Përmbledhje:

◼Izraeli ka siguruar kufirin me Gazën pasi militantët thyen barrierën në disa vende të ndryshme të shtunën. Asnjë militant nuk ka kaluar gardhin sipas ushtrisë izraelite gjatë ditës së kaluar.

◼Vijojnë sulmet ajrore të Izraelit në Rripin e Gazës. Të paktën 200 shënjestra u goditën përgjatë natës.

◼Izraeli këshilloi njerëzit që të largohen nga Gaza nëpërmjet pikës që kontrollohet nga Egjipti. Më vonë, po të njëjtët thanë se pika e kalimit është e mbyllur.

Ushtria izraelite ka blinduar kufirin me Gazën, në pritje të urdhrit për të nisur sulmin masiv. Izraeli u ka bërë thirrje civilëve në Gaza, të ikin në Egjipt. Bilanci i viktimave nga të dyja palët ka arritur në 1900.

Hamasi riktheu breshërinë e raketave ndaj jugut të Izraelit, teksa ushtria izraelite ka pozicionuar ushtrinë përgjatë kufirit me Rripin e Gazës në pritje të urdhrit për të sulmuar nga toka.

Qindra raketa të Hamasit ranë mbi qytetin e Ashkelon kur skadoi një ultimatum i vendosur pak orë më herët ndaj popullsisë civile izraelite për t’u larguar.

Trupat e pajetë të izraelitëve dhe militantëve të Hamasit shtriheshin përtokë në Kfar Aza mes shtëpive e makinave të djegura, ndërsa ushtarët izraelitë kontrolluan shtëpi më shtëpi për të numëruar viktimat.

Mediat lokale flasin për të paktën 40 foshnja të masakruara në këtë zonë, ndërsa disa prej viktimave iu ishin prerë kokat.

Edhe në Gaza morgjet janë të tejmbushura me trupa viktimash. Shkatërrimi është i dukshëm kudo, ende pa nisur sulmi tokësor i Izraelit.

Civilët po marrin arratinë nga shtëpitë e tyre pas thirrjes së Izraelit që ata të ikin në Egjipt, edhe pse pikat kufitare me këtë vend jo gjithmonë i kanë gjetur të hapura. E gjithë zona, nga e hëna është nën rrethim dhe banorët nuk kanë as ujë, as ushqim, as elektricitet e as karburant.

Hamasi ka paralajmëruar se nuk do të negociojë për lirimin e 150 pengjeve, deri kur të mbarojë lufta.

Nën armë nga Izraeli si kundërpërgjigje për sulmin janë thirrur 300 mijë rezervistë.

Kjo do të jetë hera e parë që ushtria izraelite kthehet në Gaza pas 2 dekadash, që kur i dha fund pushtimit 38-vjeçar.

SHBA, plan emergjence për Izraelin

Presidenti amerikan Joe Biden në një fjalim drejtuar kombit tha se Shtetet e Bashkuara të Amerikës janë në krah të Izraelit.

“Ky ishte akti më i keq. Në këtë moment, ne duhet të jemi të qartë. Nuk asnjë dyshim ne jemi me Izraelin. Nuk ka asnjë justifikim për terrorizmin. Hamasi nuk mbështet të drejtën e popullit palestinez për dinjitet, ata përdorin civilët palestinezë si mburoja njerëzore”.

Ndërsa bëri të ditur se 14 amerikanë janë vrarë nga Hamasi në Izrael dhe 20 shtetas të tjerë janë të humbur.

Presidenti amerikan ka urdhëruar administratën e tij për planifikimin e një plani emergjence në rast se konflikti në Izrael përshkallëzohet, duke nënkuptuar dhe dërgimin e trupave ushtarake shtesë. Ndërsa mësohet Sekretari i Shtetit Antony Blinken pritet të udhëtojë drejt Izraelit.

Jozef Borrell, pas mbledhjes së ministrave të Jashtëm të BE-së, u bëri thirrje të dyja palëve të respektojnë ligjin humanitar.

“Izraeli ka të drejtë të mbrohet, por kjo duhet të bëhet në përputhje me ligjin ndërkombëtar, ligjin humanitar. Dhe disa vendime janë në kundërshtim me të drejtën ndërkombëtare”.

Sakaq, udhëheqësi i Iranit Ajatollah Kohmeni mohoi përfshirjen e shtetit të tij në sulmin e militantëve të Hamasit në Izrael mëngjesin e së shtunës së shkuar.

Hamasi vrau fëmijë e foshnja në një fshat të Izraelit

Trupat e izraelitëve dhe militantëve të Hamasit shtriheshin përtokë në Kfar Aza mes shtëpive e makinave të djegura, ndërsa ushtarët izraelitë kontrolluan shtëpi më shtëpi për të numëruar viktimat.

Forcat izraelite të mbrojtjes u treguan gazetarëve të huaj përreth zonës së masakrës. Erë e keqe e trupave të masakruar ndihej ende ndërsa gazetarët ecnin në shtigjet e kibucit.

“Pamë foshnjat, nënat, baballarët në dhomat e tyre të gjumit, në dhomat e tyre të mbrojtjes dhe se si terroristi i vret. Nuk është një luftë, nuk është një fushë beteje. Është një masakër, është një aktivitet terrorist.”

Jashtë një prej shtëpive të vogla, trupi i një banori ishte i mbuluar me një çarçaf ngjyrë vjollcë, jashtë dukej këmba e tij e zbathur. Një jastëk dhe sende të tjera nga shtëpia ishin të shpërndara. Diku tjetër trupat e personave të armatosur të shtrirë me fytyrë përtokë. Një portë e shkatërruar në perimetrin e komunitetit tregon se nga hynë terroristët.

Trupat izraelite shkuan shtëpi më shtëpi për të tërhequr trupat e civilëve. Ndërsa hynte në një banesë, një ushtar klithi: “Thuajini botës çfarë patë këtu!”

Mediat lokale flasin për të paktën 40 foshnja të masakruara në këtë komunitet.

Avionët dëgjohen lart dhe nga Gaza mund të shihej tymi që ngrihet nga rrënojat. Sirenat e alarmit paralajmëruan për raketa të reja të kapura nga mbrojta ajrore.

Këtu, palestinezët në Rripin e Gazës teksa mbajnë një funeral masiv për dy anëtarët e zyrës politike të Hamasit, Jaëad Abu Shammala dhe Zakaria Abu Maamar, të vrarë në një sulm ajror në Khan Younis në Gazën Jugore të martën. Ushtria izraelite tha se ata u goditën gjatë natës.

Tre gazetarë të Gazës u vranë gjithashtu teksa raportonin jashtë një ndërtese, duke e çuar numrin e gazetarëve të vrarë në gjashtë.

Samah Abo Latifa u largua nga shtëpia e saj në zonën Abasan për në Khan Younis, me shpresën për të gjetur siguri. Në vend të saj, ajo humbi vëllanë dhe dy anëtarë të tjerë të familjes.

“Ikëm nga shtëpia për t’i shpëtuar vdekjes, kishte sulme të vazhdueshme ajrore, na thanë të shkonim në Khan Younis dhe ne erdhëm për të gjetur vdekjen këtu. Nëse qëndrojmë në shtëpitë tona do të vdesim, nëse do të dalim në rrugë do të vdesim.”

