Prishtina është përfshirë nga një valë e re protestash gjatë mbrëmjes së sotme në 17 shtator, ku qindra qytetarë u mblodhën sërish përpara objektit të Qeverisë së Kosovës për të shprehur pakënaqësinë e tyre të thellë ndaj aktgjykimit të fundit të shpallur nga Dhomat e Specializuara me qendër në Hagë kundër ish-drejtuesve të Ushtrisë Çlirimtare të Kosovës.

Protestës iu bashkuan edhe familjarët e ish-drejtuesve të UÇK-së, mes të cilëve Endrit Thaçi, djali i ish-presidentit Hashim Thaçi, si dhe Klestor Veseli, djali i ish-kryetarit të Kuvendit, Kadri Veseli.

Gjatë qëndrimit mes protestuesve në shesh, Endrit Thaçi shprehu mirënjohjen e tij të thellë ndaj të gjithë shqiptarëve për mbështetjen e pakursyer që po tregojnë në këto ditë të vështira, si dhe falënderoi mediat për pasqyrimin e kësaj fryme bashkimi.

Ai nënvizoi me bindje se populli qëndron fuqishëm pranë ushtrisë çlirimtare dhe se lufta e UÇK-së mbetet e pastër dhe e drejtë.

Nga ana e tij, Klestor Veseli mbështeti plotësisht fjalët e Endrit Thaçit, duke u bërë thirrje gazetarëve dhe opinionit publik që të dëgjojnë me vëmendje zërin e qytetarëve të mbledhur në shesh. Ai u shpreh se reagimi i popullit flet më së miri për qëndrimin e gjithë shoqërisë karshi këtij vendimi gjyqësor.

Kjo revoltë popullore nisi që mbrëmë, pas dhënies së vendimit ditën e mërkurë, ku qytetarët fillimisht mbushën sheshin “Skënderbeu” dhe më pas marshuan drejt ndërtesës së qeverisë si dhe selisë së EULEX-it për të kundërshtuar atë që e konsiderojnë një goditje ndaj luftës çlirimtare.

Kujtojmë se Gjykata e Hagës dënoi me 81 vite burg ish-komandantët e UÇK-së, vendim që solli edhe një reagim tepër të madh të shoqërisë shqiptare.