Lufta/ Huthit sulmojnë forcat e Jemenit. Irani e Omani pranë marrëveshjes për Hormuzin

Houthit kanë deklaruar se kanë kryer një operacion të madh ushtarak kundër forcave saudite në disa zona të Jemenit.

Sipas tyre, në sulm janë përdorur raketa balistike dhe dronë, duke shkaktuar qindra të vrarë dhe të plagosur. Pretendimet janë bërë nga zëdhënësi i grupit, Yahya Saree, përmes një deklarate në rrjetin X.

Ai tha se operacioni ishte përgjigje ndaj sulmeve dhe bllokadës së vazhdueshme nga Arabia Saudite. Deri tani, nuk ka konfirmim të pavarur për bilancin e raportuar apo reagim zyrtar nga pala saudite.

Ka përfunduar në Romë të Italisë raundi i fundit i negociatave mes Libanit dhe Izraelit, raporton korrespondenti ynë.

Bisedimet, të ndërmjetësuara nga Shtetet e Bashkuara të Amerikës, zgjatën tre ditë, ndërsa Izraeli vijon fushatën ushtarake në jug të Libanit.

Ky ishte raundi i shtatë i bisedimeve të drejtpërdrejta mes palëve, pas takimeve të mëparshme të zhvilluara në Uashington.

Paula Akpan, një aktiviste pro-Palestinë, është shpallur e pafajshme nga një gjykatë në Mbretërinë e Bashkuar për akuzën e shkaktimit të dëmit kriminal.

Akpan ishte një nga 10 protestuesit e akuzuar për dëmtim të pronës, pasi kishin spërkatur me bojë të kuqe si gjak hyrjet e bankës Scotiabank më 17 qershor 2024.

Ajo gjithashtu ishte lidhur me zinxhir me një protestues tjetër jashtë ndërtesës.

Në atë kohë, banka ishte aksionerja më e madhe e huaj e kompanisë Elbit Systems, me një investim prej 500 milionë dollarësh në prodhuesin kryesor izraelit të armëve, pajisjet ushtarake të të cilit janë përdorur në operacione ku janë vrarë dhe plagosur civilë palestinezë.

“Dy vitet e fundit kanë qenë shumë të vështira nga ana mendore për mua dhe njerëzit e mi të afërt, por është një nga nderet më të mëdha të jetës sime që kam luajtur një rol në presionin ndërkombëtar ndaj Scotiabank, i cili çoi në tërheqjen e plotë të investimeve të saj nga Elbit Systems vitin e kaluar”, u shpreh Paula.

Shtatë nga bashkëakuzuarit e Akpan janë shpallur gjithashtu të pafajshëm.

Irani ka nisur një fushatë diplomatike me vendet e Gjirit, duke i paralajmëruar se mund të godasë objektet e tyre energjetike dhe infrastrukturën strategjike nëse Shtetet e Bashkuara vazhdojnë sulmet ndaj Teheranit.

Sipas një zyrtari të lartë iranian, paralajmërimi përfshin mundësinë e sulmeve ndaj impianteve të naftës, rafinerive, rrjeteve të energjisë elektrike, objekteve të ujësjellësit, transportit dhe infrastrukturës tjetër të rëndësishme të aleatëve arabë të SHBA-së në rajon.

Mesazhi i Iranit u përcoll përmes kontakteve të shumta diplomatike pas kërcënimeve të presidentit amerikan Donald Trump më 28 korrik për të goditur rrjetin energjetik dhe infrastrukturën e Iranit.

Ministri i Jashtëm iranian Abbas Araqchi zhvilloi biseda me homologët e tij nga Arabia Saudite, Turqia dhe Katari, si dhe me shefin e ushtrisë së Pakistanit. Sipas burimeve të cituara, ai u kërkoi vendeve të Gjirit të përdorin ndikimin e tyre te Uashingtoni për të shmangur një përshkallëzim të ri ushtarak… (Lexo më shumë)

Organizatat për të drejtat e njeriut deklaruan këtë të enjte, 6 gusht, se sulmi izraelit në jug të Libanit, ku u vra gazetarja Amal Khalil dhe u plagos një gazetare tjetër, mund të përbëjë një krim lufte.

Sulmi ndodhi më 22 prill në fshatin Al-Tiri, vetëm pak ditë pas shpalljes së armëpushimit mes Izraelit dhe Hezbollahut. Amal Khalil, 42 vjeçe, gazetare e së përditshmes libaneze Al-Akhbar, dhe kameramania e pavarur Zeinab Faraj u strehuan në një ndërtesë pasi një sulm izraelit goditi një automjet që udhëtonte para tyre.

