Presidenti amerikan Donald Trump dhe homologu i tij Xi Jinping do të takohen të enjten, 30 tetor, në Seul, në kuadër të samitit të Bashkëpunimit Ekonomik Azi-Paqësor (APEC). Takimi, i pari mes tyre që prej vitit 2019, shihet si një mundësi për të rivendosur raportet dypalëshe dhe për t’i dhënë fund muajve të trazirave ekonomike globale të shkaktuara nga lufta tregtare SHBA–Kinë.

Në prag të takimit, zyrtarë nga të dyja palët po punojnë për një marrëveshje të mundshme tregtare që do të përfshinte heqjen ose shtyrjen e disa kufizimeve reciproke për eksportin e teknologjive të avancuara dhe mineraleve të rralla, burime të domosdoshme për industritë moderne. Kina kontrollon rreth 70% të prodhimit botëror dhe mbi 90% të përpunimit të këtyre mineraleve, çka i jep Pekinit një ndikim të fortë strategjik ndaj Uashingtonit.

Analistët vlerësojnë se Pekini mund të pranojë shtyrjen për një vit të kufizimeve të reja për eksportet, në këmbim të ngrirjes së ndalimeve amerikane për eksportin e çipeve dhe teknologjive të inteligjencës artificiale. Një marrëveshje e tillë do të sillte përfitime për të dy ekonomitë, megjithëse kritikët në SHBA paralajmërojnë për rreziqe afatgjata në sigurinë kombëtare.

Vetëm një ditë para samitit, Trump nënshkroi një marrëveshje me kryeministren japoneze Sanae Takaichi për sigurimin e burimeve të përbashkëta të mineraleve të rralla dhe krijimin e rezervave strategjike. Japonia është një nga vendet që ka arritur të ulë varësinë nga Kina, duke u kthyer në model për SHBA-në.

Nga ana tjetër, Kina po kërkon të forcojë marrëdhëniet tregtare me vendet e Azisë Juglindore. Këtë javë, ajo nënshkroi një marrëveshje të re me bllokun e ASEAN-it, i cili është tashmë partneri më i madh tregtar i Kinës.

Edhe pse tensionet mbeten të larta, të dy liderët po përpiqen të shmangin një përshkallëzim të ri të luftës tregtare. Trump u shpreh optimist përpara gazetarëve, duke thënë se pret një takim “shumë të mirë” me Xi-në. Sipas burimeve diplomatike, përveç çështjeve tregtare, dy liderët pritet të diskutojnë kontrollin e trafikut të fentanilit dhe marrëveshjen për TikTok-un.

Çështja e Tajvanit, megjithatë, mund të mos jetë pjesë e agjendës, pasi Trump deklaroi se “nuk ka shumë për të folur” për këtë temë.

/tvklan.al