Ky është momenti kur Arben Ndoka, ish-deputet i Partisë Socialiste të Lezhës shoqërohet në pranga për në Drejtorinë e Policisë së Tiranës nga forcat RENEA. Pamjet ekskluzive të Tv Klan e filmuan pasditen e kësaj të diele.

Përveç Ndokës, në pranga janë vënë edhe  disa persona të tjerë që futen bashkë me të në qelitë e Drejtorisë së Policisë së Tiranës. Burime zyrtare konfirmojnë se emri ish-deputetit ka dalë në bisedat e një grupi kriminal bashkë me disa zyrtarë të tjerë të lartë dhe është pjese e një hetimi për tjetërsimin e një prone shtetërore te zona e quajtur si ‘Rana e Hedhun”. Mbi Ndokën rëndojnë akuzat “Falsifikimi i dokumenteve”, “Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash.

Sipas policisë arrestimi i Ndokës është i lidhur me abuzimet me toka e troje në zonën e Shëngjinit, ku u arrestuan 12 persona, mes tyre edhe Kryetari i Bashkisë Lezhë. Disa ditë më parë, Policia e Lezhës goditi një tjetër grup prej 11 ish-zyrtarësh të Hipotekës, aktiviteti i të cilit dyshohet se lidhet me tjetërsimin e tokave në këtë qark.

 

Arben Ndoka e mori mandatin e deputetit të Lezhës në legjislaturën e kaluar, por në Shtator të vitit 2015, e dorëzoi mandatin për shkak të ligjit të dekriminalizimit. Ndaj tij kishte një dënim në Itali për shfrytëzim prostitucioni.

Njoftimi i plotë i Policisë së Shtetit:

Policia e Shtetit ka ekzekutuar urdhrin e arrestit për shtetasin Arben Ndoka, 46 vjeç, nga Lezha, për të cilin Gjykata e Krimeve të Rënda ka caktuar masën “Arrest në burg”.

Ai dyshohet për veprat penale “Falsifikimi i dokumenteve”, Falsifikimi i vulave, stampave ose i formularëve”, “Shpërdorimi i tokës”, në kuadër të një grupi kriminal, të përfshirë në tjetërsim tokash.

Hetimi disa mujor ka mbledhur prova dhe se ky grup kriminal dyshohet si i implikuar në abuzimet me troje shtetërore në zonën e Lezhës dhe Kurbinit, përmes falsifikimit të dokumenteve e vulave etj.

Në mars 2018, Policia e Lezhës hetoi një grup kriminal që dyshohej se ishte lidhur me abuzimet toka e troje në zonën e Shëngjinit dhe ndaloi 12 persona, mes tyre edhe Kryetari i Bashkisë Lezhë, ndërsa 11 u shpallën në kërkim. Ata në bashkëpunim me njëri-tjetrin akuzohen se kanë falsifikuar, tjetërsuar dhe përvetësuar 234,548 m2 tokë shtetërore ranishte në zonën bregdetare Shëngjin, Lezhë.

Megjithë provat e forta të paraqitura nga Policia dhe Prokuroria, Gjykata e Shkallës së Parë Lezhë dhe Gjykata e Apelit Shkodër, ndryshuan masat për një numër të konsiderueshëm shtetasish, mes tyre edhe Kryetari i Bashkisë Lezhë, si dhe 2 shtetas të ri-shpallur në kërkim.

Gjithashtu disa ditë më parë, Policia e Lezhës goditi një tjetër grup prej 11 ish-zyrtarësh të Hipotekës, aktiviteti i të cilit dyshohet se lidhet me tjetërsimin e tokave në këtë qark.  

Tv Klan