Të rinjtë në Madrid kanë nisur një protestë të gjerë kundër krizës së banesave, duke u vendosur në Puerta del Sol dhe në zona të tjera qendrore të kryeqytetit spanjoll.

Protestuesit, të njohur si “acampados”, kërkojnë zgjidhje për vështirësitë që hasin të rinjtë për të gjetur një banesë dhe kundërshtojnë çmimet e larta të qirave dhe politikat e tregut të pasurive të paluajtshme.

Protesta nisi me rreth njëqind persona, por numri i pjesëmarrësve është rritur ndjeshëm, duke kaluar në mijëra. Protestuesit kanë ngritur çadra në Puerta del Sol dhe në rrugët përreth, ndërsa synojnë ta shtrijnë praninë e tyre edhe në zona të tjera të Madridit. Ata shprehen se nuk do të largohen nga sheshi, derisa problemi i strehimit të marrë një zgjidhje konkrete.

Protesta të kujton lëvizjen e “Indignados” të vitit 2011, e cila gjithashtu nisi me një kamp proteste në Puerta del Sol dhe pati ndikim të madh në politikën spanjolle. Nga ajo lëvizje dolën figura dhe forca të reja politike, përfshirë Podemos. Për këtë arsye, protesta e sotme shihet jo vetëm si një reagim social ndaj krizës së banesave, por edhe si një zhvillim që mund të pasojë zhvillime politike.

Një nga shqetësimet kryesore të protestuesve është rritja e qirave dhe vështirësia e të rinjve për të pasur një shtëpi të tyren. Me slogane dhe pankarta, ata kritikojnë edhe fondet dhe kompanitë e mëdha imobiliare, të cilat akuzohen se blejnë banesa, dëbojnë qiramarrësit dhe më pas i japin ato me qira për turistë me çmime më të larta.

Protesta ka shkaktuar edhe reagime të ndryshme në Madrid. Disa tregtarë dhe përfaqësues të sektorit të turizmit ankohen për pengesat dhe rënien e numrit të turistëve. Nga ana tjetër, protestuesit këmbëngulin se protesta e tyre është paqësore dhe se synimi kryesor është të tërheqin vëmendjen e qeverisë ndaj krizës së strehimit.

Situata është tensionuar edhe nga përplasjet politike. E djathta kërkon ndërhyrje më të fortë të autoriteteve, ndërsa protestuesit kanë marrë mbështetje nga një pjesë e shoqërisë. Madje, gjatë një marshimi të ekstremit të djathtë në Madrid, policia ndërhyri për të mbrojtur kampin e protestuesve.

Në thelb, kjo protestë tregon një problem më të gjerë të shoqërisë spanjolle: brezi i ri po përballet me vështirësi gjithnjë e më të mëdha për të siguruar një banesë. Prandaj, lëvizja në Madrid nuk duhet parë vetëm si një grumbullim njerëzish në një shesh, por si një shprehje e pakënaqësisë së një brezi që kërkon të ketë mundësi të jetojë në mënyrë të pavarur dhe të përballojë koston e jetesës.

Nga Andrea Nicastro, Corriere Della Sera

/tvklan.al