Qytetarët në Gaza thonë se nuk kanë parë diçka të tillë në luftërat e mëparshme.

Qytetarët amerikanë që jetojnë në Izrael i kërkuan administratës Biden ndihmë në gjetjen e anëtarëve të humbur të familjes. Të afërmit e këtyre të zhdukurve u thanë mediave në një konferencë shtypi në Tel Aviv se nuk kanë dëgjuar nga të afërmit që ditën e sulmit të Hamasit.

Nahar Neta, djali i infermieres 66-vjeçare Adrienne Neta, tha se administrata e Biden është përgjegjëse për kthimin e qytetarëve të zhdukur në shtëpi të sigurt dhe të shëndoshë.

Një zëdhënës ushtarak tha se numri i të vdekurve nga sulmet e Hamasit ishte rritur në mbi 100, kryesisht civilë të vrarë në shtëpitë e tyre, në rrugë ose në një festival muzikor. Në Gaza, të paktën 800 vetë janë vrarë nga sulmet hakmarrëse izraelite.

Në frontin diplomatik Presidenti i SHBA-së Biden, zëvendëspresidentja Harris dhe zyrtarë të tjerë të lartë të administratës biseduan në telefon me kryeministrin izraelit Benjamin Netanyahu. Presidenti postoi në mediat sociale se ekipi i tij foli me Netanyahun për të “marrë një përditësim të situatës pas sulmit terrorist në Izrael dhe për të koordinuar hapat e ardhshëm”.

Më vonë gjatë një fjalimi para kombit, Presidenti Joe Biden i quajti sulmet e Hamasit “një akt djallëzor”. Ai paralajmëroi edhe një herë aktorët e tjerë që mund të përpiqen të përfitojnë nga konflikti dhe pohoi mbështetjen e kombit të tij për Izraelin.

“Le të mos ketë asnjë dyshim. Shtetet e Bashkuara kanë mbështetjen e Izraelit. Ne do të sigurohemi që shteti hebre dhe demokratik i Izraelit të mund të mbrojë veten, sot, nesër, siç kemi bërë gjithmonë. Është kaq e thjeshtë. Kushdo që mendon të përfitojë nga kjo situatë, kam një fjalë: Mos.”

Turqia ndërkaq po përpiqet të ndërmjetësojë një armëpushim mes palëve. Presidenti i Turqisë, Tajip Erdogan, kritikoi të Martën Shtetet e Bashkuara për dislokimin e një aeroplan mbajtëse afër Izraelit, duke thënë se ajo do të kryejë “masakra të rënda” në Gaza. Erdogan ka thënë më parë se Turqia ishte e gatshme të ndërmjetësonte mes forcave izraelite dhe palestineze për të siguruar qetësinë.

Ndërsa lufta hyri në ditën e katërt, zhurmat e granatimeve u dëgjuan për në zonat kufitare midis Libanit dhe Izraelit. Një burim i autoriteteve të sigurisë tha se bombardimi u krye nga fraksionet palestineze. Një burim i dytë tha se granatimet izraelite qëlluan zonën jugore nga e cila u lëshuan raketat.

Ushtria izraelite tha se po i përgjigjej me zjarr artilerie lëshimeve që vinin nga territori libanez. Ai tha se rreth 15 raketa u lëshuan nga Libani, nga të cilat katër u kapën dhe 10 ranë në hapësira të hapura.

Libani rrezikon të përfshihet në luftë pasi gjashtë luftëtarë u vranë përgjatë kufirit, tre anëtarë të Hezbollahut, një oficer izraelit dhe dy militantë palestinezë.

“Nëna me 2 fëmijë të vegjël është marrë peng nga Hamasi”, rrëfime tragjike nga Izraeli

Një nënë me 2 fëmijë dyshohet se është rrëmbyer nga Hamasi pas sulmit që nisi të shtunën në Izrael. Lajmin e trishtë e ka bërë me dije një i afërm i nënës izraelite, për të cilën ka thënë se e ka dalluar në një video të publikuar nga militantët e Hamasit.

Yossi Sneider thotë se është përpjekur që të kontaktojë me kushërirën e tij për t’u siguruar që ajo dhe fëmijët e saj ishin mirë dhe të sigurtë, por thotë se askush nuk i është përgjigjur. Ai nuk ka mundur të kontaktojë as me bashkëshortin e të afërmes së tij.

Disa orë pas tentativës së telefonatës, të shtunën në mëngjes, ai ndeshi në një foto në të cilën dukej se ishte kushërira e tij, Shiri Bib, dhe dy fëmijët e saj, Ariel katër vjeç dhe Kfir nëntë muajsh.

“Rreth orës 10 të mëngjesit, 10:30, të shtunën në mëngjes pashë një foto të Shirit duke mbajtur këta 2 fëmijë të vegjël, me terroristët e Hamasit që e rrethonin të gjithë. Nuk mund ta besoja foton,” tha Sneider për programin “Today” të BBC Radio.

Menjëherë pasi shikoi fotografinë, ai ndeshi me një tjetër pamje, tanimë video përmes së cilës konfirmoi frikën e tij më të madhe, kushërira e tij Shirin dhe fëmijët e saj ishin marrë peng nga Hamasi.

“Ata nuk kanë as ushqime, as pelena… Shpresojmë vetëm që terroristët nuk i kanë ndarë fëmijët nga nëna e tyre”, tha Sneider.

Biden: SHBA do të rrisë ndihmën shtesë ushtarake për Izraelin

SHBA do të rrisë ndihmën shtesë ushtarake për Izraelin. Lajmin e ka bërë të ditur Presidenti amerikan, Joe Biden, në një deklaratë për mediat. Ai i ka kërkuar Kongresit të ndërmarrë “veprim urgjent” për të financuar kërkesat e sigurisë kombëtare të partnerëve kritikë të SHBA-së.

“Ne do të sigurohemi që Izraelit të mos i mbarojnë këto asete kritike për të mbrojtur qytetet dhe qytetarët e tij. Kjo nuk ka të bëjë me parti apo politikë. Ka të bëjë me sigurinë e botës sonë”, thotë Biden.

Biden e ka cilësuar Hamasin të etur për gjak, sulmet e të cilit i kujtojnë mizoritë më të tmerrshme të kryera nga ISIS. Ai ka dënuar Hamasin për mbi 1000 civilë të vrarë, mes të cilëve 14 qytetarë amerikanë. Ai gjithashtu konfirmon se shtetas amerikanë ishin në mesin e atyre që mbahen nga Hamasi.

“Hamasi nuk përkrah popullin palestinez. Ata përdorën popullin palestinez si mburoja njerëzore”, thotë Biden.

Gjatë fjalë së tij, Presidenti Biden paralajmëron ata që mund të përpiqen të përfitojnë nga konflikti dhe pohon mbështetjen e SHBA-së për Izraelin.

