Kreu i qeverisë, Edi Rama, ka folur këtë të hënë, 1 qershor, nga mbledhja e grupit parlamentar socialist, lidhur me ngjarjen e Zvërnecit, ku një protestues u dhunua nga punonjësi i një shoqërie private të sigurisë së kantierit.

Rama u shpreh se kupton revoltën e qytetarëve lidhur me ngjarjen, teksa shtoi se dhe ai do të vepronte njësoj si ata duke ngritur zërin kundër padrejtësive, e ndoshta dhe më keq.

"Për të gjithë ata që janë revoltuar e rreshtuar kundër meje pasi panë aktin e neveritshëm të tërheqjes zvarrë të një prej protestuesve në Zvërnec. Ju kuptoj shumë mirë, madje ju siguroj se në vendin tuaj po njësoj do revoltohesha e do rreshtohesha kundër qeverisë e ministrive. Do më dukej e tmerrshme që disa roje private sigurie, në sy të policisë së shtetit tim, pas një gardhi me tela me gjemba, të ulërinin si kafshë e të merrnin nga jashtë brenda një njeri në të drejtën e vet, ta tërhiqnin zvarrë, e pastaj të thoshte policia se i zvarrituri u fut vetë.

Do kisha bërë më keq se ju, po të më thoshin se ajo tokë është e shtetit dhe se shteti po ua fal të huajve. Madje kam vënë re se është përhapur gjithandej me shumë helm nga pas edhe legjenda se shteti po ua hap tokën izraelitëve për të sjellë palestinezë. Po të më thoshin se ajo ishte zonë e mbrojtur dhe e hoqën për t’ia falur të huajve, po të më thoshin se në vend të flamingove aty do pastroheshin paratë e zeza të mafies ndërkombëtare, e të tjera, nga ato që ju kanë thënë, e ju i keni pastaj duke i shpërndarë, janë shkruar duke ngritur një dallgë zemërimi, duke bërë thirrje për të mbrojtur atdheun në rrezik", tha Rama.

Kryeministri ishte në dilemë, pasi tha se prej dy ditësh po mendonte nëse duhet të shpjegojë me detaje “anën tjetër të medaljes”, pra argumentet dhe faktet që sipas tij nuk janë bërë të njohura për publikun. Sipas tij, projekti është në interes të vendit dhe se anulimi i tij do të ishte një dëm afatgjatë.

"E kuptoj shumë mirë tërë këtë, edhe zemërimin tuaj. Kam 2 ditë që e pyes veten: a duhet unë t’ua tregoj të vërtetën, një e nga një, anën tjetër të kësaj medaljeje? Apo mos vallë duhet të themi: më falni, gabuam, nuk e gjykuam mirë këtë punë, projekti do anulohet dhe ju të qetësoheni, të shijoni fitoren e një kauze, e cila, parë nga ana juaj, e medaljes është vërtet fisnike? E pastaj vërtet të mendoni se e mbrojtët Shqipërinë nga një e keqe e madhe, e unë të rri në karrige, të shtyj kohën e pushtetit, me shijen e hidhur të një humbjeje të madhe të Shqipërisë", u shpreh ai.

Rama: Si mund të jenë mediat greke aleatët tuaj për mjedisin? Ç’më duhet mua karrigia!

Gjatë fjalimit të tij, Rama u ndal tek zhurma e krijuar ditët e fundit në media, e sidomos në mediat greke, ku ngriti pyetjen me ironi se si munden të jenë gazetat e Greqisë aleatët e shqiptarëve në mbrojtjen e mjedisit të Shqipërisë.

Sipas tij publiku këto ditë është manipuluar.

“Nuk mund të besoj se nga ata që i thonë vetes myslimanë, që vetëm Allah e Kuran nuk kanë, sepse bëjnë çdo ditë krimin e ndaluar nga Kurani, për të helmuar njerëzit me shpifje. Po si mund të jem unë njëherë kundër jush dhe kundër vetes? Dhe si munden të jenë mediat greke aleatët tuaj të mbrojtjes së mjedisit? Imagjinojeni, pyeteni veten! Mediat greke që janë mbushur sot të gjitha me kauzën tuaj?

Thënë këto, dhe ndjesë nëse jam shumë i drejtpërdrejtë dhe mbase emocional, por kjo është ndjesia ime, sepse për mua këto janë ndjesi shumë të habitshme që më kanë bërë të mendoj t’ju përulem thellë dhe t’ju kërkoj ndjesë për të ikur në katund dhe t’ju lë me atë që do të zgjidhni vetë pastaj. Por kam zgjedhur të bëj atë që kam bërë gjithmonë, t’ju udhëheq drejt asaj Shqipërie që e dua po aq sa ju dhe po ashtu siç e doni ju.

