Policia britanike ka arrestuar një shtetas britaniko-iranian 25-vjeçar, i dyshuar për përgatitjen e një sulmi terrorist, pas një incidenti sigurie pranë bazës ushtarake amerikane në Angli. I riu u arrestua të enjten në qendër të Londrës. Policia kundër terrorizmit ka kontrolluar gjithashtu dy prona në kryeqytet, ndërsa hetimet për incidentin vijojnë.

Më herët, pesë burra të tjerë, të gjithë shtetas britanikë në të 20-at dhe nga Londra, u arrestuan në orët e para të së dielës pranë bazës ajrore RAF Fairford. Ata dyshoheshin për vepra që lidhen me eksplozivët dhe terrorizmin. Të pestë janë liruar më pas me kusht, ndërsa hetimet vazhdojnë.

Pas arrestimeve, dhjetëra banorë të zonës pranë bazës u evakuuan nga shtëpitë e tyre. Në operacion morën pjesë policë të armatosur dhe specialistë të ushtrisë për çaktivizimin e bombave. Policia tha më vonë se kishte gjetur një sasi benzine në tre furgonë të lidhur me pesë të dyshuarit, por nuk kishte gjetur eksplozivë.

Vicki Evans, koordinatore kombëtare për luftën kundër terrorizmit, tha se hetimi është shumë kompleks dhe se ekipet speciale po shqyrtojnë disa pista. Ajo tha se autoritetet po hetojnë të gjitha mundësitë, përfshirë edhe dyshimet për përfshirje të një shteti të huaj.

Kryeministri Andy Burnham tha se autoritetet britanike kanë “shenja të forta” se Irani mund të ketë pasur rol në incident. Ai nuk dha detaje se çfarë dyshohet se po planifikonin të arrestuarit apo se cilat janë provat që lidhin Iranin me ngjarjen.

Teherani e ka mohuar përfshirjen. Megjithatë, autoritetet iraniane kanë deklaruar më parë se çdo bazë ushtarake që përdoret për sulme ndaj Iranit mund të konsiderohet objektiv i ligjshëm.

Baza RAF Fairford ndodhet rreth 160 kilometra në perëndim të Londrës dhe është përdorur prej dekadash nga bombarduesit amerikanë në operacionet ushtarake në Lindjen e Mesme, përfshirë luftën e këtij viti me Iranin.

Vendimi për lirimin me kusht të pesë të dyshuarve ka shkaktuar reagime edhe në Shtetet e Bashkuara. Presidenti Donald Trump tha se ai vetë nuk do t’i kishte liruar të dyshuarit me kusht, ndërsa sekretari amerikan i Shtetit, Marco Rubio, tha se shumë njerëz ishin të shqetësuar nga ky vendim.

Trump tha se ishte i befasuar nga lirimi i tyre, por shtoi se kishte respekt për Scotland Yard dhe besonte se autoritetet britanike e dinin se si ta trajtonin çështjen.

Burnham tha se hetimi po zhvillohet nën kontrollin më të rreptë të autoriteteve britanike dhe se zyrtarët e Mbretërisë së Bashkuar kanë qenë në kontakt gjatë gjithë javës me homologët amerikanë për t’u shpjeguar mënyrën se si po zhvillohet hetimi.

Arrestimet ndodhën në një periudhë kur Britania e Madhe po përballet me shqetësime të shtuara për veprimtaritë e shteteve të huaja në territorin britanik. Shërbimet britanike të sigurisë kanë thënë se Rusia dhe Irani kanë përdorur persona të tjerë për të kryer veprime kriminale në Mbretërinë e Bashkuar.

Sipas zyrtarëve britanikë, numri i çështjeve të sigurisë kombëtare që lidhen me aktivitetet e shteteve të huaja, përfshirë Iranin, u rrit me 50% në gjashtë muajt deri në dhjetor 2025.

Autoritetet britanike kanë akuzuar më parë persona të lidhur me Iranin për një seri zjarrvëniesh dhe sulmesh në Britani dhe vende të tjera. Disa prej këtyre rasteve kanë pasur si objektiv komunitetin hebre dhe, sipas autoriteteve, kanë synuar të krijojnë frikë.

Zyrtarët britanikë kanë paralajmëruar gjithashtu se, nëse konfliktet në Lindjen e Mesme vazhdojnë, Teherani mund të zgjerojë objektivat e tij edhe në territorin britanik.

/tvklan.al