“Le të mos ketë asnjë dyshim. Izraeli ka mbështetjen e SHBA. Ne do të sigurohemi që shteti hebre dhe demokratik i Izraelit të mund të mbrojë veten, sot, nesër, siç kemi bërë gjithmonë. Është kaq e thjeshtë. Kushdo që mendon të përfitojë nga kjo situatë, kam një fjalë: Mos. Ne qëndrojmë krah Izraelit”, u shpreh Biden.

Presidenti Biden pohon se Izraeli do të ketë atë që i nevojitet për t’iu përgjigjur sulmit.

Konflikti Izrael-Hamas, Biden: SHBA qëndron krah Izraelit

Presidenti amerikan Joe Biden foli për konfliktin Izrael-Palestinë. Atij i bashkohet në Shtëpinë e Bardhë Zëvendës-Presidentja, Kamala Harris dhe Sekretari i Shtetit, Antony Blinken, raporton BBC News.

Presidenti, Biden e quan Hamasin të etur për gjak, duke thënë se ngjarjet të kujtojnë mizoritë më të këqija të kryera nga ISIS, i njohur ndryshe si grupi i ashtuquajtur Shteti Islamik, dhe i dënon ata për “mbi 1000 civilë të vrarë. Midis tyre të paktën 14 qytetarë amerikanë. “

“Hamasi nuk përkrah popullin palestinez”, thotë Biden. “Ata përdorën popullin palestinez si mburoja njerëzore”.

“Mjerisht për popullin hebre, kjo nuk është e re,” vazhdon ai. “Nxjerrë në sipërfaqe kujtime të dhimbshme” të antisemitizmit gjatë shekullit të kaluar.

Presidenti i SHBA ndan shembuj të disa prej historive të tmerrshme që vijnë nga rajoni: “Prindër të vrarë duke përdorur trupat e tyre për të mbrojtur fëmijët e tyre… Raportet e foshnjave që u vranë… Gratë e dhunuara.”

“Ne qëndrojmë me Izraelin, ne qëndrojmë me Izraelin,” thotë Biden.

Ai pohon se Izraeli do të ketë atë që i nevojitet për t’iu përgjigjur sulmit

Ministri Barkat: Izraeli do të “fshijë” Hamasin, djem të rinj i dogjën të gjallë

Ministri i Ekonomisë i Izraelit, Nir Barkat, tha se Izraeli do ta “fshijë” Hamasin pasi shumë fëmijë u dogjën të gjallë, u prenë koka dhe u qëlluan për vdekje civilët. Në një lidhje direkte me televizionin britanik “Sky News”, ministri ka thënë se operacioni i Izraelit do të vazhdojë derisa të vendoset “flamuri i bardhë”.

“Ne kemi dëgjuar për 40 djem të rinj, disa prej tyre u dogjën të gjallë, disa u prenë koka, disa u qëlluan në kokë”, tha ministri izraelit për “Sky”, megjithëse Forcat e Mbrojtjes izraelite nuk e kanë konfirmuar deklaratën e tij.

Gjatë fjalës së tij, ministri i Izraelit, Nir Barkat, bën thirrje që të mos mbështetet Hamasi, pasi në të kundërt paralajmëron të gjithë se rrezikojnë jetën e tyre. Ai thotë se i gjithë Izraeli është i bashkuar për të zhdukur Hamasin.

“I gjithë vendi është i bashkuar për të hequr Hamasin nga kjo botë, për ta nxjerrë jashtë. Të gjithë militantët, të gjithë infrastrukturën, njerëzit që mbështesin Hamasin, ne do t’i zhdukim ata. Ne po hyjmë për të vrarë militantët dhe çdo civil duhet të largohet. Nëse nuk lëvizni dhe po i mbuloni militantët e Hamasit, ju rrezikoni jetën tuaj. Ne nuk duam të lëndojmë njerëz të pafajshëm”.

Ministri Barkat e krahasoi Hamasin me ISIS-n, teksa tha se sulmet e tyre ishin shembull i asaj që kanë synim t’i bëjnë Izraelit.

“Intensifikohen bisedimet diplomatike për pengjet që mbahen nga Hamasi”

“Përpjekjet diplomatike thuhet se po intensifikohen për të liruar më shumë se 100 pengjet që thuhet se po mbahen nga Hamasi”, raporton BBC News referuar një burimi informacioni.

Në fokus të këtyre bisedimeve janë shkëmbimi i grave dhe fëmijëve, ku përfshihen shtetas izraelitë por edhe të tjerë.

Një diplomat tha për BBC News se diskutimet ishin duke u zhvilluar me ndërmjetësim të Gjirit të Katarit, ku janë vendosur disa nga udhëheqësit e Hamasit.

Si Izraeli, ashtu edhe Hamasi kanë mohuar publikisht lajmet e zhvillimit të negociatave për pengjet. Por një burim diplomatik tha për BBC News se po rritet ritmi i bisedimeve për lirimin e pengjeve.

Një burim tha se kishte shpresë, por pranoi se asnjëra palë nuk ishte e gatshme për ndërmjetësim teksa shtoi se kjo luftë po përkeqësohet.

Izraeli: 2 zyrtarë të Hamasit janë vrarë në sulmet ajrore

Ushtria izraelite thotë se 2 zyrtarë të lartë të Hamasit janë vrarë në sulmet ajrore në Gaza.

Zakaria Abu Muammar dhe Jawad Abu Shamal, anëtarë të byrosë politike të Hamasit, vdiqën pas një bastisjeje në Khan Yunis herët këtë mëngjes.

Një zëdhënës i Forcave të Mbrojtjes Izraelite pretendon se njëri nga viktimat, ministri i Ekonomisë i Hamasit, Shamal, ishte i përfshirë në financimin e terrorizmit brenda dhe jashtë Rripit të Gazës, si dhe në drejtimin e operacioneve që synonin qytetarët izraelitë.

Sipas Izraelit, viktima tjetër kreu i zyrës së marrëdhënieve ndërkombëtare të Hamasit, Muammar, ishte i përfshirë në planifikimin e “aktiviteteve të shumta terroriste”.

Hamasi nuk e ka konfirmuar vdekjen e dy zyrtarëve.

Izraeli sulmon qendrën e qytetit të Gazës

Gaza është nën sulmin e raketave izraelite. Hakmarrja ndaj Hamasit po intensifikohet ndërsa bombardimet nuk kanë kursyer as qendrën e qytetit të Gazës. Kufiri mes Gazës dhe Izraelit është marrë nën kontroll nga ushtria dhe se prej të Hënës sipas mediave ndërkombëtare asnjë militant nuk e ka përshkuar më kufirin për të kryer masakra mbi civilët.

Teksa luftimet intensifikohen, rritet edhe numri i viktimave nga të dyja palët. Izraeli po vajton të paktën 1 mijë viktima që nga e Shtuna. Ndërsa nga bombardimet e ushtrisë izraelite kanë mbetur 830 viktima palestineze. Mes viktimave janë edhe 10 britanikë, 11 amerikane dhe 13 francezë.

Ndërsa luftimet vazhdojnë, ajo ç’ka mbetet ende pa përgjigje është pyetja nëse Izraeli do të nisë një ofensivë tokësore në Gaza.

