Në këtë artikull, Corriere della Sera trajton situatën e tensionuar në Iran, ku rrugët e kryeqytetit dhe qyteteve të tjera mund të mbushen sërish me protesta masive.

Në sallat e pushtetit të Republikës Islamike të Iranit ndihet frikë dhe tension nga mundësia që rrugët të mbushen sërish me protestues, siç ndodhi në dhjetor dhe janar. Sapo shohin shenja pakënaqësie, pasdaranët, Gardianët e Revolucionit, paralajmërojnë me zë të lartë: Mos e provoni!

Sot ata kanë dërguar një paralajmërim të ri: opozitarët dhe protestuesit mund të përballen me një goditje edhe më të fortë se ajo e 8 janarit, duke pranuar masakrën e dy muajve më parë dhe duke kërcënuar më keq nëse dikush guxon të dalë sërish në rrugë. Sipas njoftimit të lexuar në televizionin shtetëror, “armiku që ka dështuar në betejë dëshiron të mbjellë terror dhe kryengritje”.

Protestuesit paqësorë, të cilët qeveria i quan “elementë neo-ISIS”, paralajmërohen për një përballje shumë më të ashpër. Para dy muajsh, pasdaranët dhe milicitë Basij, të armatosur për luftë, vranë mijëra njerëz që brohorisnin “Vdekje diktatorit”.

Një larje gjaku që Teherani e quan “rend”, ndërsa iranianët e quajnë revolucion.

Një student nga Teherani, Ali, shkruan:

Nuk kemi frikë prej tyre, por nuk mund të dalim në rrugë për shkak të bombardimeve, është shumë e rrezikshme. Por do të kthehemi, ne do të jemi fronti tjetër i luftës.

Tensionet rriten edhe nga sulmet e ushtrisë izraelite ndaj checkpoint-eve të Basij dhe pasdaranëve në Teheran dhe qytete të tjera. Sipas raportimeve, mikro-dronët dhe UAV-të izraelite (dronë ushtarakë të telekomanduar) synojnë checkpoint-et e IRGC-së, Basij dhe policisë, duke u përpjekur të godasin forcat që ushtruan terror në rrugë dhe të mbështesin qytetarët që duan rrëzimin e ayatollahëve.

Ushtria izraelite konfirmoi se ka shkatërruar disa checkpoint-e të Basij, veçanërisht në Teheran, por edhe në Karaj, Isfahan dhe Shiraz. Basij janë milicia e armatosur e diktaturës, që shtyp demonstratat duke qëlluar pa hezitim kundërshtarët. Aeronautika izraelite, e udhëhequr nga inteligjenca, ka goditur checkpoint-et dhe militantët me dronë të telekomanduar.

Dronët funksionojnë kështu: një platformë ajrore shërben si bazë, lëshon pajisje të pajisura me inteligjencë artificiale dhe objektiva të paracaktuar, duke identifikuar dhe goditur target-et me njohje fytyre.

Checkpoint-et strategjikë të goditur në Teheran përfshijnë: Distriktin 14 pranë autostradës Mahallati, Distriktin 15 pranë stacionit të shërbimit Hashemabad, Distriktin 16 në Fadaiyan-e Islam Street dhe Distriktin 1 në fund të Bulevardit Artesh.

Republika Islamike pranon se të paktën 10 anëtarë të IRGC-së janë vrarë në këto “sulme terroriste”.

/tvklan.al