Ndërsa aksidentet ajrore po shfaqen shpesh në lajme, shqetësimet për sigurinë e fluturimit kanë ardhur në rritje. AirlineRatings, një faqe për vlerësimin e linjave ajrore, ka publikuar së fundmi renditjen vjetore të linjave ajrore më të sigurta në botë. Lista përfshin 25 transportuesit kryesorë bazuar në një mori faktorësh për t’u dhënë pasagjerëve më shumë besim kur fluturojnë.

Për vitin 2025, linja ajrore më e sigurt në botë është Air New Zealand për të dytin vit radhazi. Kjo linjë konkurron me fqinjin australian Qantas.

11 vendet e para në renditjen e linjave ajrore më të sigurta për vitin 2025 dominohen nga linjat ajrore të Azi-Paqësorit dhe Lindjes së Mesme. Gjithashtu, linjat ajrore europiane paraqitën mirë në renditje, duke marrë shtatë nga 25 vendet e para në listë.

Në Europë për vitin 2025 kryeson për sigurinë Turkish Airlines, që mbulon tregun midis Europës dhe Azisë. Ajo doli e 13-ta në renditjen globale, duke fituar një vlerësim me shtatë yje në platformë.

Pavarësisht se operon në më shumë destinacione se çdo linjë ajrore tjetër në botë, Turkish Airlines nuk ka pasur një aksident fatal që nga viti 2009, kur një Boeing 737 u rrëzua pranë aeroportit Schiphol të Amsterdamit. Nëntë persona vdiqën si pasojë e përplasjes, por 126 mbijetuan.

TAP Portugal zuri vendin e 14-të në renditje dhe është kompania e dytë më e sigurt ajrore në Europë. Një sërë kompanish europiane renditen në gjysmën e fundit të listës, mes tyre British Airways, Iberia dhe Grupi Lufthansa.

Të sigurta konsiderohen edhe linjat ajrore me kosto të ulët, dhe shumica kanë paraqitje të shkëlqyer në renditjen e vitit 2025. Në krye të kësaj liste është Ryanair. Në historinë e saj 40-vjeçare, kjo linjë ajrore nuk ka pasur kurrë një aksident fatal dhe deklaron se “vazhdon t’i japë përparësi sigurisë.”

Linjat ajrore vlerësohen bazuar mbi një sërë faktorësh, si mosha e avionëve, numri i avionëve që operon kompania, trajnimi i pilotëve dhe shkalla e incidenteve të raportuara.

Kompanitë e sigurta duhet të kenë kaluar auditimin e Programit Universal të Kontrollit të Mbikëqyrjes së Sigurisë dhe auditimin e Sigurisë Operacionale të IATA-s (IOSA), një standard global i industrisë për auditimin e sigurisë operacionale të linjave ajrore.

Tv Klan

/tvklan.al