Skuadra e Partizanit është dënuar nga Komisioni i Disiplinës për shkak të trazirave të shkaktuar në ndeshjen e luajtur dje kundër Tiranës.
Në vendimin e Disiplinës, bëhet me dije se është dënuar “FK Partizani, për dështim në përmbushjen e detyrimeve dhe përgjegjësive, në bazë të neneve 64/1, dhe 64/5 të KDS, dënohet me gjobë në masën 200.000 (dyqind mijë) lekë”.
Partizani, urdhërohet të dëmshpërblejë dëmet e shkaktuara në dhomat e zhveshjes në Stadiumin “Elbasan Arena” sipas akt konstatimit, brenda 15 ditëve.
Ndërkohë skuadra paralajmërohet se në rast të mosvendosjes së stemave në fanellat e lojës, do të jetë subjekt i masave disiplinore që parashikon Kodi i Disiplinës Sportive dhe Rregulloret e FSHF.
Po ashtu masë ndëshkuese për zyrtarin e Bylis, Veljko Dovedan, “për protestë ndaj vendimeve të zyrtarit të ndeshjes, në bazë të nenit 55/2 të KDS, dënohet me 2 (dy) ndeshje pezullim nga aktiviteti”.
Ndërkohë Bylis është ndëshkuar dhe “për dështim në përmbushjen e detyrimeve dhe përgjegjësive, në bazë të neneve 64/1, dhe 64/5 të KDS, dënohet me gjobë në masën 100.000 (njëqind mijë) lekë”./tvklan.al
