Ushtria izraelite ka kryer një valë të re sulmesh ndaj Iranit gjatë natës, nga ku ka konfirmuar vrasjen e komandantit të forcës paraushtarake Basij, Gholamreza Soleimani.

Soleimani së bashku me zyrtarë të tjerë u goditën ndërsa ndodheshin në një kamp me tenda që u ngrit së fundmi nga Basij pas bombardimit të selive të forcës paraushtarake.

IDF ka konfirmuar gjithashtu shënjestrimin e zyrtarit të lartë iranian Ali Larijani në Teheran. Nuk është e qartë nëse sekretari i këshillit të sigurisë është vrarë apo i ka shpëtuar sulmit, por ministri i Mbrojtjes i Izraelit, Katz, konfirmoi se ai është eliminuar.

Ndërkohë gjatë natës, Irani ka vijuar sulmet ndaj vendeve të tjera të rajonit.
Ambasada amerikane në Bagdad u shënjestrua nga dronë dhe raketa në sulmin më intensiv që nga nisja e konfliktit.

Pamjet treguan përplasjet në ajër dhe mbetjet që u rrëzuan brenda zonës së gjelbër ku ndodhen ambasadat e huaja, duke shkaktuar zjarr.

Në një sulm të ndarë, në kryeqytetin e Irakut u vranë katër persona, dy prej të cilëve janë raportuar si këshilltarë iranianë.

Në Abu Dabi në Emiratet e Bashkuara Arabe, një person raportohet se ka mbetur i vdekur nga mbetjet e sulmeve ajrore iraniane.

Ministria e Mbrojtjes e Arabisë Saudite dhe Katari njoftuan këtë të martë për kapjen në ajër të dhjetëra raketave dhe dronëve, por pa persona të lënduar.
Njëkohësisht Izraeli ka zgjeruar fushatën ushtarake nga ajri dhe nga toka në Libanin Jugor.

Në javën e tretë të saj dhe pa asnjë fund në horizont, lufta SHBA-Izrael kundër Iranit ka prodhuar të paktën 2,000 viktima.

Ngushtica e Hormuzit mbetet kryesisht e mbyllur, me aleatët e SHBA-së që e refuzojnë kërkesën e Trump për të ndihmuar në hapjen e rrugës ujore kritike, duke rritur çmimet e energjisë dhe duke shtuar frikën nga inflacioni.

Tv Klan

/tvklan.al