Arabia Saudite ka ndryshuar drejtuesin e forcave ushtarake pas humbjeve të fundit në përballjet me rebelët Huthi.

Vendimi u mor me urdhër të mbretit Salman. Gjenerali Fahd bin Hamad Al-Salman pas këtij shkarkimi, u emërua këshilltar i ministrit të Mbrojtjes. Në vend të tij, drejtimin do ta marrë shefi i ushtrisë saudite, gjenerali Fayyad Al-Ruwaili.

Ndryshimi vjen pasi rebelët Huthi mortën nën kontroll disa zona në bregdetin e Jemenit, pranë ngushticës Bab el-Mandeb, një nga rrugët më të rëndësishme detare për transportin e mallrave dhe naftës.

Sipas burimeve ushtarake jemenase, rebelët kanë përparuar deri në zonën e Khor Omairh, rreth 100 kilometra larg qytetit të Adenit. Ata ndodhen vetëm 25 kilometra larg pozicioneve të forcave qeveritare.

Në qytet janë shtuar postblloqet dhe kontrollet e sigurisë.

Banorët shprehen të shqetësuar se sulmet mund të afrohen drejt Adenit.

Ndërkohë, përçarjet dhe mosmarrëveshjet mes forcave që mbështesin qeverinë po e vështirësojnë përballjen me rebelët Huthi, të cilët mbështeten nga Irani.

Klan News

/tvklan.al