“Njerëzit nuk e dinë që unë s’jam aktor”

Ikona e kinematografisë shqiptare, Mevlan Shanaj, i ftuar tek “Rudina“

I ftuar në programin “Rudina”, në Tv Klan ishte një prej ikonave të kinematografisë shqiptare. Bëhet fjalë për aktorin, regjisorin, producentin dhe artistin e merituar, Mevlan Shanaj. Me më shumë se 50 vite karrierë në aktrim, ai është një ndër emrat më të spikatur të botës së artit.

Në studio, ai ka bërë një rrëfim të gjatë mbi jetën e tij profesionale, por edhe familjare. I pyetur fillimisht nga moderatorja për vëmendjen nga gjinia femërore, Shanaj tregon se nuk e ka përjetuar diçka të tillë se është martuar shumë shpejt.

“U martova shpejt unë Rudina dhe u bëra baba shumë shpejt. Mendoj të bërit njeri publik t’i privon disa të drejta, mund edhe të kesh dëshira, kur je në atë moshë. Në një fluturim që ke në kokë, po i thua vetes stop je babi, stop je i njohur. S’e kam përjetuar këtë pyetje, por adhurimin e ndjej edhe sot. Sepse në të vërtetë publiku për njerëzit publik ka një impakt, ka një kontakt të vazhdueshëm”.

E ka nisur kinematografinë në vitin 1969, kur ishte ende student pa mbaruar fakultetin dhe po në atë vit nisi si regjisor në TVSH.

Nga viti 1987 deri më 1992 ka qenë Drejtor i Departamentit të Filmit në TVSH. Shkëputet për 4 vite nga televizioni dhe kthehet në vitin 2001 si drejtor i Departamentit të Filmit dhe Spektaklit në TVSH.

“Njerëzit nuk e dinë që unë s’jam aktor, unë kam mbaruar për aktor, por s’kam punuar asnjë orë si aktor. Unë jam emëruar direkt regjisor. Dhe unë krenarinë time, ambicien time e kam si regjisor”./tvklan.al