Gjatë orëve të fundit, Hamasi sulmoi me raketa qytetin Izraelit Ashkelon pas paralajmërimit që i bënë civilëve më herët.

Ushtria izraelite njoftoi se kishte goditur me qindra objektiva gjatë natës në lagjen Rimal të qytetit të Gazës, një lagje luksoze, ku strehohen ministra të qeverisë së Hamasit, dhe ku ndodhen godina universitetesh, organizatash mediatike dhe atyre që merren me ndihmat.

Sipas ambasadorit të Izraelit në Kombet e Bashkuara, Gilad Erdan, Hamas po mban peng 150 persona.

Agjencitë e OKB-së bënë thirrje për krijimin e një korridori humanitar për të dërguar ushqime e medikamente mjekësore.

Ushtria izraelite në pritje të urdhrit për sulm në Gazë

Kufiri me Rripin e Gazës tashmë është i sigurt. Asnjë militant i Hamasit nuk e ka shkelur gjatë 24 orëve të fundit, teksa ushtria izraelite ka blinduar gjithë vijën kufitare me mjete të rënda.

Trupat ushtarake janë në pritje të urdhrit për të nisur sulmin e madh në territoret jugperëndimore palestineze nën kontrollin e Hamasit... një ndërhyrje që siç tha të Hënën kryeministri Benjamin Netanjahu, do të jetë e jashtëzakonshme dhe do të ndryshojë për breza këtë zonë dhe do të ketë pasoja në gjithë Lindjen e Mesme. Bilanci i viktimave nga të dyja palët ka arritur në mbi 1700.

Shumica, 1 mijë përllogariten deri më tani mes izraelitëve. Ushtria e Izraelit tha se gjatë operacioneve në zonat ku të Shtunën pati shkëmbime zjarri dhe masakra nga militantët e Hamasit kanë gjetur edhe nëpër rrugë trupat e pajetë të 1500 personave, të cilët duhen identifikuar para se të përfshihen në bilancet zyrtare.

Në fshatin Beeri fare pranë kufirit me Gazën, terroristët e Hamasit kanë vrarë 10% të popullsisë civile dhe deri më tani janë gjetur trupat e 100 banorëve.

Edhe në Gaza, numri i të vrarëve po rritet frikshëm dhe deri tani përllogariten 700 të vdekur nga kundërpërgjigja me raketa e ushtrisë izraelite. Morgjet janë të tejmbushura me trupa viktimash.

Shkatërrimi është i dukshëm kudo, ende pa nisur sulmi tokësor i Izraelit. Civilët po marrin arratinë nga shtëpitë e tyre, pas thirrjes së Izraelit që ata të ikin në Egjipt, edhe pse pikat kufitare me këtë vend jo gjithmonë i kanë gjetur të hapura.

E gjithë zona, nga e Hëna është nën rrethim dhe banorët nuk kanë as ujë, as ushqim, as elektricitet e as karburant. Hamasi ka paralajmëruar se do të vrasë 150 pengjet, nëse ushtria izraelite nis sulmin.

Sekretari i Përgjithshëm i Kombeve të Bashkuara shprehu shqetësimin për situatën dramatike në të cilën ndodhet aktualisht Gaza, që sipas tij me rrethimin e ushtrisë izraelite do të zhytet edhe më tej në katastrofë.

Nën armë për sulmin janë thirrur 300 mijë rezervistë. Kjo do të jetë hera e parë që ushtria izraelite kthehet në Gaza pas 2 dekadash, që kur i dha fund pushtimit 38-vjeçar.

Hamasi: Diskutimet mbi pengjet fillojnë kur të mbarojnë luftimet

Ismail Haniyeh, kreu i byrosë politike të Hamasit, tha se nuk do të negociohet me Izraelin rreth pengjeve derisa të mbarojnë luftimet.

“Kemi informuar të gjitha palët që na kontaktuar në lidhje me të burgosurit që mbahen nga rezistenca se kjo çështje nuk do të hapet para fundit të betejës”, tha ai.

“Dhe do të jetë për një çmim që rezistenca do ta pranojë”, shtoi ai më tej.

Izraeli përllogarit që Hamasi mban 100 deri në 150 persona që i rrëmbeu pas sulmeve të së shtunës. Ndërkohë ushtria izraelite deklaroi se po vijon sulmet ajrore në Rripin e Gazës.

Të rinjtë izraelitë rrëfejnë panikun në masakrën e festivalit muzikor

Sahar Bena Sela gjatë gjithë kohës rri i heshtur nëpër korridoret e spitalit. Qëndron i ulur në karrocë pasi është dëmtuar në këmbë dhe ka marrë një plumb në dorë. 30-vjeçari është një nga të mbijetuarit e masakrës në festivalin muzikor, ku humbën jetën 260 të rinj. Tregon se ‘megaparty’ me tre skena dhe dhjetëra DJ, u shndërrua shpejt në një masakër.

“Ishte një ferr i vërtetë. Kurrë nuk kam parë diçka të tillë. Unë kam qenë në dy luftëra në jetën time dhe kurrë nuk kisha parë diçka të tillë. Trupa të pajetë gjithandej, një masakër… Atyre nuk u interesonte nëse je burrë apo femër, në je i ri apo plak, ata janë vrasës. Ajo që kanë bërë nuk falet kurrë. Një ditë do të hakmerremi ndaj Palestinës”.

I riu mundi të arratisej, por mbeti i plagosur në krah. 30-vjeçari ndihmoi të shpëtonin disa të rinj. Në festë ishte edhe Elad Hakimi, i cili thotë se brenda pak sekondash u kthye nga parajsa në ferr.

“Gjëja që dua më shumë është të zgjohem nga ky makth, të harroj gjithçka që ka ndodhur. Gjithçka ishte kaq e mahnitshme, festa më e mirë që kam qenë në jetën time, derisa ajo në një sekondë, kaloi nga parajsa në ferr.”

Ai dhe miqtë e tij e kuptuan shpejt se duhej të shpëtonin nga breshëria e krismave që vinin nga çdo drejtim.

“Rreth orës 06:30 u lëshuan raketat… Të gjithë kishin frikë, sepse nuk po e kuptonim se çfarë po ndodhte. Vajzat filluan të bërtasin. Nuk e dinim ku të shkonim, çfarë të bënim. Të gjithë menduan në fillim se kjo ishte normale, se do të kalonte, por qielli ishte i kuq, 300-400 raketa u lëshuan në sekonda. Në fillim menduam se ishin fishekzjarrë, pasi ishim në festë”.

Hakimi kujton se si ai dhe miqtë e tij u bënë dëshmitarë të një skene të përgjakshme.

“Ishin dy burra në motoçikleta në rrugë me kallashnikov, të cilët filluan të na qëllonin teksa po kalonim. Unë kalova përmes tyre me shpejtësi”, të gjithë kokat tona ishin ulur, plumbat fluturonin gjithandej.

Ai kujton se mundën të qëndronin në një dhomë të sigurt, në një bazë ushtarake për 12 orë. Pas orëve të gjata mbushur me frikë e ankth, ai më në fund mundi të kthehej në shtëpi.

