Spanja ka nisur evakuimin e pasagjerëve nga anija turistike e prekur nga hantavirusi, e cila është ankoruar pranë Tenerife-s në Ishujt Kanarie.

Ministrja e Shëndetësisë, Mónica García, tha se operacioni po “zhvillohet normalisht” dhe se të gjithë pasagjerët në bordin e MS Hondius nuk shfaqin ende simptoma.

Pasagjerët do të ndahen në grupe sipas kombësisë dhe do të transportohen drejt bregut me varka të vogla. Ndërkohë, në aeroportin lokal janë vendosur avionë çarter, të gatshëm për t’i riatdhesuar ata në vendet e tyre.

Sipas planit, 14 shtetas spanjollë do të zbresin të parët, më pas do të evakuohen pasagjerët e transportuar nga Holanda, përfshirë shtetas holandezë, grekë dhe gjermanë, si dhe një pjesë e ekuipazhit.

Fluturime të tjera janë planifikuar më pas, përfshirë drejt Mbretërisë së Bashkuar dhe SHBA-ve. Fluturimi i fundit i evakuimit pritet të niset të hënën drejt Australisë.

Me një lente të gjatë kamerash, pasagjerët janë parë duke lëvizur në kuvertën e anijes ose pranë dritareve, të gjithë me maska mjekësore të bardha, gjatë fazës së parë të evakuimit.

Disa prej tyre janë ulur me distancë në varkat e vogla të evakuimit, duke filmuar dhe fotografuar afrimin drejt tokës, ku janë pritur nga zyrtarë të veshur me kostume mbrojtëse të bardha.

Anija Hondius është futur në portin e Granadiljas para agimit të së dielës, rreth një muaj pas vdekjes së pasagjerit të parë në bord.

Masat e marra më herët

Masat e sigurisë në port, një zonë industriale në jug të Tenerife-s, u shtuan ndjeshëm të shtunën. Policia ushtarake spanjolle dhe ekipet e reagimit ndaj fatkeqësive kanë ngritur çadra të mëdha pritjeje dhe hyrja në zonën bregdetare është kufizuar.

Pasi Hondius u pozicionua në port, rreth orës 07:00 të mëngjesit të së dielës, ekipet mjekësore pritej të hipnin në bord për të kontrolluar të gjithë personat për shenja të virusit. Raportet e fundit thonë se askush tjetër nuk po shfaq simptoma.

Më herët të shtunën, ministri i Brendshëm deklaroi se Mbretëria e Bashkuar, SHBA-të dhe disa vende anëtare të Bashkimit Evropian po dërgonin avionë. Gjithashtu janë në gatishmëri edhe avionë të pajisur mjekësisht, në rast se dikush duhet të izolohet. Shtetasit spanjollë do të dërgohen me avion në Madrid, ku do të përballen me karantinë të detyrueshme në spitalin ushtarak Gomez Ulla. Izolimi i plotë mund të jetë shumë i vështirë, pasi virusi ka një periudhë inkubacioni deri në nëntë javë dhe ende nuk është e qartë sa do të zgjasë karantina për personat në Spanjë apo gjetkë.

Drejtori i Organizatës Botërore të Shëndetësisë (OBSH), Tedros Adhanom Ghebreyesus, i cili ndodhet në Tenerife për të mbikëqyrur zbarkimin, ka vlerësuar autoritetet për “reagimin e fortë dhe efektiv” ndaj këtij shpërthimi.

Shpërthimi është lidhur me një zonë grumbullimi mbetjesh në skajin jugor të Argjentinës, e njohur për vëzhguesit e shpendëve. Virusi bartet nga brejtësit dhe rrallë transmetohet mes njerëzve, por tre pasagjerë të anijes turistike kanë humbur jetën.

Prandaj kreu i OBSH-së u ka kërkuar spanjollëve të shqetësuar t’u besojnë autoriteteve që po menaxhojnë evakuimin.

“Shqetësimi juaj është i ligjshëm, për shkak të përvojës me Covid-in: ajo traumë është ende në mendjet tona”, pranoi ai. Por shtoi se rreziku për përhapje më të gjerë është i ulët “për shkak të mënyrës se si funksionon virusi dhe për shkak të mënyrës se si qeveria spanjolle është përgatitur për të shmangur çdo problem”.

Dhjetëra specialistë të terapisë intensive janë në gatishmëri në spitalin Candelaria në Tenerife, në rast se dikush nga Hondius sëmuret rëndë gjatë transferimit. Një njësi e izolimit të rreptë ka një shtrat plotësisht të pajisur për trajtimin e sëmundjeve infektive, me pajisje testimi dhe respirator.

“Jemi absolutisht gati”, tha shefja e terapisë intensive, Mar Martin, në repartin ku kostume mbrojtëse, maska dhe doreza janë grumbulluar për stafin.

“Nuk e kemi parë kurrë më parë hantavirusin, por është një virus me disa komplikacione, si ato që menaxhojmë çdo ditë. Jemi plotësisht të trajnuar për këtë.”

Këtu pati zemërim kur njerëzit mësuan se Hondius po devijohej drejt ishullit të tyre.

Të premten, një grup punëtorësh portualë u mblodhën jashtë parlamentit lokal në protestë të zhurmshme, të shqetësuar se masat e sigurisë nuk ishin mjaftueshëm të forta.

Shumë vonë mbrëmë, të gjitha planet e hartuara me kujdes u tronditën përkohësisht kur presidenti i Ishujve Kanarie, Fernando Clavijo, deklaroi se do të refuzonte lejimin e anijes në port, pasi zbarkimi nuk mund të kryhej brenda një dite.

Disa vende ende nuk kanë dërguar avionë evakuimi. Qeverisë qendrore në Madrid iu desh të ndërhynte.

Më pas, Clavijo deklaroi në televizion se një mi që mbante hantavirusin mund “të zbriste nga anija në mes të natës dhe të rrezikonte banorët e Ishujve Kanarie”. Sekretarja e Shëndetësisë u detyrua të deklaronte se një skenar i tillë “nuk përbën rrezik”.

“Virusi është i rrezikshëm, sigurisht. Por thonë se duhet të kesh kontakt shumë të afërt për t’u infektuar”, tha Jennifer, ndërsa shëtiste me fëmijën e saj në kryeqytetin e Tenerife-s, Santa Cruz.

“Nëse jemi të kujdesshëm, shpresojmë të mos jetë shumë serioze.”

Të tjerë ishin të zemëruar që Madridi kishte vendosur ta dërgonte Hondius këtu, një shqetësim politik më shumë sesa mjekësor.

Disa kujtuan se edhe gjatë Covid-it autoritetet kishin dhënë fillimisht mesazhe qetësuese, para se pandemia të përhapej.

Megjithatë, nuk ka ndjenjë paniku këtu.

“Nëse ata nuk dalin nga anija këtu, atëherë jemi mirë”, tha Esteban. “Nëse masat janë të përshtatshme, nuk mendoj se njerëzit këtu janë të shqetësuar”, shtoi partnerja e tij, Isabel.

Jo të gjithë do të zbresin në Tenerife nga Hondius, rreth 30 anëtarë të ekuipazhit do të qëndrojnë në bord për ta kthyer anijen turistike në Holandë. Por për shumicën, më në fund duket se po afrohet fundi i javëve të frikës dhe pasigurisë në det.

Tani fillojnë javët e gjata të karantinës.

/tvklan.al