Operacioni i SPAK në të cilin u lëshuan të paktën 11 urdhërarreste për zyrtarë e ish-zyrtarë të policisë, por dhe emra të njohur të botës së krimit vijon edhe këtë të martë. Gazetarja Glidona Daci raporton se urdhërarreste janë lëshuar për Besmir Murati, Bujar Ajeti alias Gërmizi, shefin e Krimeve në Komisariatin nr. 6 në Tiranë, Dedan Gjoni, ish-zv/drejtorin e Rendit në Policinë e Tiranës, Erzen Breçani, djalin e tij, Eralbi Breçani, Jonida Babameton, oficeren e Drejtorisë së Kufirit, Artan Sulejmanin, Albert Prengën, Bajram Grabova, Ismail Zeneli, Ervin Matën.

Deri në këto momente mësohet se është bërë i mundur arrestimi i 4 personave, për një person është caktuar detyrim paraqitje, ndërsa 6 të tjerë janë shpallur në kërkim.

Të arrestuar
-Erzen Breçani, ish-zv/drejtor i Rendit në Policinë e Tiranës
-Dedan Gjoni, shef seksioni për hetimin e Krimeve në Komisariatin Numër 6
-Bujar Ajeti alias Gërmizi emër i njohur i botës së krimit në Kukës
-Besmir Murati

Në kërkim (nuk ndodhen në Shqipëri)
-Ismail Zeneli
-Artan Sulejmani
-Albert Prenga
-Bajram Grabova
-Ervin Mata
-Eralbi Breçani

-Jonida Babameto, oficere e Drejtorisë së Kufirit dhe Emigracionit (është caktuar masa detyrim paraqitje)

Akuzat

1- “Sigurimi i kushteve dhe i mjeteve materiale për të kryer vrasje”, “
2- Mbajtja pa leje dhe prodhimi i armëve, armëve shpërthyese dhe i municionit”,
3-“Prodhimi dhe shitja e narkotikeve”,
4-“Trafikimi i narkotikëve”,
5-“Pastrimi i produkteve të veprës penale ose veprimtarisë kriminale”,
6- “Grupi i strukturuar kriminal”,
7- “Kryerja e veprave penale nga organizata kriminale dhe grupi i strukturuar kriminal”,

Gazetarja mëson se gjeneza është trafiku i drogës jashtë vendit, që më pas ka sjellë edhe tentativën për të kryer vrasje. Në qendër të këtij grupi janë Besmir Murati e Bujar Gërmizi, të cilët akuzohen për krijimin e kushteve për të kryer vrasje në dëm të dy vëllezërve që jetonin jashtë. Së bashku me shefin e Komisariatit nr. 6 në Tiranë, Dedan Gjoni, ata akuzohen se kanë bashkëpunuar me njëri-tjetrin për të kryer vrasje.

Bujar Gërmizi
Bujar Gërmizi

Kush është Bujar Gërmizi – Në 1999 ai ka qenë i dyshuar për grabitjen e bankës së kursimeve në Kukës. Në atë kohë ai ishte oficer policie. Në 2009 ka qenë i dyshuar për trafik armësh dhe në Maqedoninë e Veriut është arrestuar për trafik droge. Ai është arratisur nga burgu në Maqedoni dhe kishte humbur gjurmët.

“Sipas informacioneve që kemi mundur të sigurojmë nëpërmjet burimeve, rezulton se Besmir Murati, Bujar Gërmizi dhe shefi i Krimeve në Komisariatin nr 6 Dedan Gjoni, janë të akuzuar nga SPAK për krijim kushtesh për të kryer vrasje. Bëhet fjalë për 2 vëllezër të cilët ndodheshin në Britaninë e Madhe. Përplasja mes dy vëllezërve, Muratit, Gërmizit dhe Gjonit ka ndodhur pikërisht për çështje të trafikut të drogës dhe më pas ata kanë kërkuar informacione në sistemin TIMS duke qenë se Gjoni kishte akses në këtë sistem dhe të tjera, kanë kërkuar informacione të ndryshme për lëvizje që do të bënin dy vëllezërit për kohën kur ata vinin në Shqipëri dhe të gjitha informacionet që i duheshin grupit kriminal për të kryer ekzekutimin e tyre”.

Dedan Gjoni
Dedan Gjoni

Daci thotë se dy personat që do të kryenin këtë ekzekutim ndodhen aktualisht në Spanjë dhe sipas oficerëve të BKH-së që kanë kryer gjatë ditës së djeshme arrestimet, edhe në Spanjë ka nisur menjëherë puna për kapjen e tyre.

Erzen Breçani
Erzen Breçani

Sa i përket akuzave, gazetarja thotë se Erzen Breçani akuzohet për pastrim parash dhe përkrahje të autorit të krimit. Djali i tij Eralbi Breçani akuzohet për veprën penale trafik droge dhe pastrim parash.

Në mesin e personave në kërkim është edhe biznesmeni Ervin Mata, një emër i njohur për drejtësinë, pas përplasjes që ka patur me bosin e lojërave të fatit, Ervis Martinaj, në një lokal në ish-Bllok në vitin 2018.

Ndaj Matës rëndon akuza për veprën penale të trafikut të drogës dhe grupit të strukturuar kriminal.

Ervin Mata
Ervin Mata

Sa i takon oficeres Jonida Babameto, ndaj saj mësohet se është caktuar masa detyrim për t’u paraqitur.

“Ajo është shoqëruar gjatës ditës së djeshme, ku i është komunikuar akuza e shpërdorimit të detyrës, sepse sipas të dhënave të dala nga SKY rezulton që kjo e fundit të ketë kërkuar informacione sa i përket 2 vëllezërve, me të cilët kishin përplasje grupi i cili drejtohej nga Bujar Gërmizi dhe Murati. Ajo ka qenë më herët oficere në Interpol dhe ka dhënë të dhëna në lidhje me lëvizjet e dy vëllezërve. Pra gjithçka ka nisur për çështjet e përplasjes së trafikut të drogës jashtë vendit”, tha Daci.

Ajo shton se “mënyra sesi lidhen të gjithë personat së bashku është se ata kanë pasur komunikimet e vazhdueshme në SKY me njëri-tjetrin ku shpjegojmë me detaje”.

Gjithçka ka ardhur pikërisht pas zbërthimit të mesazheve nga aplikacioni i koduar “SKY ECC”. Vetë SPAK në një njoftim për media tha se “në kuadër të këtij procedimi penal, Struktura e Posaçme kundër Korrupsionit dhe Krimit të Organizuar, në bashkëpunim intensiv me Eurojust, Europol dhe agjencitë ligjzbatuese holandeze, belge, gjermane, braziliane, kolumbiane dhe franceze ka zhvilluar hetime lidhur me disa shtetas shqiptarë të përfshirë në aktivitete kriminale në Shqipëri, në Amerikën e Jugut si dhe në disa vende të tjera në Evropë. Po ashtu është hetuar dhe lidhur me disa ngjarje kriminale të mëparshme të ndodhura në Shqipëri” (Lexo më shumë). 

Për operacionin në fjalë reagoi edhe ministri i Brendshëm, Taulant Balla. Sipas tij, ky aksion është konsolidimi i ngritjes në një nivel tjetër të vullnetit të agjencive ligjzbatuese për ta goditur krimin në të gjithë spektrin e tij. Balla tha se të gjithë personat që ndodhen në Shqipëri janë arrestuar, ndërkohë po vijon puna për gjetjen dhe ndalimin e personave të tjerë që ndodhen jashtë vendit./tvklan.al