Nuk kam premtuar që s’do të bëj gabime, por kam premtuar vetëm një gjë, që nuk do t’ju tradhtoj kurrë. Nuk është vendi këtu për t’ju shpjeguar të gjitha arsyet e këtij premtimi, por se si ju kanë manipuluar duke ju tërhequr për atdhetarinë dhe se si ju kanë kthyer në pjesë të një kurthi që i ngrihet kësaj partie dhe mua personalisht që prej ditës së parë, por që këtu, në këtë rast, është një kurth për të ardhmen e Shqipërisë. Unë kështu e shoh”, tha Rama.

Kryeministri Rama iu drejtua protestuesve që edhe ata të pyesin se përse ai duhet të dalë kundër vendit të tij.

“Po pse duhet ta bëj unë këtë? Për pushtetin? Për karrigen? Apo për baltën që e marr në fytyrë dhe që më vjen përditë mbi të gjallët e të vdekurit e shtëpisë sime prej vitesh. Nga turli lloj kundërshtarësh mediatikë e politikë, të cilët i kam duruar dhe i duroj pikërisht për këtë mision që më kanë besuar, që sot më kanë drejtuar zemëratën.

Çfarë më duhet mua karrigia e pushtetit, nëse mua më duhet të heq dorë nga vizioni që kam ndarë me ju gjithë këto vite, duke nisur nga Shqipëria e 2 milionë turistëve, kur edhe paraardhësi im numërohej si turist sa herë hynte e dilte nga vendi për shërbime? Të heq dorë nga ambicia për ta bërë Shqipërinë një vend që të mos ketë zili askënd? Për çfarë më duhet mua karrigia? Për t’ju bërë qejfin ju? Në vend të atij investimi të jashtëzakonshëm që bëhet atje, të bëhet copëtimi i radhës, Golemi i radhës?! Se ju do të rroni më shumë se unë dhe do të shikoni se aftësia e tyre dhe kurajoja për ta rikthyer Shqipërinë te Golemi është e gjallë dhe e gatshme po t’u bjerë në dorë prapë Shqipëria.

Të heq dorë nga vizioni dhe nga ambicia për ta bërë Shqipërinë një vend që nuk ka frikë të hyjë në Ligën e Kampionëve të Turizmit global dhe të rri këtu në karrige, në këtë pushtet? Një vend që nuk ka frikë të përballet me rritjen e vet. Nuk është më Shqipëria që nuk afron asnjë investitor. Është Shqipëria ku të gjithë investitorët duan të vijnë. Është Shqipëria e 2 milionë turistëve.

Që hyn në elitën e investimit global, të investitorëve që vijnë e lënë paratë këtu. Një vend që nuk ka frikë nga projekte të jashtëzakonshme si ky, ku vijnë për të investuar 4 miliardë euro. Jo si ndërtues që shesin dhe ikin, por si pronarë të terrenit, të cilin e kanë blerë me para të mbikëqyrura në mënyrë strikte nga agjencia jonë kundër pastrimit të parave dhe partnerët ndërkombëtarë që bashkëpunojnë me atë agjenci. Një më një, në bankë. Dhe jo nga Izraeli që thoni, por nga Katari!”, shtoi Rama.

Rama: Shteti ortak me investitorët, toka nuk shitet

Lidhur me projektin, kryeministri u shpreh se shteti shqiptar është ortak me investitorët në atë zonë. Deklaroi se qeveria shqiptare nuk ka tradhtuar besimin e publikut dhe se investitorët janë më të mirët në arenën ndërkombëtare.

“Ajo tokë në Zvërnec nuk shitet. Ne duam që shteti shqiptar të jetë ortak me investitorët, që janë seriozë. Kjo është qeveria që ju përfaqëson ju. Të shiturit e jepnin Shqipërinë 1 euro. Nuk ka tokë-shtet aty. Copëza që mund të jetë shtet janë krejtësisht të papërfillshme. Fillimi i projektit ka qenë në vitin 2023. Bota mbarë flet për këtë projekt, për shkak se Jared Kushner e ka promovuar këtë projekt. Investitorët janë më të mirët në arenën ndërkombëtare. Projekti i vjetër me pallate është rrëzuar nga administrata shqiptare”, tha Rama.

