Ambasada e Shteteve të Bashkuara të Amerikës në Tiranë u bën thirrje të gjithë personave që do të marrin pjesë të shtunën në protestën e opozitës, të refuzojnë çdo akt dhune. Në një reagim në rrjetet sociale, një ditë para protestës kombëtare, që pritet të nisë në orën 18:30 të pasdites, Ambasada Amerikane thekson se kur një protestë paqësore njolloset nga një akt dhune, qëllimi i saj demokratik kompromentohet.
“E drejta për t’u përfshirë në protesta paqësore është një e drejtë themelore demokratike. Përgjatë muajve të fundit, pjesa më e madhe e pjesëmarrësve kanë ushtruar të drejtën e tyre për të protestuar paqësisht. Megjithatë, në çastin kur një protestë paqësore njolloset nga një akt dhune, qoftë edhe nga një individ, qëllimi demokratik i protestës kompromentohet. Është e paligjshme dhe jo demokratike të kryesh akte dhune, përfshirë edhe shkatërrimin e pronës. Iu bëjmë thirrje të gjithë personave të përfshirë në protestën e së shtunës që të refuzojnë dhunën për të siguruar një protestë paqësore dhe konstruktive
“, thotë në reagimin e saj ambasada e SHBA.
/tvklan.al
