Mbrojtësi i Real Madrid, Raúl Asencio dhe tre ish-lojtarë të rinj të klubit do të dalin në gjyq në lidhje me filmimin dhe shpërndarjen e dyshuar të videove seksuale që përfshijnë dy vajzave, njëra prej të cilave ishte e mitur në atë kohë.
Sipas dokumenteve gjyqësore, tre nga të pandehurit akuzohen për “një akuzë për shpërndarje të pornografisë së fëmijëve, si dhe dy vepra kundër privatësisë”. Për secilin prej tyre është vendosur një garanci prej 20 mijë eurosh. I katërti, që kuptohet të jetë Asencio, akuzohet për dy vepra kundër privatësisë dhe ka pasur një garanci prej 15 mijë eurosh.
Siç shkruan The Guardian, vendimi për të kaluar çështjen në gjyq u shpall nga autoritetet gjyqësore të enjten. Ai pason një hetim policor dhe gjyqësor mbi rastin, i cili dyshohet se ka përfshirë dy vajza, të moshës 18 dhe 16 vjeç dhe ka ndodhur në një zonë private të një klubi plazhi në ishullin spanjoll Gran Canaria më 15 qershor 2023. Prokurorët raportohet se po kërkojnë një dënim prej dy vjet e gjashtë muaj për Asencion dhe dënime prej katër vjet e shtatë muaj për tre të tjerët, të cilët janë identifikuar në media si ish-kolegët e tij Andrés García, Ferrán Ruiz dhe Juan Rodríguez.
Një nga viktimat e dyshuara ka përfshirë të katër të pandehurit në akuzat e saj, ndërsa tjetra e ka përjashtuar Asencion nga ankesa.
Në shtator 2023, tre lojtarë të paidentifikuar të ekipit rezervë të Real Madrid u arrestuan në lidhje me incidentin e dyshuar dhe u liruan pasi të dhënat në telefonat e tyre celularë u sekuestruan.
Në deklaratat e bëra pas përfundimit të hetimit paraprak nga gjykatësi, Asencio tha se ai “nuk ka marrë kurrë pjesë në ndonjë sjellje që ka cenuar lirinë seksuale të ndonjë gruaje, e aq më pak të një të miture”. Ai tha se nuk kishte qenë i përfshirë në regjistrimin apo shpërndarjen e videove, por vetëm se i kishte “parë shkurtimisht përmbajtjen”. Lojtari, i cili dyshohet se i ka treguar një prej videove një miku, gjithashtu theksoi rëndësinë e prezumimit të pafajësisë.
Policia tha se çështja kishte nisur pas një ankese të paraqitur nga nëna e një vajze 16-vjeçare në Ishujt Kanarie, lidhur me një regjistrim të dyshuar të marrëdhënieve seksuale. Ata shtuan se, ndonëse vajza kishte deklaruar se marrëdhëniet kishin qenë konsensuale, regjistrimi ishte bërë pa pëlqimin e saj dhe ajo ishte vënë në dijeni vetëm kohët e fundit.
/tvklan.al












Botërori 2026 
