Cristiano Ronaldo hodhi një tjetër hap të madh drejt objektivit të 1000 golave në karrierë.

Sulmuesi portugez realizoi një tregolësh në fitoren 5-3 të Al Nassr përballë Al Kholood, duke e çuar në 985 numrin e golave të shënuar gjatë karrierës së tij profesionale dhe ndërkombëtare.

Ronaldo ishte protagonisti kryesor, duke realizuar të tre golat e tij në pjesën e dytë të takimit, teksa në të parën iu anuluan dy gola.

Me rezultatin 2-2, 41-vjeçari mori përdore skuadrën dhe bëri diferencën në fushën e lojës.

Goli i parë erdhi në minutën e 66-të me këmbën e majtë. Vetëm pesë minuta më vonë, Ronaldo realizoi sërish, këtë herë me kokë.

Pak minuta më pas, Ronaldo shënoi golin e tretë, teksa goditi saktë me këmbën e djathtë, duke kompletuar një tregolësh perfekt, një gol me të majtën, një me kokë dhe një me të djathtën.

Në këtë mënyrë, ylli portugez arriti në kuotën e 985 golave në karrierë, duke qenë vetëm 15 gola larg objektivit të madh, shifrës historike prej 1,000 golash.

/tvklan.al