Një udhëheqës që nuk është testuar plotësisht merr drejtimin në Iran, pikërisht kur teokracia e vendit përballet me provën më të madhe në pesë dekada.

Vazhdimësia dhe lidhjet e kanë çuar Mojtaba Khamenein, 56 vjeç, në krye pas vrasjes së babait të tij, Ajatollah Ali Khamenei, në sulmet e para të këtij konflikti. Por udhëheqësi i tretë suprem i Iranit që nga revolucioni i vitit 1979 po e merr pushtetin ndërsa Republika Islamike po përballet me një betejë ekzistenciale.

Turma të mëdha, “ushtarët e këmbësorë” të revolucionit, dolën menjëherë në rrugë duke thirrur “Allahu Akbar” për të festuar zgjedhjen e tij nga Asambleja e Ekspertëve, një organ prej 88 klerikësh shiitë. Të gjitha forcat e sigurisë u betuan se do t’i shërbenin komandantit të ri deri në “pikën e fundit të gjakut”. Televizioni shtetëror tregoi pamje të raketave të para të lëshuara në emrin e tij me një mbishkrim: “Në shërbimin tuaj, Seyyed Mojtaba.”

Megjithatë, nga apartamentet e tyre, disa prej protestuesve që në janar kishin denoncuar babanë e tij si “diktator” dhe kishin kërkuar vdekjen e tij, u dëgjuan mbrëmë duke thirrur “Vdekje për Mojtaba-në!”. Për ata që ende vajtojnë mijëra të vrarë në shtypjen e atyre protestave, regjimi duket se do të bëhet edhe më i ashpër.

Mojtaba Khamenei, djali i dytë më i njohur i ajatollahut të ndjerë, është në të njëjtin model ultrakonservator si i ati. Ai ka punuar për dekada në hijen e tij dhe ka lidhje të ngushta me Gardën Revolucionare Islamike (IRGC), ku ishte bashkuar që adoleshent. Garda, e krijuar në vitin 1979 për të mbrojtur revolucionin, sot kontrollon një sistem sigurie shumë-shtresor dhe një perandori të madhe ekonomike.

Khamenei i ri humbi jo vetëm babanë në sulmin izraelit ndaj kompleksit të udhëheqësit suprem, por edhe nënën, bashkëshorten dhe një djalë. Ai raportohet se u plagos, por nuk ka detaje të tjera.

Presidenti amerikan Donald Trump e ka cilësuar Mojtaba Khamenein si “të papranueshëm” dhe ka paralajmëruar se “nuk do të zgjasë shumë”. Edhe Izraeli e ka shpallur “objektiv të qartë”.

Misteri rreth tij thellohet: nuk ka mbajtur fjalime publike, rrallë është shfaqur në publik dhe nuk ka mbajtur poste zyrtare. Shumica e iranianëve nuk e kanë dëgjuar kurrë zërin e tij. Megjithatë, ai është përmendur si i përfshirë pas skenave në zgjedhjen e Mahmoud Ahmadinejad në vitin 2005 dhe në rizgjedhjen e kontestuar të vitit 2009 që solli “Revolucionin e Gjelbër”.

Ngjitja e tij duket se sinjalizon shtyrjen e reformistëve edhe më tej në periferi të politikës iraniane. Politikanë si Ali Larijani dhe Mohammad Baqer Qalibaf, të lidhur me Gardën Revolucionare, janë tashmë figura kyçe pranë tij.

Megjithëse disa e kanë përshkruar Mojtaba Khamenein si “shumë progresist” dhe e kanë krahasuar me princin saudit Mohammed bin Salman, nuk ka shenja të një ndryshimi të madh. Në vend të kësaj, Irani gjendet në mes të një lufte të përshkallëzuar që po trondit gjithë Lindjen e Mesme dhe po shkakton tronditje ekonomike përtej rajonit.

Ngjitja e tij është cilësuar nga Trump si “skenari më i keq”, ndërsa kundërshtarët e Amerikës dhe Izraelit e shohin si shansin e tyre më të madh për ta çuar përpara këtë betejë.

Shkrim nga BBC

/tvklan.al