17 nëntor 2026 – Gjykata e Lartë në Beograd ka caktuar masën e paraburgimit dhe ka lëshuar fletëarrest për Millan Radoiçiçin, konfirmuan për Radion Evropa e Lirë (REL) përfaqësues të kësaj gjykate.

Fletarrestimi u lëshua pasi Radoiçiçi, i cili ka marrë përgjegjësinë për sulmin e armatosur në veri të Kosovës në vitin 2023, nuk u paraqit më 15 nëntor në stacionin policor të Savski Venacit në Beograd, siç e kishte detyrim sipas vendimit të Gjykatës së Lartë në këtë qytet.

Më herët gjatë ditës, Radio Evropa e Lirë u përpoq të kontaktonte edhe avokatin Goran Petronijeviç, i cili përfaqëson Radoiçiçin, për të marrë një koment lidhur me këtë çështje, por ai nuk iu përgjigj telefonatave dhe mesazheve.

Radoiçiçi, i cili kërkohet nga policia ndërkombëtare INTERPOL për organizimin e sulmit të armatosur në Banjskë të Kosovës, është nën hetime nga Prokuroria e Lartë Publike në Serbi.

Misioni i Kombeve të Bashkuara në Kosovë (UNMIK) ka lëshuar fletarrestimin për sulmin në Banjskë, pasi Kosova nuk është anëtare e INTERPOL-it.

Sipas Kodit të Procedurës Penale të Serbisë, fletarrestimi mund të lëshohet nëse i pandehuri është në arrati dhe ekziston një urdhër për sjelljen e tij ose një vendim për caktimin e masës së paraburgimit.

Lëshimin e fletarrestimit e urdhëron gjykata para së cilës zhvillohet procedura penale.

Më 4 tetor 2023, gjykata kishte refuzuar kërkesën e Prokurorisë për caktimin e paraburgimit ndaj Radoiçiçit. Në vend të kësaj, kishte vendosur masa që e detyronin të mos largohej pa leje nga vendbanimi, ia kishte konfiskuar pasaportën dhe i kishte ndaluar hyrjen në territorin e Kosovës.

Sipas Prokurorisë së Lartë Publike në Beograd, Radoiçiçi dyshohet për disa vepra penale që lidhen me tregtimin e paligjshëm të armëve dhe “shkaktimin e rrezikut të përgjithshëm”.

Kryeprokurori i Serbisë, Nenad Stefanoviç, duke iu përgjigjur pyetjes se pse nuk është ngritur aktakuzë për rastin e Banjskës, deklaroi më 16 nëntor se autoritetet serbe nuk kanë pranuar provat që i kanë kërkuar Kosovës përmes Misionit të Bashkimit Evropian për Sundim të Ligjit në Kosovë (EULEX).

Edhe më herët, autoritetet në Kosovë kanë refuzuar kërkesat e Serbisë për t’u dhënë informacione lidhur me sulmin në Banjskë. Sipas tyre, një bashkëpunim i tillë bie në kundërshtim me disa dispozita të Ligjit për Bashkëpunim Juridik Ndërkombëtar. Gjithashtu, sipas legjislacionit të Kosovës, vetëm organet gjyqësore të vendit kanë juridiksion për të gjykuar çështjet që pretendohet se janë kryer brenda territorit të tij.

Ndërkohë, prokurorët në Kosovë kanë ngritur akuza ndaj 45 personave për sulmin ndaj Policisë në Banjskë të Zveçanit, gjatë të cilit mbeti i vrarë një rreshter i Policisë së Kosovës.

Tre prej sulmuesve janë dënuar, ndërsa të dyshuarit e tjerë, përfshirë Radoiçiçin, ndodhen në arrati.

Në kohën e sulmit në Banjskë, Radoiçiçi ishte nënkryetar i Listës Serbe, partisë kryesore të serbëve në Kosovë, e cila deri më tani ka vepruar me mbështetjen e Partisë Përparimtare Serbe dhe ish-presidentit të Serbisë, Aleksandër Vuçiçit.

Që nga tetori i vitit 2023, Radoiçiçi ka pasur detyrimin të paraqitet në stacionin policor më datat 1 dhe 15 të çdo muaji, ndërsa pasaporta i është konfiskuar. Sipas deklarimeve të mëparshme të Gjykatës së Lartë, ai e ka respektuar këtë masë deri më tani.

Megjithatë, më 13 nëntor, në publik u shfaqën pretendime jozyrtare se Radoiçiçi ishte arratisur në Rusi.

Radoiçiçi është gjithashtu nën sanksionet e Shteteve të Bashkuara të Amerikës dhe të Mbretërisë së Bashkuar, për shkak të akuzave për krim të organizuar dhe korrupsion.

Ai u pa për herë të fundit në publik para zgjedhjeve të 25 tetorit në Serbi, kur mori pjesë në tubimin parazgjedhor të Partisë Përparimtare Serbe në Kragujevc.

Më herët, nga Serbia është larguar edhe Zvonko Vesellinoviçi, biznesmen nga veriu i Kosovës dhe deri vonë bashkëpunëtor i Radoiçiçit.

Sipas konfirmimit që REL-i mori nga burime të sigurisë në Bosnjë dhe Hercegovinë, ai udhëtoi me aeroplan nga Sarajeva drejt Turqisë më 11 nëntor, duke përdorur pasaportën serbe. Me të ishte edhe vëllai i tij, Zharko Vesellinoviçi.

Të dy, njësoj si Radoiçiçi, janë nën sanksionet amerikane për shkak të akuzave për krim të organizuar dhe korrupsion.


/tvklan.al