“Ne hymë brenda kësaj baze, nuk na interesonte më asgjë dhe filluam të bërtisnim që dikush të na ndihmonte, por askush nuk na ndihmoi. Kërkuam dhe gjetëm një dhomë të sigurt dhe u fshehëm atje gjatë gjithë kohës. Kur hymë në këtë bazë kishte 50 terroristë, po prisnin, por ne fatmirësisht morëm një drejtim tjetër. Gjatë gjithë kësaj kohe dëgjoje të shtënash armësh, njerëz që vriten, ulërima. Njerëzit humbën jetën në vende të ndryshme brenda bazës.”

Pasi i shpëtoi militantëve, Hakimi kujton se u dërgoi një mesazh prindërve të tij për t’i qetësuar.

“U shkrova prindërve, i dërgova shokut tim një audio për t’u thënë prindërve të mi se nuk kam vuajtur dhe se gjithçka do të shkojë mirë”.

Në fund të intervistës me gazetarët e Agjencisë së Lajmeve Reuters, uron që Izraeli të hakmerret ndaj Palestinës.

“Shpresoj që të gjithë ata persona që janë rrëmbyer të arrijnë të shpëtohen. Uroj që ta rrafshojnë Gazën. Shpresoj që gjërat në qeverinë tonë të ndryshojnë, që dikush të marrë përgjegjësinë për atë që ka nevojë të bëhet tani”.

Vendi ku ndodhi tragjedia ishte shumë pranë kufirit me rripin e Gazës. Luftëtarët e Hamasit pritën deri në agim për të nisur sulmin, më i rëndi ndaj popullsisë izraelitë gjatë këtyre katër ditëve.

Konflikti Izrael-Palestinë, Irani mohon përfshirjen

Teherani ka mohuar përfshirjen në sulmin e militantëve të Hamasit në Izrael. Në fjalimin e tij të parë televiziv që nga sulmi, udhëheqësi i Iranit Ayatollah Ali Khamenei, vlerësoi nismëtarët e këtij sulmi.

“Përkrahësit e regjimit të Izraelit dhe disa njerëz brenda vetë regjimit, kanë bërë deklarata të rreme në ditët e kaluara dhe vazhdojnë ta bëjnë këtë, duke përfshirë faktin se Irani qëndron pas këtyre veprimeve. Ata e kanë gabim. Sigurisht ne mbrojmë Palestinën, mbrojmë luftën, puthim duart e atyre të rinjve palestinezë inteligjentë dhe trima që planifikuan sulmin ndaj këtij regjimi. Ne jemi krenarë për ta.”

Shtetet e Bashkuara bënë të ditur të hënën se Irani ishte bashkëpunëtor në sulmin e Hamasit ndaj Izraelit, por shtoi se nuk kishte prova që provonin këto pretendime. Gjenerali i lartë amerikan Mark Milley paralajmëroi Iranin që të mos përfshihej në krizë, duke thënë se ai nuk donte që konflikti të zgjerohej. Edhe Rusia ka reaguar për akuzat e presidentit Volodimir Zelenski se është në interesin e Moskës të nxisë luftën në Lindjen e Mesme.

“Pretendimet e Zelenskit nuk kanë absolutisht asnjë bazë. Ky është një konflikt i vjetër. Konfliktin palestinezo-izraelit, ka rrënjë dhe shumë kontradikta të thella. Shumë mund ta dinë sfondin, por është aq i thellë sa jo të gjithë i dinë nuancat”.

Ndërsa kryeministri britanik Rishi Sunak shprehu solidaritetin e tij me komunitetin hebre në Britaninë e Madhe.

“Nuk ka dy anë të këtyre ngjarjeve. Nuk bëhet fjalë për ekuilibër, unë qëndroj me Izraelin. Mbretëria e Bashkuar qëndron me Izraelin kundër këtij terrorizmi sot, nesër dhe përgjithmonë”.

Gjatë mbrëmjes së të hënës, Shtëpia e Bardhë u ndriçua në blu dhe të bardhë në mbështetje të Izraelit.

Lideri i çeçenëve krah palestinezëve: Izraeli i ka izoluar, na dërgoni atje…

Kreu i Republikës Çeçene Ramzan Kadyrov, njëkohësisht aleat i ngushtë i Kremlinit, ka bërë thirrje që të marrë fund konflikti aktual mes Izraelit dhe Hamasit, duke theksuar se ai po drejton një mision paqeruajtës në Palestinë.

Përmes Telegramit, Kadyrov ka ndarë një video-mesazh ku thotë: Ne mbështesim plotësisht veprimet e Palestinës, sepse Izraeli mori tokën e tyre dhe tani po i mban të izoluar. Ata nuk e kanë lirinë e fjalës. Sot unë e kundërshtoj luftën dhe po u bëj thirrje të gjithëve t’i japin fund kësaj lufte, për të parandaluar përhapjen e saj në të gjithë. Kjo luftë nuk do të përfundojë aq lehtë.

Ai konfirmoi po ashtu se një raketë e Hamasit ra pranë një xhamie që ai e kishte ngritur atje në nder të babait të tij, në një vendbanim izraelit jo shumë larg Jeruzalemit. Ai kërkoi nga të dyja palët që të përmbahen nga sulmet ndaj xhamisë.

“Unë po u bëj thirrje edhe një herë të gjithë muslimanëve, të gjithë qytetarëve dhe shtetit tonë që të mbështesin të vërtetën dhe t’i japin fund kësaj lufte. Ose na dërgoni atje në një mision paqeruajtës. Ne do të vendosim se kush ka të drejtë dhe kush ka gabim”, përfundon Kadyrov.

Borrell fton Izraelin dhe Palestinën në takimin urgjent të ministrave të Jashtëm të BE-së

Ministri i Jashtëm izraelit Eli Cohen dhe homologu i tij palestinez, Rriyad Ak-Maliki, janë ftuar të marrin pjesë në takimin urgjent të ministrave të Jashtëm të Bashkimit Evropian që do të zhvillohet gjatë ditës sot.

Në takimin urgjent të ministrave të Jashtëm të BE-së pritet të diskutohet rreth konfliktit Izrael-Hamas.

Nëpërmjet një postimi në rrjetin social “X”, përfaqësuesi i lartë i BE-së, Josep Borrell, tha se ka ftuar ministrin e Jashtëm izraelit dhe atë palestinez për të marrë pjesë në mbledhjen urgjente të planifikuar për sot pasdite.

“Kam ftuar ministrin e Jashtëm izraelit të marrë pjesë në takimin e ministrave të jashtëm të BE-së që po mbledh sot pasdite. Kam ftuar gjithashtu ministrin e Jashtëm (të Autoritetit Palestinez) Maliki që t’i bashkohet takimit dhe të prezantojë pikëpamjet e Autoritetit Palestinez”, shkruan Borrell në platformën “X”.

Realiteti tjetër në Rripin e Gazës: Palestinezët e pashpresë në mes të predhave

Shumë të vrarë, mijëra të plagosur e dhjetëra të marrë peng nga shtetasit izraelitë. Por, cili është realiteti tjetër i kësaj situate kaotike në Rripin e Gazës?