Më pas ndërtesa u godit sërish. Faraj u shpëtua, ndërsa autoritetet libaneze akuzojnë ushtrinë izraelite se pengoi përpjekjet për të shpëtuar Khalilin, e cila ishte ende gjallë.

Organizatat Human Rights Watch, Amnesty International dhe grupi libanez The Legal Agenda publikuan hetime të veçanta, ku arrijnë në përfundimin se sulmi mund të konsiderohet një krim lufte.

Ushtria iraniane thotë se është “plotësisht e përgatitur” për t’u përballur me çdo kërcënim. Zëdhënësi i ushtrisë, gjeneral brigade Amir Akraminia, tha se forcat e armatosura po forcojnë vazhdimisht gatishmërinë e tyre operacionale duke modernizuar sistemet e dëmtuara, duke futur pajisje të reja dhe duke u mbështetur në aftësitë e industrisë vendase, raportoi agjencia iraniane e lajmeve Tasnim dhe Al Jazeera. Akraminia shtoi se ndërsa furnizimet e reja mbërrijnë në njësi, pajisjet dhe automjetet luftarake po riorganizohen dhe ridislokohen bazuar në nevojat e përditshme operacionale.

Një zyrtar i lartë iranian ka deklaruar se negociatat mes Iranit dhe Omanit për Ngushticën e Hormuzit kanë të bëjnë vetëm me lëvizjen e anijeve dhe rrugët e lundrimit, dhe jo me rihapjen e kësaj rruge strategjike detare.

Behnam Saeedi, anëtar i Komisionit të Sigurisë Kombëtare dhe Politikës së Jashtme në Parlamentin iranian, tha se këto bisedime “nuk kanë të bëjnë aspak” me rihapjen e ngushticës.

Deklarata e tij vjen pasi presidenti amerikan Donald Trump tha se negociatat mund të çojnë në një marrëveshje dhe se një njoftim mund të bëhet së shpejti.

Saeedi theksoi se çdo diskutim për rihapjen e plotë të Hormuzit do të mund të zhvillohet vetëm pasi SHBA të ndalojë kërcënimet ndaj Iranit, të heqë bllokadat dhe të largohet nga rajoni, si dhe pas arritjes së një armëpushimi.

Sipas tij, Ngushtica e Hormuzit mbetet një aset strategjik dhe mjet presioni për Iranin. Ai tha se çdo anije që do të kalojë në këtë rrugë do të ketë nevojë për leje, nuk duhet të jetë ushtarake dhe do të duhet të respektojë rregullat e vendosura nga autoritetet iraniane. “Vendimmarrësi për Ngushticën e Hormuzit është Republika Islamike e Iranit. Negociatat po zhvillohen me Omanin si shtet bregdetar dhe nëse pranohen kushtet e Iranit, mund të arrihet një marrëveshje”, tha Saeedi.

👋 Përshëndetje lexues të tvklan.al!

Ja çfarë ka ndodhur shkurtimisht: 📰 Presidenti amerikan Donald Trump deklaroi se një marrëveshje për Ngushticën e Hormuzit mund të bëhet publike së shpejti, pas bisedimeve mes Iranit dhe Omanit. Trump tha se ka pasur përparim në negociata, ndërsa palët po punojnë për një zgjidhje që lidhet me kalimin e anijeve në këtë rrugë të rëndësishme detare.

Një person është vrarë dhe 12 të tjerë janë plagosur nga një sulm ajror izraelit në qytetin Tibnin, në jug të Libanit, ndërsa dy ushtarë izraelitë janë vrarë pas shpërthimit të një pajisjeje shpërthyese brenda një ndërtese të kurdisur në fshatin Majdal Selem.

Sipas Ministrisë së Shëndetësisë së Libanit, sulmi izraelit në Tibnin goditi çatinë e një salle lutjesh pranë një varreze, duke shkaktuar viktima dhe dëme materiale. Sulmi ndodhi në një kohë kur vijojnë përpjekjet diplomatike për zbatimin e një marrëveshjeje armëpushimi mes Izraelit dhe Libanit. Lexo më shumë

Presidenti iranian Masoud Pezeshkian tha se komunikimi me liderin suprem Mojtaba Khamenei është aktualisht shumë i vështirë.

Ai theksoi se prania e Khameneit përbën një forcë të madhe për udhëheqjen iraniane. Sipas agjencisë Fars, deklaratat u bënë në një kohë kur lideri i ri suprem nuk është shfaqur publikisht.

Mojtaba Khamenei mori postin pas vdekjes së babait të tij, Ali Khamenei, në një sulm izraelito-amerikan. Që nga marrja e detyrës në mars, ai ka qëndruar larg daljeve publike.