Vullkani aktiv Anak Krakatoa ka shpërthyer në Indonezi, duke shkaktuar pezullimin e përkohshëm të fluturimeve në aeroportin ndërkombëtar Soekarno-Hatta pranë Xhakartës.

Shpërthimi nisi të shtunën dhe vullkani nxori lavë, ndërsa banorë në disa zona të vendit raportuan zhurma të forta dhe lëkundje. Autoritetet pezulluan operacionet në aeroport rreth orëve të para të mëngjesit të së dielës, pasi hiri vullkanik u zbulua në hapësirën ajrore pranë aeroportit.

Sipas Ministrisë së Transportit të Indonezisë, analizat e fundit konfirmuan praninë dhe përhapjen e hirit vullkanik në zonën e aeroportit. Për këtë arsye, mbyllja e aeroportit u zgjat deri në orën 09:30 të së dielës.

Pezullimi preku më shumë se 22 mijë pasagjerë, ndërsa u prekën gjithsej 209 fluturime. Ndikimi ishte veçanërisht i madh në fluturimet drejt dhe nga Singapori. Probleme pati edhe në linjat ajrore drejt destinacioneve si Doha, Sydney dhe Kuala Lumpur. Autoritetet e aeroportit njoftuan gjithashtu anulimin e të paktën 16 fluturimeve të brendshme drejt Balit.

Anak Krakatoa ndodhet në ngushticën Sunda, mes ishujve Java dhe Sumatra. Vullkani u formua pas shpërthimit të madh të Krakatoas në vitin 1883 dhe mbetet një nga vullkanet aktive të Indonezisë. Autoritetet po monitorojnë situatën dhe lëvizjen e hirit vullkanik për të vlerësuar nëse fluturimet mund të vijojnë normalisht.

/tvklan.al