Zelensky, bisedë telefonike me Boris Johnson

Në ditën e 94 të luftës në Ukrainë, Rusia ka vijuar të intensifikojë ofensivën e saj ushtarake në lindje të vendit. Lyman-i, qyteti hekurudhor ukrainas në rajonin e Donetskut është tani tërësisht në duart e rusëve sipas pretendimeve nga Ministria e Mbrojtjes në Moskë.

Në Luhansk, forcat ukrainase duket se do të duhen të dorëzohen përballë forcave ruse. Sipas zyrtarëve ukrainas forcat vendase do të duhet të largohen nga territori i pakët që zotërojnë në Luhanskun e shkatërruar nëse nuk duan që të kapen rob nga rusët.

Ofensiva në Donbas tani më është e fokusuar në qytetin e Severodonjeckut. Rusia e cila ka pësuar humbje të mëdha në këtë qytet, vijon të bombardojë masivisht zonën dhe tani më 2/3 e qytetit është në duart e  tyre.

Në mesazhin e tij të përditshëm presidenti ukrainas Volodymir Zelensky u shpreh se situata në Donbas është e vështire. Megjithatë ai tha se ky rajon do të jetë sërish Ukrainas pasi do të luftojnë për të.

Këtë të shtunë Zelensky mbajti edhe një bisedë telefonike me kryeministrin Britanik, Boris Xhonson. 

Në reagim në rrjetin social Twitter Zelensky tha se diskutoi me Xhonson forcimin e mbështetjes për Ukrainën dhe shmangien e një krize ushqimore nëpërmjet hapjes së porteve në Ukrainë.

Tv Klan