“Do të zhduken nga faqja e dheut!”, Trump kërcënon nëse Irani ndërhyn në Ngushticë

Ministria e Mbrojtjes e Emirateve të Bashkuara Arabe thotë se ka kapur 12 raketa balistike, tre raketa kruiz dhe katër dronë të nisur nga Irani sot.

Në një përditësim të sapo publikuar, Forcat Mbrojtëse të Izraelit (IDF) thonë se po e monitorojnë nga afër situatën në Gjirin Persik.

“Sistemet tona të mbrojtjes ajrore dhe aftësitë sulmuese mbeten në një gjendje të lartë gatishmërie, e cila nuk ka ndryshuar që kur armëpushimi hyri në fuqi”, thuhet në të.

Komanda Qendrore e SHBA-ve (CENTCOM) ka njoftuar se 50 anije tregtare janë devijuar nga forcat amerikane për të “siguruar zbatimin” e bllokadës detare të Washingtonit.

Trump ka paralajmëruar se Irani do të “shkatërrohet krejtësisht” nëse ndërhyn në Ngushticën e Hormuzit, raporton Al Jazeera. Presidenti amerikan i tha Fox News se beson që Irani është bërë “më i hapur dhe më i butë” në negociatat për paqe dhe theksoi se shtimi i pranisë ushtarake amerikane në rajon po vijon.

“Ne kemi më shumë armë dhe municione, në një nivel shumë më të avancuar se më parë”, tha Trump për gazetarin e Fox News, Trey Yingst. “Kemi pajisjet më të mira. Kemi mjete kudo në botë. Kemi baza ushtarake në të gjithë globin, të gjitha të pajisura mirë. Ne mund t’i përdorim të gjitha këto, dhe do t’i përdorim nëse është e nevojshme.”

Presidenti amerikan, Donald Trump, thotë se nuk ka “dëme” nga sulmet e Iranit në Ngushticën e Hormuzit, përveç një anijeje koreano-jugore. Ai minimizoi tensionet duke thënë se Irani “ka bërë disa sulme”, por nuk ka shkaktuar dëme të mëdha. “Përveç anijes koreano-jugore, për momentin nuk ka pasur asnjë dëmtim gjatë kalimit nëpër Ngushticë”, shkruan Trump në platformën e tij Truth Social, ndërsa çmimet e naftës rriten për shkak të përshkallëzimit të tensioneve.

Sultan Barakat, një profesor në Universitetin Hamad Bin Khalifa të Katarit, thotë se Emiratet e Bashkuara Arabe ka të ngjarë të kërkojnë një formë hakmarrjeje nga ana e Gjirit ndaj Iranit pas incidenteve të fundit me raketa dhe dronë.

“Por unë besoj se shtetet e Gjirit, në përgjithësi, do të ngurrojnë të angazhohen”, tha Barakat për Al Jazeera.

“Ata e kuptojnë absolutisht se ky nuk është konflikti i tyre, por po u imponohet. Dhe ata tashmë kanë paguar një çmim shumë të lartë ekonomikisht.”

Zyra e Medias në Fujairah raporton se tre shtetas indianë janë plagosur pas një sulmi me dron ndaj një terminali nafte.

“Sipas autoriteteve kompetente në Emiratin e Fujairah, tre shtetas indianë kanë pësuar lëndime të moderuara dhe janë transportuar në spital për të marrë trajtimin e nevojshëm”, thuhet në një deklaratë të zyrës në platformën X, duke shtuar se përditësime të mëtejshme do të jepen sapo të ketë informacion të ri. Autoritetet gjithashtu i kanë bërë thirrje publikut që të marrë informacion vetëm nga burime zyrtare dhe të shmangë përhapjen e thashethemeve ose informacionit të paverifikuar, shton zyra e medias.

Në një njoftim në platformën X, Ministria e Mbrojtjes e Emirateve të Bashkuara Arabe bëri të ditur se zhurmat e dëgjuara në disa pjesë të vendit janë rezultat i ndërhyrjes së sistemeve të mbrojtjes ajrore, të cilat po neutralizojnë “raketa balistike, raketa lundruese dhe dronë”.

“Sistemet e mbrojtjes ajrore të Emirateve janë në angazhim aktiv ndaj kërcënimeve nga raketat dhe mjetet ajrore pa pilot (UAV)”, thuhet në deklaratë.

Emiratet e Bashkuara Arabe njoftojnë se tre raketa të lëshuara nga Irani janë interceptuar. Ministria e Mbrojtjes së Emirateve bëri të ditur se janë lëshuar gjithsej katër raketa nga Irani, ku tre prej tyre janë neutralizuar nga sistemet e mbrojtjes ajrore, ndërsa një ka rënë në det, sipas Al Jazeera.

Ushtria e Izraelit ka paralajmëruar se do të kryejë sulme në disa zona në jug të Libanit, duke u bërë thirrje banorëve të largohen menjëherë nga shtëpitë e tyre.

Sipas një deklarate zyrtare, objektivat e mundshme përfshijnë qytetet Nabatieh al-Fawqa, Mayfadoun, Qalaouiyah, Burj Qalaouiyah, al-Majadel dhe Srifa.

Zëdhënësi i ushtrisë kërkoi që të gjithë banorët e këtyre zonave të zhvendosen në hapësira të hapura, në një distancë prej të paktën 1 mijë metrash nga vendbanimet e tyre, duke theksuar se operacionet ushtarake mund të zhvillohen në çdo moment.