Ushtria izraelite ka shënjestruar shefin e sigurisë së Iranit, Ali Larijani. Të paktën kështu raporton Reuters këtë të martë, më 17 mars, duke iu referuar katër zyrtarëve izraelitë, ndërsa shtohet se nuk dihet ende nëse ai ishte vrarë apo plagosur.

Larijani ishte një nga objektivat e sulmeve të kryera nga ushtria izraelite mbrëmjen e kaluar në mbarë Iranin. Por Irani ende nuk ka komentuar mbi këtë raport.

Nëse vdekja e tij konfirmohet, ai do të ishte zyrtari më i lartë iranian i vrarë pas Udhëheqësit Suprem Ajatollah Ali Khamenei, i cili vdiq në ditën e parë të luftës.

Larijani, një ish-negociator bërthamor dhe aleat i ngushtë i Khamenei-t, u pa në Teheran të premten ndërsa merrte pjesë në tubimet e Ditës së Kudsit.

Më vonë atë ditë, Shtetet e Bashkuara ofruan një shpërblim deri në 10 milionë dollarë për informacione mbi zyrtarë të lartë ushtarakë dhe të inteligjencës iraniane, përfshirë Larijanin, si pjesë e një liste prej 10 figurash të lidhura me Gardën Revolucionare Islamike.

Disa media izraelite raportuan gjithashtu se sulmet synuan Gholamreza Soleimani, kreun e Forcës së Rezistencës Basij dhe figura të tjera të larta të Basij-it, ndërsa rezultatet e sulmeve ende po vlerësohen.

/tvklan.al