Eurodeputetët i hapën dritën jeshile fondeve për Ballkanin me IPA III
Eurodeputetët miratuan propozimin e Komisionit Evropian për dhënien e 28 miliardë eurove për Ballkanin Perëndimor. Pjesë e kësaj pakete financiare është edhe ndihma e para-anëtarësimit (IPA III), me një buxhet total prej mbi 14 miliardë euro, për periudhën 2021-2027 duke nisur nga 1 Janari 2021.
“Këto fonde synojnë financimin e vazhdueshëm të politikës së zgjerimit, duke mbështetur bashkëpunimin rajonal dhe marrëdhëniet e mira fqinjësore. Fondet e IPA III kushtëzohen me reforma të thella në vendet e rajonit për t’i sjellë ato më pranë BE-së”.
Ky plan investimesh ofron një rrugë për një integrim të suksesshëm ekonomik rajonal duke përshpejtuar përfundimisht procesin e integrimit në BE. Ky plan sipas Brukselit duhet të ndihmojë në transformimin e Ballkanit Perëndimor në një nga rajonet më tërheqëse për investime në botë.
Klan News
