Holanda nuk arriti ta nisë me fitore aventurën e saj në Kupën e Botës. “Tulipanët” u ndalën në një barazim 2-2 përballë Japonisë, në një ndeshje me shumë emocione dhe përmbysje.
Trajneri Ronald Koeman pranon se skuadra duhet të përmirësohet, por thekson se Holanda pati momente pozitive dhe ishte shpesh ekipi më dominues në fushë.
“Na duhet diçka më shumë. Kur nis një turne, natyrisht që dëshiron të fitosh ndeshjen e parë dhe kjo ishte e qartë, sidomos pasi ishim në avantazh dy herë. Nuk ndodhi, por kjo nuk do të thotë se mendojmë që paraqitja jonë nuk ishte e mjaftueshme. Besoj se pati shumë momente pozitive gjatë ndeshjes. Tani duhet të vazhdojmë të përmirësohemi dhe të korrigjojmë gabimet”, u shpreh trajneri i Holandës, Ronald Koeman.
Holanda pati raste të mira për ta mbyllur ndeshjen në favorin e saj, por Japonia reagoi fuqishëm dhe arriti të rikthehej dy herë në rezultat.
Për Koeman, kjo tregon se ekipi ka ende hapësirë për rritje, sidomos në menaxhimin e avantazheve dhe në ruajtjen e përqendrimit gjatë gjithë 90 minutave.
Barazimi i parë në turne nuk e ndryshon objektivin e “Tulipanëve”, të cilët kërkojnë të reagojnë në sfidat e ardhshme dhe të sigurojnë një pozicion sa më të mirë në grup.
Stafi teknik beson se skuadra ka cilësinë për të bërë më shumë, por duhet të tregojë më shumë qetësi në momentet vendimtare.
Ndeshja e radhës për Holandën do të jetë ndaj Suedisë në Houston, ndërsa Japonia do të përballet me Tunizinë në Monterrey. Të dyja sfidat do të luhen më 20 qershor dhe do të transmetohen ekskluzivisht në Televizionin Kombëtar Klan dhe Klan Plus.
Klan News
/tvklan.al












Botërori 2026 