Në lidhje me reagimin e Ministrisë së Jashtme të Greqisë për dhunën ndaj një protestuesi grek, kryeministri po ashtu ktheu përgjigje. Deklaroi se reagimi ishte i tepruar dhe se nuk mund të ngrihet një shtet i tërë mbi dhunën ndaj një qytetari e shtoi se nuk ka asnjë lloj dhune “bazuar në etninë e një individi”.

“Rrethimi i pronës është bërë bazuar në lejen e zhvillimit, që nuk është leje ndërtimi. Rrethimi i pronës është e drejtë e pronarit, kur merr lejen e zhvillimit. Ajo që pamë ishte akt dhune, por se jam çuditur me deklaratën e Ministrisë së Jashtme greke, që tha se aty qenka një “popullsi homogjene greke”. Akt dhune ka ndaj shqiptarëve në burgjet e Greqisë. Të ngrihet shteti në këmbë dhe të nënvizojë etninë e protestuesit, kjo nuk i shërben marrëdhënieve të mira mes Shqipërisë e vendit fqinj. E drejta për të protestuar është një e drejtë që nuk vihet në diskutim”, tha kreu i qeverisë.

Rama: Nëse do vazhdoni kështu, do shkaktoni tragjedi. Të zhvillojmë turizmin elitar

Rama u shpreh se investitorët duan klimë të sigurt. Ai tha se nëse vazhdohet me protesta për investime të mëdha, atëherë do të ndodhë tragjedia e Porto of Montenegro. Sipas tij, kompania që donte të investonte në Durrës, investoi në Malin e Zi dhe tashmë shteti fqinj është më i zhvilluar dhe ka paga më të larta.

Dhe njëherë përsëriti se investitorët janë tepër seriozë dhe të standardeve tepër të larta.

“Po investohet nga Katari, një nga shtetet më të fuqishme ekonomike në botë. Power Holding është një nga kompanitë më serioze në rruzull. Investitorët kanë marrëveshje me brand-e ekskluzive, që janë në Paris, Venecia e do vijë dhe në Vlorë, nëse bashkë do u sigurojmë mirëseardhjen. Nëse do vazhdoni kështu, do vijojë tragjedia e Porto of Montenegro. Donte të bënte Portin e Durrësit dhe shkoi në Malin e Zi dhe atje ka më shumë vende pune dhe pagat janë më të larta.

Do zgjedhim që ta shohim Malin e Zi nga mbrapa apo do ecim bashkë me të tjerë drejt BE-së? Duroj dhunë edhe mbi kockat e tim eti, sepse jam këtu për ju dhe me ju. Nëse dhe ju mendoni si ata, vijoni. O do ta bëjmë Shqipërinë me atë vizion që më keni mbështetur ose doni të shkoni me Arlindo Dritëgjatin e Sazo Gurin”, tha Rama.

Shtoi se Greqia, Mali i Zi dhe vende fqinje janë zhvilluar nga turizmi elitar.

“Analistët nëpër studio flasin për mafia një e dy. Por ne duhet të konkurrojmë Malin e Zi, Greqinë, Kroacinë etj. Çfarë ka më shumë Sveti Stefan, ishuj në Greqi? Na duhet turizmi i klasit, që të na sjellë shumë para dhe jo për mua. Kjo bëhet për shqiptarët, për zhvillimin e vendit. Duhet ta inkurajojmë turizmin elitar. E vetmja gjë që lëmë mbrapa ështyë kujtimi dhe jo kartat bankare. Unë dua të lë gjëra, që të vijnë turistët këtu dhe të na kenë zili. U shqetësuan mediat greke se po dëmtohet mjedisi në Zvërnec. Pagat si do rriten më shumë? Duke pasur më shumë vende pune”, u shpreh Rama.

"Nuk po ndërtohet në Vjosë, por në zonë të kategorisë V! Laguna nuk preket"

Kreu i qeverisë theksoi se zona ku do të zhvillohet projekti nuk është zonë e mbrojtur e kategorisë së I apo të II, por e kategorisë së V-të, si peizazh i mbrojtur.

