Trump urdhëroi tërheqjen e 5 mijë trupave amerikane nga Gjermania, Berlini: Jemi në rrugën e duhur

Evropianët duhet të marrin përgjegjësi më të madhe për sigurinë e tyre, tha të shtunën Ministri gjerman i Mbrojtjes Boris Pistorius në përgjigje të njoftimit të planeve të SHBA-ve për të tërhequr 5 mijë trupa nga Gjermania.

“Gjermania është në rrugën e duhur” në këtë drejtim, tha Pistorius, duke treguar zgjerimin e forcave të saj të armatosura Bundeswehr, prokurimin më të madh dhe më të shpejtë të pajisjeve dhe ndërtimin e infrastrukturës.

Pentagoni njoftoi të premten se SHBA-të do të tërheqin 5 mijë personel ushtarak nga aleati i NATO-s, Gjermania. Pistorius e vlerësoi numrin aktual të trupave amerikane të stacionuara në Gjermani në “pothuajse 40 mijë”.

Në përgjigje të kritikave të ashpra nga Uashingtoni për shpenzimet e mbrojtjes, anëtarët evropianë të NATO-s, përfshirë Gjermaninë, janë zotuar të marrin më shumë përgjegjësi për mbrojtjen e tyre. Por me buxhete të kufizuara dhe boshllëqe të mëdha në aftësitë ushtarake, do të duhen vite që rajoni të përmbushë nevojat e veta të sigurisë.

“Prania e ushtarëve amerikanë në Evropë, dhe veçanërisht në Gjermani, është në interesin tonë dhe në interes të Shteteve të Bashkuara”, tha Pistorius. Megjithatë, ishte “e parashikueshme që SHBA-të do të tërhiqnin trupat nga Evropa, përfshirë Gjermaninë”, shtoi ai.

Një reagim pati edhe nga NATO-ja. Zëdhënësja Allison Hart tha se aleanca po “punon me SHBA-të për të kuptuar hollësitë e vendimit të tyre”.

Hart shtoi se NATO-ja mbetet e bindur në aftësinë për të ofruar parandalim dhe mbrojtje, ndërsa “ky ndryshim drejt një Europe më të fortë në një NATO më të fortë vazhdon”.

Ministri i Jashtëm i Italisë, Antonio Tajani, ka shprehur shqetësim të fortë për rritjen e tensioneve në Lindjen e Mesme gjatë një bisede telefonike me homologun e tij iranian, Abbas Araghchi.

Në një deklaratë në X, Tajani tha se të dyja palët diskutuan “konfliktin në vazhdim në Iran dhe situatën në Lindjen e Mesme”, duke theksuar nevojën urgjente për të parandaluar përshkallëzimin e mëtejshëm.

Ai nënvizoi rëndësinë e intensifikimit të përpjekjeve diplomatike për arritjen e një marrëveshjeje dhe rihapjen e Ngushticës së Hormuzit, duke paralajmëruar se ndërprerjet e vazhdueshme mund të kenë pasoja negative për sigurinë ushqimore dhe stabilitetin, veçanërisht në Afrikë.

“E konfirmova qartë se për Italinë, zhvillimi i një programi bërthamor iranian për qëllime ushtarake përbën një vijë të kuqe, me rrezikun konkret për të nxitur një garë të rrezikshme armatimesh bërthamore në rajon,” tha Tajani.

Ai gjithashtu i bëri thirrje Iranit të përdorë ndikimin e tij mbi Hezbollah për të ndalur sulmet ndaj Izraelit dhe “për të arritur, përmes negociatave, paqen në Liban.”

“Italia është gjithnjë e më e angazhuar për të mbështetur çdo përpjekje ndërkombëtare për paqe, duke mbajtur të hapura kanalet e dialogut me të gjithë partnerët dhe duke promovuar stabilitetin në Lindjen e Mesme,” shtoi ai.

Duket se ekziston një konsensus i gjerë se ushtria izraelite ishte plotësisht e papërgatitur për adoptimin e shpejtë nga Hezbollahu të dronëve me fibër optike, një teknologji që përdoret gjerësisht edhe në Ukrainë nga të dyja palët.

