Presidenti i Shteteve të Bashkuara, Donald Trump, ka ashpërsuar tonin ndaj prodhuesit kanadez të avionëve Bombardier, duke kërcënuar kompaninë me përjashtim nga tregu amerikan nëse ajo nuk zhvendos prodhimin në SHBA.
Përmes një postimi në platformën e tij Truth Social, Trump u shpreh kategorikisht se “nuk ka më shitje të Bombardier në Shtetet e Bashkuara”.
Krahas kërcënimit për ndalimin e shitjeve, presidenti amerikan vuri në pikëpyetje edhe cilësinë e produkteve të kompanisë. Ai pretendoi se Bombardier përfiton ndjeshëm nga tregu amerikan, duke iu referuar blerësve, kompanive, aeroporteve dhe shërbimeve në SHBA.
“Nëse duan tregun tonë, duhet të prodhojnë këtu dhe të ndalojnë së trajtuari Amerikën si një ‘bankomat’”, shkroi Trump, transmeton Telegrafi.
Ky nuk është kërcënimi i parë i Trumpit ndaj kompanisë kanadeze. Në janar, ai kishte paralajmëruar vendosjen e tarifave deri në 50% për avionët Bombardier të shitur në tregun amerikan, ndërsa kishte përmendur edhe mundësinë e heqjes së certifikimit për avionët e kompanisë.
Në atë rast, përplasja ishte e lidhur me një mosmarrëveshje tjetër mes Uashingtonit dhe Otavës, që kishte të bënte me certifikimin e avionëve amerikanë Gulfstream në Kanada.
Kërcënimi i fundit ndaj Bombardier vjen në një periudhë kur tensionet tregtare mes Shteteve të Bashkuara dhe Kanadasë janë përshkallëzuar.
Bisedimet mes dy vendeve për një marrëveshje që do të shmangte vendosjen e tarifave të larta dështuan muajin e kaluar. Pas këtij zhvillimi, Uashingtoni dhe Otava fajësuan njëri-tjetrin për ndryshime të bëra në minutën e fundit në marrëveshjen e propozuar.
Si pasojë e dështimit të negociatave, SHBA vendosi në fund të gushtit tarifa prej 50% ndaj mallrave kanadeze me një vlerë prej rreth 28 miliardë dollarësh kanadezë.
Në përgjigje, Kanadaja përgatiti tarifa hakmarrëse ndaj produkteve amerikane me vlerë rreth 27.6 miliardë dollarë kanadezë.
Masat e ndërmarra nga SHBA prekin një gamë të gjerë produktesh, duke përfshirë shkopinjtë e hokejit, verën dhe çimenton.
Nga ana tjetër, tarifat kanadeze janë orientuar drejt sektorëve si çeliku dhe alumini, pajisjet elektroshtëpiake, produktet e qumështit, makineritë bujqësore, plastika, letra dhe elektronika.
Bombardier u themelua në vitin 1942 nga Joseph-Armand Bombardier dhe fillimisht u bë e njohur për prodhimin e mjeteve për dëborë. Kompania hyri në industrinë e hapësirës ajrore në vitin 1986, pas blerjes së Canadair.
Sot, Bombardier renditet ndër emrat e njohur të industrisë së avionëve privatë dhe të biznesit, veçanërisht falë familjes së avionëve Challenger.
Kërcënimi i fundit i Trumpit ndaj kompanisë tregon se konflikti tregtar mes SHBA-së dhe Kanadasë po shtrihet përtej mallrave tradicionale, duke prekur edhe një sektor strategjik siç është industria e aviacionit.
Nëse kërcënimi i presidentit amerikan do të konkretizohej me masa të reja, pasojat pritet të jenë të rëndësishme jo vetëm për Bombardier, por edhe për marrëdhëniet ekonomike mes dy prej partnerëve më të mëdhenj tregtarë në Amerikën e Veriut.
/tvklan.al












Botërori 2026 
