes Shqipërisë dhe Francës, ku do të hedhim hapa konkretë për forcimin e miqësisë dhe rritjen e bashkëpunimit strategjik me Francën”, shkruan Rama.
Ndërkohë gjatë ditës së nesërme do të zhvillohet edhe një deklaratë e përbashkët për mediat nga Kryeministri Rama dhe Presidenti Macron si dhe pritet të nënshkruhen disa marrëveshje ndërqeveritare dhe memorandume mirëkuptimi mes vendeve./tvklan.al