Janë testuar ide të reja dhe janë vendosur radarë të rinj, por sfida mbetet e madhe.

Këta dronë mund të fluturojnë vetëm 30 cm mbi tokë dhe janë aq të vegjël sa është pothuajse e pamundur të zbulohen.

Janë zhvilluar edhe armë me lazer për t’i neutralizuar, por sipas raportimeve ato kanë rezultuar joefektive.

Po ashtu janë provuar armë si pushkët me saçme, të cilat nuk kërkojnë saktësi të lartë si pushkët automatike për të goditur një dron, por edhe këto nuk kanë dhënë rezultate të kënaqshme.

Vendosja e rrjetave mbrojtëse ka pasur gjithashtu efekt të kufizuar.

Shqetësimet për sigurinë e trupave po rriten ndjeshëm, ndërsa komentet në media pasqyrojnë qartë gjendjen aktuale dhe pasigurinë në terren.

Zëvendësministri i Jashtëm, Kazem Gharibabadi, tha se Irani ka besuar gjithmonë në diplomacinë e bazuar në interesa për të zgjidhur çështjet ekzistuese dhe ka luajtur rolin e tij në këtë drejtim.

“Irani ka paraqitur planin e tij ndaj Pakistanit si ndërmjetës, me qëllim për t’i dhënë fund përfundimisht luftës së imponuar, dhe tani topi është në fushën e Amerikës për të zgjedhur rrugën e diplomacisë ose për të vazhduar qasjen përballuese”, citohet ai nga mediat iraniane gjatë një takimi me ambasadorë dhe drejtues të misioneve diplomatike në Teheran.

“Irani është i gatshëm për të dyja rrugët, për të garantuar interesat dhe sigurinë e tij kombëtare, dhe në çdo rast do të ruajë gjithmonë skepticizmin dhe mosbesimin ndaj Amerikës dhe sinqeritetit të saj në rrugën e diplomacisë”, shtoi ai.

Lufta, e nisur nga SHBA dhe Izraeli në fund të shkurtit, është pezulluar që nga 8 prilli pas një raundi të dështuar bisedimesh paqeje në Pakistan.

Thienminh Dinh, mjeke emergjence për “Doctors Without Borders” që punon në Tiro, thotë se armëpushimi mes Izraelit dhe Libanit është “një armëpushim vetëm në emër” dhe po pengon mjekët të ofrojnë kujdes të duhur për njerëzit që kanë nevojë.

Duke folur për Al Jazeera, ajo tha “Civilët po vazhdojnë të vdesin, fëmijët po bombardohen ende, mjekët dhe gazetarët po vazhdojnë të jenë objekt sulmesh.”

Ajo përshkroi tmerrin e ngushëllimit të fëmijëve të ndarë nga prindërit e tyre. “Vetëm dy ditë më parë, kisha një fëmijë dyvjeçar dhe një katërvjeçar, me fraktura të rënda të kafkës, dëmtime në mushkëri dhe gjymtyrë të thyera, që thërrisnin për nënën e tyre dhe është shumë e vështirë t’i thuash një katër-vjeçari se gjithçka do të jetë mirë, kur nuk e di nëse nëna e tyre ka vdekur, është ndarë apo është ende e bllokuar nën rrënoja.”

Mjekja tha se trupat po grumbullohen dhe shumë prej të vdekurve janë njerëz që ndihmojnë në reagimin emergjent.

“Kaloj çdo ditë pranë varrezave masive rrugës për në punë, ku varret janë të shënuara me numra dhe këtë javë kishte numra të rinj. Ka pasur edhe punonjës të mbrojtjes civile që u vranë në një sulm të dytë, ndërsa po përpiqeshin të shpëtonin njerëz të tjerë”, tha ajo.

Nënkryetari i Parlamentit të Iranit, Hamidreza Haji-Babaei, thotë se ligji i ri do të parandalojë kalimin e anijeve izraelite në këtë rrugë detare jetike në çdo kohë.

