Irani aktualisht nuk po planifikon të marrë pjesë në bisedime me Shtetet e Bashkuara të Amerikës, tha një zëdhënës i qeverisë, pasi Presidenti Trump dërgoi negociatorë amerikanë në Pakistan për të marrë pjesë në bisedime të hënën, vetëm disa ditë para se të skadonte një armëpushim midis Iranit dhe SHBA-së, shkruan CBS.

Bllokada e vazhdueshme amerikane e porteve iraniane ka qenë një pikë e rëndësishme ngërçi, një çështje e komplikuar edhe më tej pasi një anije ushtarake amerikane të dielën qëlloi dhe sekuestroi një anije iraniane që u përpoq t’i shmangej asaj.

Teherani tha se do të hakmerrej, me agjencinë shtetërore të lajmeve Tasnim që raportoi se Irani kishte dërguar dronë në drejtim të anijeve ushtarake amerikane pasi anija e tij u kap.

Zëdhënësi i Ministrisë së Jashtme të Iranit, Esmaeil Baqaei, tha në një konferencë javore për shtyp të hënën se, “Deri tani … nuk kemi plane për raundin tjetër të negociatave dhe nuk është marrë asnjë vendim në këtë drejtim”.

Transmetuesi shtetëror IRIB të dielën citoi burime iraniane të kenë thënë se “aktualisht nuk ka plane për të marrë pjesë në raundin tjetër të bisedimeve Iran-SHBA”.

Agjencia shtetërore e lajmeve IRNA vuri në dukje bllokadën dhe “kërkesat e paarsyeshme dhe jorealiste” të Uashingtonit, duke thënë se “në këto rrethana, nuk ka perspektivë të qartë për negociata të frytshme”.

“Ne po ofrojmë një MARRËVESHJE shumë të drejtë dhe të arsyeshme dhe shpresoj që ata ta pranojnë atë”, paralajmëroi presidenti Trump në një postim në rrjetet sociale të dielën, ndërsa përsëriti kërcënimin e tij për të urdhëruar sulme për të shkatërruar të gjitha termocentralet dhe urat e Iranit nëse nuk arrihet një marrëveshje.

/tvklan.al