Zyrtarë të lartë nga Shtetet e Bashkuara dhe Kina kanë zhvilluar bisedime në Nju Jork për të krijuar një “mekanizëm të ri njoftimi” në lidhje me incidentet e inteligjencës artificiale që mund të cenojnë sigurinë kombëtare.

Lajmi u bë i ditur nga Sekretari amerikan i Thesarit, Scott Bessent, pas takimit me Zëvendëskryeministrin kinez He Lifeng, të cilin e cilësoi si mjaft të suksesshëm. Ky zhvillim vjen në një moment kyç, teksa Presidenti amerikan Donald Trump dhe homologu i tij kinez Xi Jinping përgatiten për të mbajtur një samit zyrtar në Uashington më vonë këtë javë.

Përpjekjet për transparencë mes dy fuqive më të mëdha të IA-së në botë vijnë pas rritjes së presioneve dhe paralajmërimeve nga kërkuesit dhe figurat më me emër të industrisë teknologjike, të cilët kanë kërkuar më shumë kujdes ndaj rreziqeve potenciale që kjo teknologji bart për njerëzimin.

Bessent theksoi se kalimi nga opaziteti drejt një transparence më të madhe është i domosdoshëm për çdo aktivitet ndërkufitar. Krahas inteligjencës artificiale, në takim u diskutua edhe për funksionalizimin e një procesi për uljen e mundshme të tarifave tregtare, ndërsa armëpushimi i luftës tarifore mes dy vendeve skadon më 10 nëntor.

Nga ana tjetër, agjencia shtetërore kineze e lajmeve Xinhua konfirmoi se të dyja palët patën shkëmbime të sinqerta dhe konstruktive mbi çështjet kryesore ekonomike. Megjithëse Uashingtoni është përballur me thirrje për të ngadalësuar ritmin e zhvillimit të IA-së, Presidenti Trump i ka hedhur poshtë këto shqetësime, duke deklaruar se SHBA-të nuk mund të humbasë avantazhin ndaj Kinës dhe se “kushdo që fiton në IA, fiton gjithçka”.

Bashkëpunimi për teknologjinë mbetet një pikë e nxehtë që pas takimit të tyre të mëparshëm në Pekin, ku palët ranë dakord për lehtësime tarifore në shkëmbim të blerjeve të mallrave bujqësore dhe avionëve amerikanë nga Kina.

/tvklan.al