“Nuk është një zonë e mbrojtur e kategorisë së I apo të II, por klasifikohet edhe sipas IUCN-së kategori e V. Peizazh i mbrojtur! Dhe për shpalljen peizazh i mbrojtur dhe të gjitha detajet ka një vendim qeverie, por ajo që është e rëndësishme të thuhet dhe nuk u është treguar juve, në 2017, këto ligje në vendin tonë janë adoptuar në mënyrë të plotë. Dhe thelbi i ligjit tonë për zonat e mbrojtura është marrë nga standardet më të larta ndërkombëtare. Sa më pranë kategorive I dhe II aq më shumë kufizohet, ndërsa kategoritë V dhe VI janë të ndërtuara për bashkëveprimin”, tha Rama, duke shtuar se prandaj zona e kategorisë 5 nuk konceptohet si zonë pa zhvillim, por si zonë ku kanë bashkëjetuar dhe do të vazhdojnë të bashkëjetojnë natyra dhe njerëzimi. Madje shtoi se edhe në hartën e Europës ka jo pak laguna, shumë përafërsisht të ngjashme ku ka aktivitet të plotë ekonomik dhe social.

“Prandaj miqtë e mi, ne nuk kemi bërë asnjë heqje nga asgjë. Pishë-Poroja ka qenë dhe do jetë peizazh i mbrojtur!”, theksoi ai.

Rama shtoi gjithashtu se nuk po ndërtohet mbi zonën e mbrojtur të Vjosës: “Njëkohësisht peizazhi i mbrojtur Pishë-Poro-Nartë, quhej Vjosë-Nartë. Nuk po ndërtohet në Vjosë! Zona e këtij projekti nuk ka lidhje me zonën e mbrojtur të parkut kombëtar të mbrojtjes. Aty s’mund të bëhen resorte.”

Më pas ai nisi të shpjegojë dhe procesin e ndjekur nga investitorët.

“Të shkojmë pak te procesi që kanë ndjekur investitorët. U paraqitën për herë të parë në Shqipëri në 2023. Pastaj vazhduan bisedimet me shtetin për zonën dhe me privatët punët e tyre. Projekti nuk u miratua në formën e paraqitur fillimisht. Aplikimin e tyre të parë ata e kanë bërë më 10.09.2024 dhe KKT e ka rrëzuar projektin dhe ka kërkuar që të zvogëlohet intensiteti i ndërtimit dhe të sigurohet ruajtja e lagunës. Janë të shkruara këto, janë në procesverbale. Dhe gjithmonë flasim për konceptin, jo projektin e ndërtimit. Janë miratuar vetëm pasi janë plotësuar një nga një kushtet e vendosura. Në vitin 2024 nuk u miratua një projekt arkitektonik dhe sot që flasim nuk ka një projekt arkitektonik të miratuar! Nuk ekziston!”, tha Rama.

Ai shtoi se 5 studiot ndërkombëtare më të mira në botë janë angazhuar për të bërë studimin mjedisor.

“Nuk e kemi të paraqitur akoma studimin mjedisor! E kuptoni ju apo jo?! Kompania që ka marrë përsipër të bëjë gardhin do paguajë një gjobë të madhe, ndërsa kompania tjetër për dhunën nuk do punojë më në Republikën e Shqipërisë. E keni parë që kanë ardhur investitorët. Nuk kanë ardhur për pushime apo për fotografi, por me të gjithë grupin e arkitektëve dhe inxhinierëve dhe kanë bërë gjysmë dite dëgjesë me profesorë të historisë e gjeologjisë të Shqipërisë, të cilët janë gjallë, dhe kanë folur për të gjitha këto aspekte, dhe grupi i tyre ka dëgjuar dhe ka mbajtur shënime.

Në mars 2026 është paraqitur një projekt krejt tjetër, i rikonceptuar, me një qasje krejt tjetër projektuese e zhvillimore, dhe KKT nuk e ka miratuar të gjithin siç e kanë paraqitur dhe kanë vendosur kushte përsëri dhe kufizime konkrete për vijimin e projektit”, shtoi kryeministri, sipas të cilit të gjitha çfarë tha sot janë të shkruara.

Projekti do të zhvillohet vetëm në pronë private, të pakontestuar dhe në asnjë copë toke tjetër shtetërore. Ai zbuloi se projektet e mëparshme madje kishin të konceptuar edhe ndërtimin e një marine, gjë që ishte hedhur poshtë.

