30 shtator 2026- Ministria për Evropën dhe Punët e Jashtme ka përshëndetur marrëveshjen për paraqitjen e një liste të përbashkët të partive dhe subjekteve politike shqiptare në zgjedhjet parlamentare të 25 tetorit 2026 në Serbi.

Në një reagim, MEPJ ka përgëzuar faktorët politikë shqiptarë në Luginën e Preshevës për përgjegjshmërinë dhe bashkëpunimin e treguar në arritjen e kësaj marrëveshjeje.

Sipas ministrisë, vendimi për një listë të përbashkët përcjell mesazhin se përfaqësimi politik i bashkuar dhe i koordinuar mund të luajë një rol të rëndësishëm në adresimin e çështjeve që lidhen me të drejtat, mirëqenien dhe të ardhmen e shqiptarëve në Luginën e Preshevës.

“Kur bashkohet zëri politik, forcohet përfaqësimi”, thuhet në reagimin e MEPJ-së, e cila thekson rëndësinë e një qëndrimi të përbashkët të faktorëve politikë shqiptarë për çështjet që prekin komunitetin.

Ministria nënvizon se Shqipëria do të vijojë të mbështesë të drejtat e shqiptarëve në Luginën e Preshevës, përfaqësimin e tyre të drejtë dhe barazinë e plotë para ligjit, si dhe zhvillimin ekonomik e shoqëror të komunitetit shqiptar.

Marrëveshja për listën e përbashkët vjen në prag të zgjedhjeve parlamentare në Serbi, ku subjektet politike shqiptare pritet të garojnë me një përfaqësim të unifikuar.

Reagimi i plotë:

Ministria për Evropën dhe Punët e Jashtme përshëndet arritjen e marrëveshjes për paraqitjen e një liste të përbashkët të partive dhe subjekteve politike shqiptare në zgjedhjet parlamentare të 25 tetorit 2026 në Serbi dhe përgëzon të gjithë faktorët politikë shqiptarë në Luginën e Preshevës për përgjegjshmërinë, pjekurinë politike dhe vizionin që dëshmuan me këtë vendim.

Ky veprim përcjell një mesazh të qartë: interesat e shqiptarëve mbrohen më mirë kur përfaqësimi i tyre politik është i bashkuar, i koordinuar dhe i vendosur. Përfaqësimi dinjitoz dhe efektiv në institucionet e vendit ku jetojnë kërkon unitet, përgjegjësi dhe një qëndrim të përbashkët për çështjet që prekin drejtpërdrejt të drejtat, mirëqenien dhe të ardhmen e shqiptarëve në Luginën e #Preshevës.

Kjo listë e përbashkët duhet të shërbejë si dëshmi se kur bashkohet zëri politik, forcohet përfaqësimi; dhe kur forcohet përfaqësimi, mbrohen më mirë interesat e qytetarëve dhe rritet pesha e tyre në proceset vendimmarrëse.

Shqipëria do të vazhdojë të mbështesë me vendosmëri të drejtat e shqiptarëve në Luginën e Preshevës, përfaqësimin e tyre të drejtë, barazinë e plotë para ligjit, si dhe zhvillimin ekonomik e shoqëror të komunitetit shqiptar.

/tvklan.al