Kryeministri i Izraelit, Benjamin Netanyahu, ka bërë të ditur se ndodhet në gjendje shumë të mirë shëndetësore, pasi mjekët i kanë hequr një tumor të zbuluar në fazë të hershme.

Në një reagim publik në rrjetin social X, Netanyahu sqaroi se tumori u identifikua gjatë kontrolleve rutinë mjekësore, pas një ndërhyrjeje të mëparshme të suksesshme për zmadhim beninj të prostatës.

Sipas tij, trajtimi ka qenë i plotë dhe problemi është eliminuar pa lënë pasoja. Ai theksoi se bëhej fjalë për një formacion shumë të vogël, më pak se një centimetër, i zbuluar në kontrollin e fundit.

Netanyahu gjithashtu bëri të ditur se kishte kërkuar shtyrjen e publikimit të raportit të tij mjekësor, në mënyrë që informacioni të mos bëhej publik në kulmin e tensioneve dhe konfliktit mes Izraelit, SHBA-së dhe Iranit. Ai argumentoi se një publikim i hershëm mund të shfrytëzohej për propagandë kundër Izraelit.

“Pata një problem të vogël që u trajtua plotësisht. Tani është pas meje”, deklaroi ai, duke shtuar se vendosi të ndërhyjë menjëherë sapo u informua për rrezikun e mundshëm.

Ky zhvillim vjen në një moment kur Netanyahu pritet të zhvillojë një vizitë në White House në javët në vijim, ndërsa përpjekjet ndërkombëtare për arritjen e një marrëveshjeje të qëndrueshme paqeje në rajon vijojnë.

Ndërkohë, armëpushimi mes Izraelit dhe Libanit, pas përplasjeve me Hezbollah, është zgjatur edhe për tre javë.

/tvklan.al