Është një luftë mes Izraelit dhe Hamasit, por palestinezët ashtu si civilët e tjerë të Izraelit s’kanë asnjë faj për tensionin mes palëve. Njëra palë kërkon kontrollin e plotë të tokave palestineze me çdo mënyrë, e tjetra synon hakmarrjen duke marrë njerëz rob e duke derdhur gjak.

Izraeli ka nisur një valë sulmesh ajrore dhe ka vendosur një “rrethim të plotë” në Rripin e Gazës, duke ndërprerë energjinë elektrike, ushqimin, ujin dhe gazin për 2.3 milionë banorë, shumica e të cilëve janë palestinezë.

Nga ana tjetër, Hamasi ka paralajmëruar se do fillojë të transmetojë video të ekzekutimit të pengjeve nëse Izraeli merret me ‘civilët e pafajshëm’.

Qytetarët e Rripit të Gazës gjenden në mes të gjithë kësaj, krejtësisht të pashpresë.

Forcat e Mbrojtjes së Izraelit thonë se kanë goditur 130 objektiva në Gaza brenda tre orëve dje në mëngjes. Forcat ushtarake të vendit janë në gatishmëri lufte pas sulmit me raketa, duke dërguar rreth një mijë trupa në Gaza.

Teksa në mediat ndërkombëtare thuhet se në total janë vrarë mbi 1500 persona, ende nuk ka një ndarje të saktë se sa prej tyre janë izraelitë e sa palestinezë.

Autoritetet palestineze thonë se janë vrarë 560 nga njerëzit e tyre. Sipas Kombeve të Bashkuara, që nga viti 2008, janë vrarë 6400 palestinezë nga bombardimet dhe 300 izraelitë, kjo pa llogaritur viktimat e fundit.

Qindra apartamente dhe shtëpi janë shkatërruar në Rripin e Gazës, duke përfshirë kampet e refugjatëve, duke lënë më shumë se 123,000 njerëz të pastrehë. Më shumë se 73 mijë të tjerë janë strehuar në shkolla, ndërsa spitalet nuk kanë kapacitet të mjaftueshëm për të shëruar të plagosurit. Spitali kryesor i Gazës, Spitali Beit Hanoun, është dëmtuar dhe tani është jashtë shërbimit pasi forcat izraelite kanë shënjestruar vazhdimisht zonën, sipas Ministrisë së Shëndetësisë së Gazës.

Një qendër kryesore komunikimi në Gaza është shkatërruar gjithashtu nga sulmet ajrore, duke e bërë të vështirë aksesin në internet ose kryerjen e telefonatave.

Ndryshe nga Izraeli, Rripi i Gazës nuk ka sirena sulmi ajror apo vende për t’u strehuar prej bombardimeve.

“Spitalet janë të mbipopulluara me njerëz të plagosur, ka mungesë të barnave dhe furnizimeve mjekësore dhe mungesë karburanti për gjeneratorë. Ambulancat nuk mund të përdoren”, thonë burime për mediat e huaja.

Ministri i Mbrojtjes Yoav Gallant tha se të gjitha ushqimet, karburantet, energjia elektrike dhe nevojat e tjera do të jenë të bllokuara për Rripin e Gazës.

Kjo është beteja më e fundit në konfliktin e gjatë Izrael-Palestinë të nxitur nga mosmarrëveshjet shekullore mbi tokat, duke përfshirë pushtimin izraelit të territoreve palestineze të Jeruzalemit Lindor, Bregut Perëndimor dhe Gazës në vitet 1960 dhe marrjen e Palestinës nga Hamasi në vitet 2000 që çoi në një bllokadë të vendosur nga Izraeli dhe Egjipti fqinjë në 2007.

Organizatat e të drejtave të njeriut janë të shqetësuara se kjo situatë do përkeqësojë krizën humanitare në territoret palestineze.

Sipas Kombeve të Bashkuara, 81% e popullsisë në Gaza jeton në varfëri. Ata kanë mungesa në ushqim, ujë të pastër dhe energji elektrike.

“I puthim duart atyre që planifikuan sulmin”, thotë lideri iranian

Udhëheqësi i Iranit, Ayatollah Ali Khamenei ka mbajtur sot fjalimin e tij të parë që nga nisja e sulmeve vdekjeprurëse mes Izraelit dhe Hamasit, e shtunë 7 Tetor. Ai mohon përfshirjen iraniane në sulmet vdekjeprurëse të nisura nga Hamasi të shtunën, ndërsa fajëson Izraelin për vrasjet masive të Hamasit.

“Ky tërmet shkatërrues ka shkatërruar disa struktura kritike në Izrael të cilat nuk do të riparohen lehtë. Veprimet e regjimit sionist janë fajtorë për këtë fatkeqësi,” tha Ayatollah Ali Khamenei.

“Ne puthim duart e atyre që planifikuan sulmin ndaj regjimit sionist”, tha udhëheqësi iranian sipas Reuters. Kujtojmë se Irani njihet gjerësisht si një ndër financuesit dhe furnizuesit me armë të militantëve të Hamasit.

Irani mbështet prej kohësh grupin e Hamasit, i cili kontrollon Rripin e Gazës dhe refuzon të drejtën e Izraelit për të ekzistuar. Ndërkohë, Izraeli tha sot se ka rivendosur kontrollin mbi kufirin e Gazës.

Ndërsa Shtetet e Bashkuara thanë të hënën se Irani është bashkëpunëtor në sulmin e Hamasit ndaj Izraelit, megjithëse se për këtë konstatim nuk ka prova që tregojnë pjesëmarrjen e drejtpërdrejtë të Teheranit në furnizimin e Hamasit.

Kërcënimi i Hamas: Do ekzekutojmë një peng për çdo shtëpi të bombarduar

Izraeli ka marrë në kontroll të gjithë kufirin me Gazën pas disa ditë luftimesh. Ushtria pretendon se ka gjetur të vrarë 1500 militantëve të Hamasit pranë zonave kufitare me Gazën. Izraeli po përgatitet për një sulm të madh tokësor, ku qindra tanke, forcat e ushtrisë dhe rreth 300 mijë rezervistë priten të futën në Gaza. Kryeministri Benjamin Netanyahu ka theksuar se fokusi do të jetë shkatërrimi total i Hamasit.

Duke u përballur me një nga krizat më të rënda në historinë e tij, Izraeli i kërkon armë të sofistikuara Shteteve të Bashkuara, duke përfshirë dhe sistemet mbrojtjes raketore. Dëme të mëdha ka dhe në Izrael, ku kryesisht është dëmtuar infrastruktura e zonave pranë Gazës.

“Çfarë të them, energjia elektrike është ndërprerë, shkatërrimi është i pranishëm kudo në një shkallë shumë të lartë. Tingujt e sulmeve ajrore janë vërtetë të frikshme, ende nuk e besoj që jam gjallë”.

Nga ana tjetër, njerëzit në qytetin e Gazës po kërkojnë nëpër rrënojat e ndërtesave të shkatërruara. Qendrat e militantëve, blloqe apartamentesh, spitalet, një xhami dhe banesat janë kanë shkatërruar nga raketat izraelite.

