Një ditë pas humbjes me Luksemburgun, Ish-kapiteni i Kombëtares së Futbollit, Lorik Cana nuk gjen as guximin të justifikojë lojën e kuqezinjve. Duke mos e fshehur dot dëshpërimin dhe zhgënjimin, Ish-lideri i kuqezinjve iu shmang pyetjeve mbi këtë takim.
Pyetje: Si e shpjegoni humbjen e kombëtares?
Cana: Pyetje tjetër…
Pyetje: A i mungon skuadrës një lider?
Cana: Pyetje tjetër…
Pyetje: 5 humbje radhazi, si e shpjegoni?
Cana: Nuk e komentoj se është shumë vapë…
Ndërsa golashënuesi më i mirë i të gjitha kohërave, Erion Bogdani bën përgjegjës futbollistët që sipas tij duhet të luajnë si grup për të patur rezultate.
Gazetari Fatmir Mëneri në një analizë të shkurtër e përshkruan kombëtaren me notat më të errëta.
“Sishte ekip, lojtarë që luanin për hesap të vet, lojtarë që ecnin në fushë, trajner që nuk u çua një herë nga stoli.”
Sipas tij shkaqet janë disa, por më kryesorja është se skuadra nuk pranon më një drejtues.
“Ekipi nuk komandohet më, trajneri e ka mendjen me ik, ndoshta nuk ishte i mirë kualifikimi për në finalet e evropianit.”
Në ndeshjen e radhës Kombëtarja do të përballet me Izraelin, përfaqësuesja që i shkaktoi një humbje të hidhur në ‘Elbasan Arena’ në 12 nëntorin e vitit të shkuar.
/Tv Klan