Ai gjithashtu tha:

-Projektligji do të ndalojë kalimin e anijeve nga shtetet armike përmes ngushticës, përveç nëse këto vende paguajnë dëmshpërblime lufte.

-Ligji lejon kalimin e anijeve të tjera vetëm pasi të marrin leje dhe miratim nga Irani.

-Trafiku detar në Ngushticën e Hormuzit nuk do të kthehet në gjendjen që ishte para luftës.

Iraku mund të rikthejë prodhimin dhe eksportet e naftës në nivele normale brenda shtatë ditëve nga përfundimi i krizës në Ngushticën e Hormuzit, tha zëvendësministri i Naftës, Basim Mohammed.

Ministri tha se aktualisht prodhimi është 1.5 milion fuçi në ditë, ndërsa rreth 200 mijë fuçi në ditë eksportohen përmes Ceyhanit në Turqi. Po ashtu, janë përgatitur dy anije cisternë dhe pritet që të përgatiten edhe dy të tjera, në varësi të kushteve të sigurisë në ngushticë, e cila ka qenë kryesisht e mbyllur gjatë luftës SHBA-Izrael kundër Iranit.

Kryeministri dhe Ministri i Jashtëm i Katarit, Sheikh Mohammed bin Abdulrahman Al Thani, ka marrë një telefonatë nga Ministri i Jashtëm i Iranit, Abbas Araghchi, i cili e ka informuar për gjendjen aktuale të negociatave me SHBA-të për të gjetur një fund të përhershëm të luftës.

Al Thani shprehu mbështetjen e plotë të Katarit për përpjekjet e ndërmjetësimit për arritjen e një përfundimi paqësor të luftës, duke theksuar se liria e lundrimit në Ngushticën e Hormuzit është thelbësore dhe duhet të rikthehet sa më shpejt të jetë e mundur.

Ushtria libaneze ka raportuar se është zhvilluar një takim mes gjeneralit amerikan Joseph Clearfield, kreut të ri të komitetit të monitorimit të armëpushimit të udhëhequr nga SHBA, dhe komandantit të Ushtrisë Libaneze Rodolphe Haykal.

Në një deklaratë, ushtria tha se takimi “trajtoi situatën e sigurisë në Liban dhe zhvillimet rajonale”.

“Gjatë takimit u theksua rëndësia e rolit të ushtrisë dhe nevoja për ta mbështetur atë në këtë fazë aktuale”, thuhet më tej, duke njoftuar se gjenerali Clearfield u largua nga Libani pas takimit.

Libani jugor vazhdon të përballet me dhjetëra sulme izraelite çdo ditë, pavarësisht një “armëpushimi” që është aktualisht në fuqi. Po ashtu, Hezbollahu ka vazhduar të qëllojë ndaj ushtarëve izraelitë, të cilët aktualisht mbajnë nën kontroll pjesë të Libanit jugor.

Misioni i Iranit në OKB thotë se SHBA nuk po respektojnë Traktatin për Mospërhapjen e Armëve Bërthamore (NPT), duke e cilësuar sjelljen e saj si “hipokrite”.

“Për 56 vite, SHBA, zotëruese të mijëra kokave bërthamore dhe përhapësit numër një e këtyre armëve, ka qenë në mospërputhje të qartë me detyrimet e saj për mospërhapjen dhe çarmatimin bërthamor sipas Neneve I dhe VI të NPT-së”, thuhet në deklaratën e misionit të përhershëm të Iranit në OKB.

“SHBA nuk duhet të marrë asnjë mbrojtje për sjelljen e saj të papranueshme dhe hipokrite”, shtohet në deklaratë të publikuar në X.

“Nga pikëpamja ligjore, nuk ka kufizim mbi nivelin e pasurimit të uraniumit, për sa kohë që ai kryhet nën mbikëqyrjen e Agjencisë Ndërkombëtare për Energjinë Atomike (IAEA), siç ka qenë rasti me Iranin”, shton misioni.