Gjendja e rënduar humanitare në Gaza do të përkeqësohet dita ditës. Agjencia e OKB-së për fëmijë UNICEF ka bërë thirrje për një korridor humanitar brenda dhe jashtë Gazës, pasi Izraeli ka ndërprerë furnizimet me karburant, energji elektrike dhe ujë.

Hamasi ka kërcënuar se do të ekzekutojë një peng sa herë që Izraeli të bombardojë një shtëpi. Sipas ambasadori të Izraelit në Kombet e Bashkuara, Gilad Erdan, Hamas po mban peng 150 persona.

Shtëpia e Bardhë ka lëshuar një deklaratë të përbashkët nga presidenti Biden dhe liderë të tjerë botërorë, duke shprehur mbështetje të palëkundur për Izraelin duke dënuar sulmin terrorist të Hamasit.

11 shqiptarë të tjerë kthehen nga Izraeli

11 shtetas shqiptarë kanë udhëtuar në orët e para të mëngjesit të sotëm nga Izraeli për në Shqipëri përmes një fluturimi të organizuar nga Mali i Zi.

Ministria për Evropën dhe Punët e Jashtme thotë se është në kontakt edhe me ministritë e vendeve të tjera të rajonit për t’i ardhur në ndihmë të gjithë qytetarëve që kërkojnë të kthehen në vendet e tyre.

“Raz dhe Aviv u rrëmbyen nga shtëpia e gjyshes, terroristët i futën në kamion”

“Izraeli është në luftë pasi militantët e Hamasit nisën një sulm shkatërrues”, kështu ka deklaruar kryeministri Benjamin Nentayahu duke se ditët vijuese do të jenë të vështira.

Hamasi, grupi militant palestinez që ‘sundon’ Rripin e Gazës, nisi një sulm të gjerë të shumëfishtë kundër Izraelit të shtunën. Mijëra raketa u hodhën nga Gaza ndërsa militantët depërtuan në komunitetet izraelite, duke masakruar qindra dhe rrëmbyer rreth 150 pengje.

Izraeli nisi një valë sulmesh ajrore si hakmarrje dhe ka vendosur një “rrethim të plotë” në Rripin e Gazës, duke ndërprerë energjinë elektrike, ushqimin, ujin dhe gazin për 2.3 milionë banorë.

Nga ana tjetër, Hamasi ka paralajmëruar se do fillojë të transmetojë video të ekzekutimit të pengjeve nëse Izraeli merret me ‘civilët e pafajshëm’.

Qindra civilë të pafajshëm, duke përfshirë fëmijë, besohet se janë marrë peng në Izrael nga Hamasi.

Autoritetet izraelite nuk kanë dhënë ende detaje specifike në lidhje me numrin dhe identitetin e viktimave të rrëmbyera, megjithatë, një vlerësim paraprak i ndarë nga një zyrtar i lartë ushtarak thotë se janë 150 persona janë kapur.

Midis tyre janë 5-vjeçarja Raz dhe 3-vjeçarja Aviv. Prindërit e dy të miturave janë të shkatërruar.

Babai i tyre Yoni Asher thotë se i pa vajzat e tij në një video të terroristëve, duke shtuar se i kishin futur në një kamion, të rrethuar nga burra me armë në duar.

Ai ende s’ka kontakt as me gruan e tuj, Doron Asher Katz, 34 vjeç. Kjo e fundit ndodhej te shtëpia e prindërve në Izraelin Jugor. Nuk dihet nëse ajo është rrëmbyer apo vrarë.

“Ajo më tha se terroristët i kishin shkuar në shtëpi, telefoni u shkëput”, thotë Yoni.

Të dy oficerë në ushtri, çifti vrau 7 terroristë të Hamasit për të shpëtuar binjakët e tyre

Një çift izraelit ka vrarë shtatë militantë të Hamasit për të shpëtuar fëmijët e tyre. Sipas mediave të huaja, Adar dhe Itay Berdychivsky të dy 30-vjeç, nga Kfar Aza shërbenin në ushtrinë izraelite si oficerë dhe mbanin armë në shtëpi.

Kur militantët iu afruan shtëpisë së tyre, çifti fshehu binjakët e tyre 10 muajsh në përpjekje për t’i shpëtuar. Ata vranë me armë zjarri 7 terroristë, por fatkeqësisht më pas u vranë të dy nga anëtarë të tjerë të bandës.

Fëmijët e tyre shpëtuan dhe pse qëndruan të vetëm për plot 14 orë, derisa gjyshja e xhaxhai i tyre i gjeti.

Foto nga momenti kur janë gjetur dy vogëlushët:

Militantët e Hamasit lëshuan një numër të madh raketash nga Rripi i Gazës në Izrael mëngjesin e 7 Tetorit.

Më 9 Tetor, Izraeli tha se rifitoi kontrollin mbi të gjithë kufijtë dhe zonat ngjitur me kufirin pranë Rripit të Gazës. Deri më tani, numri i të vdekurve në Izrael është rreth 1600 persona, me 2500 qytetarë të tjerë të plagosur.

BE-ja tërheq vendimin për pezullimin e ndihmave për palestinezët

Komisioni Evropian tha të hënën vonë se ndihmat humanitare për palestinezët nuk do të pezullohen, duke e hedhur poshtë një deklaratë paraprake të njërit prej zyrtarëve të vet të lartë.

Komisionari për Zgjerim i BE-së, Oliver Varhelyi, tha të hënën gjatë ditës se pas sulmit të grupit militant Hamas ndaj Izraelit të shtunën “të gjitha pagesat [për palestinezët] do të pezullohen menjëherë. Të gjitha projektet janë nën shqyrtim. Të gjitha propozimet e reja buxhetore, përfshirë edhe ato për vitin 2023 janë shtyrë deri në një njoftim të ri”.

Në një reagim më vonë, Komisioni Evropian e kundërshtoi zyrtarin e vet Varhelyi, duke thënë se “nuk do të ketë pezullim të pagesave”. Komisioni nuk dha shpjegim për këtë rrëmujë.

Që nga e shtuna, përkrahja e 27 vendeve të BE-së për Izraelin ka qenë e madhe, të cilat kanë thënë se vendi ka çdo të drejtë brenda ligjit ndërkombëtar të mbrojë veten në luftë me Hamasin.

Ndërkohë, Spanja e ka kundërshtuar ndaljen e ndihmave për palestinezët, me ministrin e Jashtëm në detyrë të saj, Jose Manuel Albares, që tha të martën se “ky bashkëpunim duhet të vazhdojë patjetër, sepse nuk mund ta përziejmë Hamasin, të cilin BE-ja e ka në listën e grupeve terroriste, me popullin palestinez, apo autoritetin palestinez, apo organizatat e Kombeve të Bashkuara në terren”.

Ai tha për radion spanjolle Cadena SER se territoret palestineze me gjasë do të kenë nevojë për më shumë ndihma në të ardhmen e afërt, pas sulmit të Hamasit kundër Izraelit të shtunën dhe bombardimeve hakmarrëse izraelite ndaj Rripit të Gazës si pasojë.

Ministrat e Jashtëm të Bashkimit Evropian do të takohen sot për të biseduar për këtë çështje.

