Michael Olise vazhdon të tërheqë vëmendjen me paraqitjet e tij mbresëlënëse në fushë, por jashtë saj mbetet një figurë e rezervuar, larg shkëlqimit dhe ekspozimit që karakterizon shumë prej yjeve të futbollit modern.

Sulmuesi francez, emri i të cilit po përmendet gjithnjë e më shpesh në lidhje me një transferim te Real Madrid, zgjedh të qëndrojë larg vëmendjes mediatike dhe jetës luksoze që shpesh shoqëron futbollistët e elitës.

Pas fitores së Francës ndaj Senegalit në Kupën e Botës 2026, Olise u largua pothuajse pa rënë në sy nga zona e intervistave. I veshur thjesht, me tuta, kapuç dhe çantë shpine, ai konfirmoi edhe një herë profilin e tij modest dhe diskret, krejt ndryshe nga statusi i yllit që ka fituar në fushën e lojës.

Edhe trajneri i Francës, Didier Deschamps, ka vlerësuar jo vetëm nivelin e tij sportiv, por edhe mënyrën se si e përballon suksesin. Sipas tij, Olise po kalon një nga periudhat më të mira të karrierës, ndërsa mbetet plotësisht i fokusuar te futbolli.

“Michael ka zhvilluar një sezon fantastik. Ai është mes lojtarëve më të mirë në botë, por fama dhe vëmendja mediatike nuk janë ato që e motivojnë. Për të, më e rëndësishmja mbetet ajo që ndodh në fushën e lojës”, u shpreh Deschamps.

Real Madridi e monitoron nga afër

Interesimi i Real Madridit për 24-vjeçarin është i njohur, por Olise nuk ka dhënë asnjë sinjal publik për të ardhmen e tij. Ndryshe nga emra si Kylian Mbappé apo Vinícius Júnior, ai nuk kërkon të ndërtojë një imazh të madh komercial jashtë futbollit.

Legjenda franceze Thierry Henry, i cili e ka stërvitur te skuadra olimpike e Francës, e përshkroi Olisen si një person me karakter të veçantë.

“Njerëzit e shohin talentin e tij në fushë, por ndonjëherë e kanë të vështirë ta kuptojnë jashtë saj. Në realitet, ai është një djalë fantastik dhe një njeri shumë i mirë”, tha Henry.

Pa sponsorë dhe larg marketingut

Një nga veçoritë që e dallon Olisen nga shumica e futbollistëve elitarë është refuzimi i marrëveshjeve me markat sportive.

Francezi nuk ka kontratë sponsorizimi me asnjë kompani të njohur dhe preferon të zgjedhë vetë pajisjet që përdor.

Madje, ai vazhdon të luajë me modele këpucësh sportive që kanë dalë në treg më shumë se një dekadë më parë, duke shmangur trendet moderne të marketingut sportiv.

Një histori e veçantë

Olise ka një prejardhje të pasur kulturore. Ai mban shtetësi franceze, angleze, algjeriane dhe nigeriane. Megjithëse pati mundësi të përfaqësonte Anglinë, ai zgjodhi Francën, vendim ku ndikim të madh pati familja e tij dhe Federata Franceze e Futbollit.

Karriera e tij është ndërtuar tërësisht në Angli, ku kaloi në akademitë e Arsenal, Chelsea, Manchester City dhe më pas te Reading, para se të shpërthente me Crystal Palace.

Sot, pas një sezoni të shkëlqyer te Bayern Munich, Olise konsiderohet një nga futbollistët më të talentuar të gjeneratës së tij. Nëse në fushë është një “galaktik”, jashtë saj mbetet një person i thjeshtë që preferon të flasë me lojën e tij.

/tvklan.al