Goditet ishulli strategjik i Iranit, Trump ofron 20 mln $ për sekretet bërthamore!

Tensionet në Lindjen e Mesme vijojnë të përshkallëzohen, ndërsa Irani ka dhënë sinjale për forcimin e mëtejshëm të kapaciteteve të tij ushtarake.

Zëdhënësi i Gardës Revolucionare Islamike (IRGC), gjeneral brigade Hossein Mohebbi, deklaroi se Irani është i gatshëm të përgatitet për ndryshime në doktrinën e tij bërthamore, nëse një vendim i tillë merret nga udhëheqja shtetërore. Ai paralajmëroi gjithashtu se Teherani po punon vazhdimisht për të rritur rrezen e veprimit të raketave të tij.

Ndërkohë, situata mbetet e tensionuar edhe në Ngushticën strategjike të Hormuzit. Sipas mediave iraniane, një cisternë nafte ka marrë flakë në lindje të ngushticës, pasi dyshohet se ka goditur një minë detare. Autoritetet iraniane pretendojnë se anija kishte hyrë në një zonë të kufizuar detare.

Zhvillimet e fundit nënvizojnë rrezikun e përshkallëzimit të mëtejshëm ushtarak dhe kërcënimin ndaj lundrimit dhe transportit global të naftës, në një prej korridoreve më të rëndësishme energjetike në botë.

Sipas raportimeve të fundit, incidente të tjera me cisterna dhe mjete detare janë regjistruar gjithashtu në këtë zonë. Megjithatë, pretendimet e palës iraniane për rrethanat e incidenteve nuk janë verifikuar në mënyrë të pavarur.

Drejtori i Mbrojtjes Civile në Gaza ka bërë thirrje për mobilizim urgjent ndërkombëtar për dërgimin e ndihmave humanitare dhe pajisjeve të emergjencës në enklavë, pasi reshjet e dendura dhe erërat e forta kanë shkatërruar një numër të madh çadrash ku strehohen palestinezët e zhvendosur.

Në një intervistë për Al Jazeera, ai kërkoi dërgimin e menjëhershëm të çadrave dhe burimeve të tjera për të përballuar situatën e krijuar nga moti i keq.

Sipas Mbrojtjes Civile në Gaza, gjatë stuhisë së fundit janë regjistruar më shumë se 1,500 telefonata për ndihmë nga persona, çadrat ose strehimet e të cilëve janë dëmtuar. Përmbytjet kanë përfshirë kampe të tëra të të zhvendosurve.

“Banorët e zhvendosur, së bashku me fëmijët dhe gratë, po mbyten, ndërsa reshjet po ua marrin çadrat”, thuhet në deklaratën e agjencisë.

Mbrojtja Civile paralajmëron se nuk ka kapacitetet dhe pajisjet e nevojshme për të përballuar pasojat e stuhisë, veçanërisht për të larguar ujin nga zonat e përmbytura. Sipas saj, përmasat e emergjencës e tejkalojnë mundësinë e ndërhyrjes me burimet aktuale.

Presidenti amerikan, Donald Trump, ka konfirmuar se SHBA-të kanë kryer sulme të kufizuara ushtarake ndaj ishullit iranian Qeshm, duke pretenduar se janë goditur sistemet iraniane të mbrojtjes ajrore.

Ndërkohë, Trump deklaroi se negociatat me Iranin kanë shënuar përparim të konsiderueshëm.

Mediat shtetërore iraniane raportuan dy sulme me raketa në zonën e Suzas, si dhe pretenduan se mbrojtja ajrore iraniane kishte rrëzuar një dron amerikan MQ-9 mbi ishull.

Komanda Qendrore Amerikane (CENTCOM) deklaroi se situata në zonë mbetet relativisht e qetë.

Zëdhënësi i Gardës Revolucionare të Iranit (IRGC), gjeneral brigade Hossein Mohebbi, ka reaguar ndaj deklaratave të komandantit të Komandës Qendrore të SHBA-ve (CENTCOM), lidhur me shndërrimin e dronëve amerikanë MQ në mjete ajrore pa pilot kamikaze.

Në episodin e fundit të një podkasti të publikuar nga CENTCOM, komandanti Brad Cooper shpjegoi se si ushtria amerikane ka përshtatur dronët e avancuar MQ-1 dhe MQ-9, me vlerë miliona dollarë, për t’i përdorur si dronë kamikazë, të cilët godasin objektivat duke u përplasur drejtpërdrejt me ta.

Kryeministri i Katarit, Sheikh Mohammed bin Abdulrahman Al-Thani, deklaroi se përpjekjet ndërmjetësuese mes SHBA-ve dhe Iranit po vazhdojnë, me synimin për të parandaluar përshkallëzimin e mëtejshëm të situatës në rajon.

Sipas tij, administrata amerikane mbetet e gatshme të gjejë një zgjidhje diplomatike edhe pas zgjedhjeve të mesmandatit, duke treguar se interesi i Washingtonit për arritjen e një marrëveshjeje me Teheranin nuk ka ndryshuar. Ai tha se është bërë përparim i rëndësishëm në negociata dhe shprehu besimin se palët mund të arrijnë një marrëveshje për t’i dhënë fund konfliktit.

Administrata e Presidentit amerikan, Donald Trump, ka ofruar një shpërblim deri në 20 milionë dollarë për këdo që jep informacione mbi programin bërthamor të Iranit. Lajmi u bë i ditur të premten nga Komanda Qendrore e Ushtrisë Amerikane.

Shpërblimi ofrohet përmes programit amerikan “Rewards for Justice” dhe përfshin edhe mundësinë e zhvendosjes së personit që jep informacionin, për arsye sigurie.

SHBA-të kërkojnë informacione për objektet bërthamore të Iranit, pajisjet, personelin e përfshirë në program, përfshirë shkencëtarët, si dhe lëvizjet e materialeve dhe pajisjeve përkatëse. Sipas Departamentit amerikan të Shtetit, Irani zotëron rezerva uraniumi të pasuruar deri në 60%, një nivel shumë pranë 90% që nevojitet për prodhimin e armëve bërthamore.

SHBA-të paralajmërojnë se kjo sasi, nëse pasurohet më tej, mund të mjaftojë për prodhimin e disa armëve bërthamore. Ndërkohë, Irani ka pezulluar inspektimet e Agjencisë Ndërkombëtare të Energjisë Atomike (IAEA), pas sulmeve amerikane dhe izraelite ndaj objekteve të tij bërthamore në qershor 2025. Si pasojë, agjencia ka humbur mundësinë për të monitoruar plotësisht prodhimin dhe rezervat e pajisjeve kryesore të programit bërthamor iranian.

Presidenti amerikan, Donald Trump, po shqyrton dy mundësi për konfliktin me Iranin: një marrëveshje diplomatike ose rifillimin e sulmeve ushtarake. Ndërkohë, Katari dhe vendet e Gjirit po përpiqen të ndihmojnë në uljen e tensioneve, ndërsa tregjet e energjisë reagojnë ndaj pasigurisë për zhvillimet e ardhshme.