Pas konfliktit midis Sekretarit të Përgjithshëm të Partisë Demokratike, Flamur Noka dhe një qytetari, kreu i Komisionit Qendror të Zgjedhjeve ka marrë një vendim.

Në mënyrë të menjëhershme, u është hequr akreditimi i të gjithë vëzhguesve për KZAZ-në nr. 27 në Bashkinë Vorë. Përjashtim bëjnë vëzhguesit ndërkombëtarë dhe mediat.

“Në mbështetje të neneve 6, 7, 19, pikat 1, shkronja “n”, dhe 2, të ligjit nr. 10019, datë 29.12.2008, “Kodi Zgjedhor i Republikës së Shqipërisë”, të ndryshuar dhe Vendimit nr. 23 date 1.2.2023, “Për procedurat dhe kriteret e akreditimit të vëzhguesve të subjekteve zgjedhore në komisionet e zonave të administrimit zgjedhor, komisionet e qendrave të votimit dhe vendet e numërimit të votave, në zgjedhje”,

VENDOS:

  1. Revokimin e akreditimit të të gjithë vëzhguesve, për KZAZ-në nr. 27, Bashkia Vorë, Qarku Tiranë, të lëshuara për KZAZ-në, KQV-të dhe VNV-të, përveç vëzhguesve ndërkombëtar dhe mediave.
  2. Ky vendim hyn në fuqi menjëherë dhe publikohet në faqen zyrtare të internetit të Komisionit Qendror të Zgjedhjeve.
  3. Kundër këtij vendimi mund të bëhet ankim në Komisionin e Ankimimeve dhe Sanksioneve brenda 3 (tre) ditëve nga shpallja e tij”, shpreh njoftimi i KQZ-së.

Gazetarja Klesiana Omeri raporton në lidhje të drejtpërdrejtë për Klan News se është verifikuar që disa prej vëzhguesve në këtë bashki kishin akreditime false, ose paraqiteshin si vëzhgues me badge-in e dikujt tjetër.

“Vëzhguesve të partive politike u revokohet pikërisht akreditimi për KZAZ në Bashkinë Vorë dhe për të gjitha qendrat e votimit dhe numërimit, pasi ka rezultuar se në disa prej tyre ka qenë i falsifikuar. Disa prej tyre kanë falsifikuar ose kanë përdorur të personave të tjerë, duke u prezantuar si vëzhgues me një akreditim që nuk ka qenë i tyre. Për këtë arsye, KQZ, ka bërë verifikimet përkatëse dhe rezulton se disa prej tyre i kanë pasur të falsifikuara ose të personave të tjerë dhe u është hequr të gjithëve përveç vëzhguesve ndërkombëtarë. Vetëm për Bashkinë e Vorës, nuk bëhet fjalë për bashkitë e tjera”, raportoi gazetarja.  

Kujtojmë se Noka, i shoqëruar nga demokratja Albana Vokshi u shprehën me tone të ashpra, teksa sekretari i PD u shpreh ndaj votuesit “do të të zvarris”. Ndërkohë në video dëgjohet gjithashtu që qytetari i kërkon Nokës që të pranojë humbjen.

/tvklan.al