Të hënën, Izraeli njoftoi rrethimin e plotë të Rripit të Gazës, duke mos lejuar futjen e ushqimit dhe ujit, si dhe duke e ndërprerë furnizimin me rrymë.

Kjo ka nxitur frikë se gjendja tashmë e rëndë humanitare në Gaza do të përkeqësohet shumë shpejt.

Izraeli i ka vazhduar të martën bombardimet vdekjeprurëse ndaj Rripit të Gazës së kontrolluar nga Hamasi, pasi grupi militant kërcënoi se do t’i vriste disa prej rreth 150 pengjeve që i rrëmbeu në fundjavë, nëse sulmet ajrore do të vazhdonin pa paralajmërim.

Numri i të vdekurve në Izrael është rritur në 900 nga sulmet e Hamasit, për të cilat Izraeli është hakmarrë me bombardime mbi Gazën, ku kanë mbetur rreth 700 të vrarë.

“Ikëm me makinë drejt bazës së tyre ushtarake”, çifti rrëfen si i shpëtoi plumbave në Gaza

Ishte një helikopter ai që “mbyti” zhurmën që po krijonte festivali. Predhat në Gaza e ndryshuan situatën në pak sekonda. Tymi i zi kishte mbuluar të gjitha ndërtesat, trupa të vdekur shiheshin pranë automjeteve ose në fushën ku po zhvillohej koncerti.

7 Tetori do jetë një datë historike për Izraelin, që në një farë mënyre dëshmon se ky shtet nuk është i pathyeshëm. Dy të mbijetuar të masakrës, janë zhvendosur në Tel Aviv.

Bëhet fjalë për Hai Cohen dhe Noam Kenner të cilët janë mëse të tronditur dhe mezi mbajnë lotët kur kujtojnë sulmin e asaj dite.

“Rreth orës 6.30 të mëngjesit pamë raketa që hidheshin nga lart, muzika ndaloi dhe dëgjuamk sirenat e alarmit. Njëherë menduam se ishin raketat e bombardimeve të zakonshme në zonat aty pranë, por ishte diçka më serioze. Vrapuam drejt makinës për të shpëtuar. I kam dhënë makinës shumë shpejt”, thotë Hai, 31 vjeç.

Ndërsa Noam thotë se sulmi ishte planifikuar në ditën e festivalit në mënyrë që të kishte më shumë humbje në njerëz.

“Dëgjova të shtëna, pashë Jeep-at e terroristëve. Kishte shumë makina, u krijua trafik dhe asnjëri nuk kishte si të dilte prej aty”, shton 22 vjeçarja.

Hai mori një vendim që me gjasë u shpëtoi jetën, në vend që të prisnin në bllokimin e trafikut, ata vendosën se ishte më mirë të kalonin nëpër fusha në drejtim të kundërt.

Duke iu shmangur plumbave dhe duke vozitur jashtë rrugës nëpër një fushë.

“Më dukej sikur po kaloja nëpër plumba, më fishkëllenin te veshi, gjëja më e tmerrshme që kam përjetuar”, përfundon Noam.

Të rinjtë shpjegojnë se ikja drejt bazës së tyre ushtarake ishte rruga më e sigurtë. Ndërkohë shumica e atyre që lanë pas ose u vranë, ose u morën peng.

“Sulmet ishin në anën e majtë të rrugës kryesore, dhe ne menduam të ikim 300 metra nga e djathta”, thotë Noam.

Ata kanë në duar ende byzylykët blu të festivalit të cilët thonë se do i mbajnë si një shenjë për të kujtuar atë që ndodhi e faktit që ia dolën sëbashku.

Për ta, është shokues fakti që një festë e madhe si ajo që bëri bashkë shumë njerëz u kthye në një nga ngjarjet më vdekjeprurëse të ndodhura ndonjëherë.

Pika e kalimit në Egjipt, e mbyllur

Forca e Mbrojtjes së Izraelit ka ndryshuar këshillën e saj për palestinezët që duan të lenë Gazën.

Më herët thanë se ata që duan të largohen mund të ikin nëpërmjet pikës së kontrolluar nga Egjipti.

Tashmë Izraeli thotë se pika e kalimit është e mbyllur.

Izraeli: Kemi gjetur trupat e 1500 militantëve të Hamasit

Ushtria izraelite tha se trupat e 1500 militantëve të Hamasit janë gjetur në Izrael rreth Rripit të Gazës.

Sipas autoriteteve izraelite evakuimi i të gjitha komuniteteve rreth Rripit të Gazës është kompletuar pothuajse.

Sigurohet kufiri me Gazën

Izraeli thotë se ka rimarrë kontrollin e kufirit me Gazën. Zëdhënësi i ushtrisë, Daniel Hagari, tha se ditën e djeshme nuk ka pasur asnjë hyrje të militantëve.

Sipas tij, inxhinierët janë duke minuar zonat ku disa pjesë të gardhit u shkatërruan. Militantët e Hamasit kaluan gardhin në disa vende të ndryshe para sulmit të së shtunës.

Ushtria izraelite këshillon palestinezët që të largohen në Egjipt

Ushtria izraelite ka këshilluar çdo palestinez që të largohet nga Gaza për në Egjipt, shkruan BBC.

“Jam në dijeni se pika e kalimit në Rafah, është ende e hapur”, tha koloneli Richard Hecht.

“Çdokush që mund të dalë, do ta këshilloja të ikte”, tha ai.

Kalimet në kufirin mes Egjiptit dhe Gazës janë litar shpëtimi për palestinezët.

Izraeli godet 200 shënjestra gjatë natës në Gaza

Forca Ajrore e Izraelit ka deklaruar se ka goditur 200 baza të Hamasit në Gaza.

Sipas të dhënave që kanë publikuar vetë autoritetet thuhet se janë goditur zonat në Rimal dhe Khan Yunis.

Sipas tyre janë shkatërruar baza kontrolli dhe komandimi, një depo armësh që sipas tyre ishte brenda një xhamie dhe shtëpinë e një komandanti të dyshuar të Hamasit.

REDAKSIA TVKLAN.AL

Cilësimet

Modaliteti i dritës

Madhësia e shkronjave

Aksesueshmëria

Redukto lëvizjet

Font i lexueshëm

Hapësira mes rreshtave

Thekso lidhjet

Lufta në Iran/ Trump: S’do dërgojmë ushtarë në terren. Teherani godet rafinerinë izraelite të naftës

Lufta në ditën e 19-të| Irani nis hakmarrjen, goditet fabrika më e madhe e gazit në botë

Izraeli vret ministrin e Iranit! Teherani: Hakmarrje për vrasjen e Larijanit

NATO: Ngushtica duhet të hapet sërish!

“E vështirë të ndalet”/ Shkatërrim masiv, si paraqitet situata nga sulmet iraniane në Izrael

“Na kontaktoni”, Mossadi vazhdon rekrutimet me Iranin në luftë

Përgjegjës për sulmin kibernetik ndaj Shqipërisë, Izraeli thotë se ka vrarë ministrin e Inteligjencës së Iranit

Turqia: Do të dislokohet një sistem i ri raketash Patriot në jug