“Është e shkruar. Laguna është e mbrojtur. S’mund të ketë marinë! Kishte marinë në versionin e parë dhe të dytë. U hoq! Dhe për marinën është kërkuar të hartohet më pas një raport i detajuar dhe vetëm pasi të jetë parë projekti tjetër në tërësi. Nuk po ju them që investitorët thonë se nuk e kanë pritur kurrë që në Shqipëri shteti të jetë kaq rigoroz, edhe pse ata më kryesorët në SHBA më kanë thënë çdo gjë sipas librit të ligjit. Nuk kemi ardhur të importojmë barsoleta e filma për veten se boll kemi, por të bëjmë një investim për Shqipërinë, për ne dhe për Europën. Përcaktimi i brezit mbrojtës, flas për vendimin, projekti duhet të konsiderojë e respektojë një brez mbrojtës nga vija bregdetare e lagunës, pas koordinimit me autoritetet përgjegjëse”, tha Rama.

Kryeministri shtoi gjithashtu se distanca me habitatin është e mbrojtur.

Incidenti në Zvërnec

Prej disa ditësh, qytetarë dhe aktivistë të shumtë janë përfshirë në protesta, të cilët kundërshtojnë ndërhyrjen në zonën pranë lagunës së Nartës, duke paralajmëruar pasoja të mundshme mjedisore.

Protesta janë mbajtur si në Zvërnec, pranë zonës së projektit, por gjithashtu dhe në kryeqytet (më 31 maj, teksa është paralajmëruar edhe për këtë të hënë, 1 qershor, një marshim i radhës).

Në zonë parashikohet ndërtimi i një kompleksi të madh turistik, me investime që kapin vlera miliardëshe.

Në reagimet e mëparshme, kryeministri ka theksuar se bëhet fjalë për një pronë private prej rreth 300 hektarësh, e se investitorët kanë siguruar tokën përmes marrëveshjeve me pronarë privatë dhe jo nga shteti shqiptar.

Gjithashtu, ditën e sotme, 1 qershor, u është hequr licenca dy kompanive private të sigurisë, punonjësit e të cilave u filmuan duke dhunuar protestuesit që po kundërshtonin paqësisht kundër punimeve në zonë.

Nga hetimet, për vlerësimin e zbatimit të përgjegjësive ligjore nga subjektet private, rezultoi se të dyja subjektet janë konstatuar në shkelje.

Shkeljet e konstatuara nga Policia:

-Subjekti ShPSF “Myrto Security 1.3A” nuk kishte marrë masat për sigurinë e objektit dhe nuk kishte zbatuar rregullat për regjimin e hyrjes dhe daljes së personave dhe mjeteve në objekt. Nga ana e këtij subjekti nuk administrohej lista e personave dhe mjeteve që lejoheshin të hynin në objekt. Për shkak të mospërmbushjes së këtyre kritereve, më datë 30.05.2026, janë lejuar të hyjnë në brendësi të rrethimit, persona të paidentifikuar dhe të panjohur nga personeli i shërbimit. Këta persona, gjatë tubimit, kanë ndërhyrë pa patur asnjë atribut ligjor dhe kanë goditur e tërhequr me forcë një shtetas pjesëmarrës në protestë, duke i shkaktuar lëndime trupore. Gjithashtu, kanë reaguar kundër protestuesve me gurë dhe sende të tjera nga rrethimi i pronës.

-Ndaj këtyre shtetasve që kryen veprimet e dhunshme, punonjësit e ShPSF “Myrto Security 1.3A” nuk kanë kryer asnjë veprim parandalues apo për largimin e tyre. Ndërsa punonjësi i licencuar i subjektit ShPSF “Major Security”, së bashku me dy persona të tjerë, të cilët u proceduan penalisht, dhe nga verifikimet rezultoi se dy të proceduarit nuk figuronin të regjistruar apo të licencuar nga subjekti SHPSF “Major Security”, kryen veprime arbitrare duke shpërdoruar detyrën dhe në tejkalim të kompetencave, pasi goditi me grusht një prej protestuesve, e morën me forcë dhe e çuan në brendësi të rrethimit duke i shkaktuar dëmtime trupore.

Cilësimet

Modaliteti i dritës

Madhësia e shkronjave

Aksesueshmëria

Redukto lëvizjet

Font i lexueshëm

Hapësira mes rreshtave

Thekso lidhjet

Rama në 35-vjetorin e PS-së: Ndërtojmë Shqipërinë, duke mos dëmtuar natyrën

'Zvërneci', Rama i prerë: Sa kohë jam unë këtu, projekti nuk ndalet!

"S'keni turp", Rama: Shqipëria s’merr leksione nga regjimi iranian

"Zvërneci", Rama: Nuk po ndërtohet në Vjosë, por në zonë të kategorisë V! Laguna nuk preket