Aktorja Nicole Kidman dhe këngëtari Keith Urban kanë shkëmbyer urime publike përmes Instagramit, disa muaj pas finalizimit të divorcit të tyre.

Këngëtari 58-vjeçar i uroi ish-bashkëshortes ditëlindjen e saj të 59-të, përmes një postimi në Instagram Story, ku shkroi: “Gëzuar ditëlindjen, Nicole Mary”, duke përdorur edhe emrin e saj të mesëm.

Kjo konsiderohet lëvizja e parë publike e Urban ndaj Kidman që nga finalizimi i divorcit në janar. Çifti i dha fund martesës së tyre pas afro 20 vitesh së bashku. Ata ishin ndarë që në shtator të vitit 2025, ndërsa procedurat ligjore përfunduan në Nashville.

Nga ana e saj, edhe Nicole Kidman i kushtoi një postim ish-bashkëshortit me rastin e Ditës së Babait. Aktorja publikoi një fotografi ku shfaqej babai i saj i ndjerë, si dhe Keith Urban me dy vajzat e tyre, 17-vjeçaren Sunday Rose dhe 15-vjeçaren Faith Margaret.

Në mbishkrimin që shoqëronte postimin, Kidman shkroi: “Gëzuar Ditën e Babait për të gjithë baballarët”.

Shkëmbimi i këtyre urimeve publike tregon se ish-çifti vazhdon të ruajë një marrëdhënie të respektueshme dhe të përqendruar te familja, pavarësisht ndarjes së tyre.

Nicole Kidman dhe Keith Urban janë konsideruar për vite me radhë si një nga çiftet më të njohura në botën e showbizit. Ata u martuan në vitin 2006 dhe gjatë martesës së tyre ndërtuan një jetë familjare larg vëmendjes së tepruar mediatike, duke rritur dy vajzat e tyre.

Gjatë karrierave të suksesshme në film dhe muzikë, të dy kanë shprehur shpesh mbështetje publike për njëri-tjetrin dhe janë shfaqur së bashku në ngjarje të rëndësishme artistike. Për këtë arsye, çdo zhvillim në marrëdhënien e tyre ka tërhequr interes të madh mediatik.

/tvklan.al