Kryetari i Bashkisë së Kukësit Bashkim Shehu ka reaguar menjëherë pas 23 urdhër-arrestimeve për banorët të cilët protestuan ditën e shtunë lidhur me tarifën e Rrugës së Kombit. Shehu i kërkoi qeverisë të heqë këtë rrethim policor e terror ndaj qytetarëve.

“E para kërkoj të shtensionohet politikisht situata. Kukësi që nga mbrëmë është kthyer në një shtetrrethim policor, e në këtë kontekst i bëj thirrje qeverisë të heqë këtë rrethim policor e terror ndaj qytetarëve”.

Dekalarata e plotë:

“Kam ndjekur me vëmendje zhvillimet para, gjatë dhe pas protestës së zhvilluar nga qytetarët e Qarkut të Kukësit në Rrugën e Kombit kundër vendosjes së tarifës. Situata e krijuar në Kukës nuk është normale.

E para kërkoj të shtensionohet politikisht situata. Kukësi që nga mbrëmë është kthyer në një shtetrrethim policor, e në këtë kontekst i bëj thirrje qeverisë të heqë këtë rrethim policor e terror ndaj qytetarëve.

Më shumë se kurdo, sot nevojitet dialog dhe sheshim i mosmarrëveshjeve për këtë rrugë dhe tarifën e vendosur nga qeveria. 

Çdo acarim i mëtejshëm i situatës është i dëmshëm ndaj sot unë jam në krah të qytetarëve të Kukësit pa dallime e ndasi politike. 

Policia të vlerësoje me maturi situatën, të ruajë ekuilibrat dhe të mostejkalojë kompetencat ligjore me veprime antikushtetuese. 

Organet e prokurorisë, Gjykatës, Shërbimi i Çështjeve të Brendshme dhe Ankesave, të bëjnë të gjitha vlerësimet e nevojshme, hetim të plotë e të paanshëm, komunikim të vazhdueshëm rreth zhvillimeve e transparencë të plotë për fatin e qytetarëve të shoqëruar gjatë natës dhe ditës së sotme.

Kërkojmë lirimin e menjëhershëm të të gjithë qytetarëve të shoqëruar gjatë këtyre orëve dhe kjo kërkesë është e panegociueshme. 

Kukësi nuk e meriton te damkoset me deklarata që nxisin dhunë dhe urrejtje kolektive.

Ne nuk jemi për dhunë dhe dënojmë çdo akt dhune nga do që të vijë ajo, por i përkrah fuqimisht qytetarët e mi në kauzën e tyre të drejtë. 

U bëj thirrje bashkëqytetarëve të mi dhe të gjithë atyre që përfaqësoj për ruajtjen e qetësisë dhe maturi në veprimet e tyre. 

Dhe më kryesorja, i kërkojmë qeverise të reflektoje në vendimmarrjen e saj për heqjen e tarifës në Rrugën e Kombit.

/tvklan.al